លោកនាយឧត្តមសេនីយ៍ Nguyen Tan Cuong ទទួលជួបឯកអគ្គរដ្ឋទូតគុយបាប្រចាំវៀតណាម

ក្នុងជំនួបនេះ លោកនាយឧត្តមសេនីយ៍ Nguyen Tan Cuong បានសង្កត់ធ្ងន់ថា ទំនាក់ទំនងមិត្តភាពជាប្រពៃណីពិសេសរវាងវៀតណាម និងគុយបាបានអភិវឌ្ឍយ៉ាងវិជ្ជមាន និងកាន់តែស៊ីជម្រៅលើវិស័យជាច្រើន រួមចំណែកដល់សន្តិភាពនិងស្ថិរភាព ការអភិវឌ្ឍរួមនៃតំបន់ និងពិភពលោក។ លោកនាយឧត្តមសេនីយ៍ Nguyen Tan Cuong បានអះអាងថា កិច្ចសហប្រតិបត្តិការលើវិស័យការពារជាតិគឺជាសសរស្តម្ភដ៏សំខាន់មួយ និងទទួលបានការយកចិត្តទុកដាក់ពីថ្នាក់ដឹកនាំជាន់ខ្ពស់នៃប្រទេសទាំងពីរ និងក្រសួងការពារប្រទេសទាំងពីរ។

លោកនាយឧត្តមសេនីយ៍ Nguyen Tan Cuong ពិភាក្សាជាមួយលោកឯកអគ្គរដ្ឋទូត  Orlando Nicolás Hernández Guillén

ផ្អែកលើផែនការសហប្រតិបត្តិការលើវិស័យការពារជាតិដំណាក់កាល ២០២៣-២០២៥ សកម្មភាពសហប្រតិបត្តិការលើវិស័យការពារជាតិទ្វេភាគីបន្តត្រូវបានជំរុញ និងអនុវត្តប្រកបដោយប្រសិទ្ធភាព ដោយភាគីទាំងពីរនិងផ្តោតសំខាន់លើការផ្លាស់ប្តូរគណៈប្រតិភូគ្រប់លំដាប់ថ្នាក់ ជាពិសេស គណៈប្រតិភូជាន់ខ្ពស់; ការងារបក្ស ការងារនយោបាយ; ការបណ្ដុះបណ្ដាល; ពេទ្យយោធា; ការចងសម្ព័ន្ធមេត្រីភាព ...

ឆ្នាំ ២០២៥ អបអរសាទរខួបលើកទី ៦៥ នៃការបង្កើតទំនាក់ទំនងការទូតរវាងវៀតណាម និងគុយបា (១៩៦០-២០២៥) ក្រសួងការពារប្រទេសវៀតណាមមានបំណងចង់បន្តសហការយ៉ាងជិតស្និទ្ធជាមួយក្រសួងបណ្ដាកងកម្លាំងប្រដាប់អាវុធបដិវត្តន៍គុយបា រួមចំណែកអភិវឌ្ឍន៍ថែមទៀតនូវទំនាក់ទំនងមិត្តភាពប្រពៃណីពិសេសវៀតណាម និងគុយបាដែលបានពូនជ្រំដោយប្រធានហូជីមិញ និងលោកប្រធាន Fidel Castro រួមជាមួយថ្នាក់ដឹកនាំគ្រប់ជំនាន់ និងប្រជាជននៃប្រទេសទាំងពីរ។

លោកនាយឧត្តមសេនីយ៍ Nguyen Tan Cuong បានឲ្យដឹងថា នាខែធ្នូខាងមុខ ក្នុងឱកាសរំលឹកខួបលើកទី ៨០ នៃការបង្កើតកងទ័ពប្រជាជនវៀតណាម និង​ខួបលើកទី ៣៥ នៃទិវាការពារជាតិដោយប្រជាជនទាំងមូល និងពិព័រណ៍ការពារជាតិអន្តរជាតិវៀតណាមលើកទី ២។  លោកនាយឧត្តមសេនីយ៍ Nguyen Tan Cuong សូមទទួលស្វាគមន៍ថ្នាក់ដឹកនាំក្រសួងបណ្ដាកងកម្លាំងប្រដាប់អាវុធបដិវត្តន៍គុយបា​ មកចូលរួមសកម្មភាពទាំងនេះក្នុងប្រទេសវៀតណាម។

លោកនាយឧត្តមសេនីយ៍ Nguyen Tan Cuong និងលោកឯកអគ្គរដ្ឋទូត  Orlando Nicolás Hernández Guillén

រីឯខ្លួនវិញ លោកឯកអគ្គរដ្ឋទូត Orlando Nicolás Hernández Guillén បានសម្តែងនូវការរំភើបចិត្ដចំពោះមនោសញ្ចេតនារវាងប្រជាជននៃប្រទេសទាំងពីរក្នុង​រយៈពេលកន្លងមក ក៏ដូចជាមនោសញ្ចេតនាដែលក្រសួងការពារប្រទេសវៀតណាមផ្តល់ជូនលោកក្នុងអាណត្ដិការងារនៅវៀតណាម។  ព្រមទាំងសង្កត់ធ្ងន់លើតួនាទីសំខាន់នៃកិច្ចសហប្រតិបត្តិការលើវិស័យការពារជាតិក្នុងទំនាក់ទំនងគុយបា-វៀតណាម។

លោកឯកអគ្គរដ្ឋទូត Orlando Nicolás Hernández Guillén បានអះអាងថា ទោះបីជាក្នុងឋានៈណាក៏ដោយក៏នឹងខិតខំប្រឹងប្រែងជំរុញទំនាក់ទំនងរវាងប្រទេសទាំងពីរនិយាយរួម និងទំនាក់ទំនងការពារជាតិនិយាយដោយឡែកឲ្យកាន់តែរីកចម្រើន៕

បកប្រែដោយ Pham Diep