លោកនាយឧត្តមសេនីយ៍ Nguyen Tan Cuong ចុះត្រួតពិនិត្យការហាត់សមរួមគ្នានៃកងកម្លាំងចូលរួមដង្ហែក្បួនព្យុហយាត្រា

លោកនាយឧត្តមសេនីយ៍ Nguyen Tan Cuong ប្រធានអគ្គសេនាធិការនៃកងទ័ពប្រជាជនវៀតណាម អនុរដ្ឋមន្ត្រីក្រសួងការពារប្រទេស បានអញ្ជើញជាអធិបតី និងត្រួតពិនិត្យការហាត់សមរួមគ្នានេះ។

ថ្លែងក្នុងការត្រួតពិនិត្យនេះ  លោកនាយឧត្តមសេនីយ៍ Nguyen Tan Cuong បានកោតសរសើរចំពោះស្មារតី ទំនួលខុសត្រូវ និងលទ្ធផលដែលសម្រេចបានរបស់ក្រុមដង្ហែក្បួនព្យុហយាត្រាទាំងឡាយ។​ ទោះបីជាអាកាសធាតុក្តៅយ៉ាងណាក៏ដោយ ប៉ុន្ដែក្រុមដង្ហែក្បួនព្យុហយាត្រាបានជំនះលើការលំបាក ខិតខំហ្វឹកហាត់និងសម្រេចបានលទ្ធផលល្អជាងការហ្វឹកហាត់លើកមុន។ លោកនាយឧត្តមសេនីយ៍ Nguyen Tan Cuong បានស្នើឲ្យក្រុមដង្ហែក្បួនព្យុហយាត្រាទាំងឡាយបន្តខិតខំប្រឹងប្រែងហ្វឹកហាត់ ជំនះរាល់បញ្ហាដែលនៅ​សេសសល់ លើកកំពស់គុណភាព និងត្រៀមរៀបចំឲ្យបានល្អសម្រាប់ព្រឹត្ដិការណ៍នាពេលខាងមុខ។

លោកនាយឧត្តមសេនីយ៍ Nguyen Tan Cuong អញ្ជើញចុះត្រួតពិនិត្យការហាត់សមរួមគ្នា

លោកនាយឧត្តមសេនីយ៍ Nguyen Tan Cuong បានសង្កត់ធ្ងន់ថា ប្រជាជននៅទូទាំងប្រទេសកំពុងទន្ទឹងរង់ចាំពិធីរំលឹកខួបលើកទី ៥០ នៃទិវារំដោះភាគខាងត្បូង និងបង្រួបបង្រួមជាតិ ជាពិសេសការដង្ហែក្បួនព្យុហយាត្រារបស់កងកម្លាំងប្រដាប់អាវុធ ដូច្នេះក្រុមដង្ហែក្បួនព្យុហយាត្រា ត្រូវខិតខំប្រឹងប្រែង មិនឱ្យប្រជាជនខកបំណងឡើយ ហើយកងកម្លាំងត្រូវជម្នះរាល់ការលំបាក និងបំពេញភារកិច្ចឱ្យបានល្អ។

បន្ទាប់ពីចុះត្រួតពិនិត្យការហាត់សមរួមគ្នានេះ  លោកនាយឧត្តមសេនីយ៍ Nguyen Tan Cuong បានសួរសុខទុក្ខ លើកទឹកចិត្ត និងផ្តល់អំណោយដល់ក្រុមដង្ហែរក្បួនព្យុហយាត្រា។ ក្នុងឱកាសនេះ បញ្ជាការដ្ឋានយោធភូមិភាគទី៧ និងគណៈកម្មាធិការប្រជាជនខេត្ត Dong Nai ក៏បានជូនអំណោយ និងលើកទឹកចិត្តដល់កងកម្លាំងដែលចូលរួមដង្ហែរក្បួនព្យុហយាត្រាផងដែរ៕

ខាងក្រោម​នេះ​ជា​រូបភាពមួយចំនួននៃការហាត់សមរួមគ្នាលើកទី ២ របស់កងកម្លាំងដែលចូលរួមដង្ហែរក្បួនព្យុហយាត្រា​៕

រូបភាពមួយចំនួនរបស់កម្លាំងប្រដាប់អាវុធដែលចូលរួមដង្ហែរក្បួនព្យុហយាត្រា

បកប្រែដោយ Pham Diep