នាំកិច្ចសហប្រតិបត្តិការវៀតណាម-សាធារណរដ្ឋឆែកឡើងដល់កម្រិតខ្ពស់ថ្មី

លោកស្រី Vo Thi Anh Xuan អនុប្រធានរដ្ឋវៀតណាមជួបជាមួយឧបនាយករដ្ឋមន្ត្រីទី ១ Vit Rakusan

នៅក្នុងកិច្ចពិភាក្សានានា ថ្នាក់ដឹកនាំឆែកបានវាយតម្លៃថា ទំនាក់ទំនងប្រពៃណីជាមិត្តភាព និងកិច្ចសហប្រតិបត្តិការយូរអង្វែងរវាងសាធារណរដ្ឋឆែកនិងវៀតណាមកំពុងអភិវឌ្ឍន៍យ៉ាងវិជ្ជមានលើវិស័យជាច្រើន។ នៅឆ្នាំ ២០២៥ ប្រទេសទាំងពីរនឹងប្រារព្ធខួបលើកទី ៧៥ នៃការបង្កើតទំនាក់ទំនងការទូត ដែលជាឱកាសដ៏ល្អសម្រាប់ភាគីទាំងពីរនាំយកកិច្ចសហប្រតិបត្តិការទៅកាន់កម្រិតខ្ពស់ថ្មី ​ហើយនិងអះអាងថា វៀតណាមជាដៃគូសំខាន់មួយរបស់សាធារណរដ្ឋឆែក និងជាទីផ្សារសក្តានុពលនៅអាស៊ីអាគ្នេយ៍ ព្រមទាំងបានឲ្យដឹងថា អាជីវកម្មឆែកកាន់តែច្រើនឡើងចាប់អារម្មណ៍ពង្រីកការវិនិយោគ និងធ្វើអាជីវកម្មនៅវៀតណាម ...

ទិដ្ឋភាពនៃជំនួប​រវាង​លោកស្រី Vo Thi Anh Xuan អនុប្រធានរដ្ឋវៀតណាម និងឧបនាយករដ្ឋមន្ត្រីទី ១ Vit Rakusan

លោកស្រីអនុប្រធានរដ្ឋ Vo Thi Anh Xuan បានអះអាងថា វៀតណាមជានិច្ចកាលយកចិត្តទុកដាក់ក្នុងការពង្រឹងទំនាក់ទំនងមិត្តភាពជាប្រពៃណីជាមួយសាធារណៈរដ្ឋឆែក ដែលជាដៃគូនាំមុខគេរបស់វៀតណាមនៅអឺរ៉ុបកណ្តាល និងបានស្នើឱ្យសាធារណរដ្ឋឆែកជួយបញ្ចុះបញ្ចូលបណ្តាប្រទេសនៅសហភាពអឺរ៉ុប (EU) ដែលនៅសេសសល់ដើម្បីធ្វើសច្ចាប័នលើកិច្ចព្រមព្រៀងការពារការវិនិយោគវៀតណាម-សហភាពអឺរ៉ុប (EVIPA) និងបញ្ចុះបញ្ចូលគណៈកម្មការអឺរ៉ុប (EC) ឱ្យដកប័ណ្ណលឿង IUU សម្រាប់ការនាំចេញជលផល​​វៀតណាមក្នុងពេលឆាប់ៗនេះ និងជួយសម្រួលការចេញទិដ្ឋាការដល់ពលរដ្ឋវៀតណាមទៅសិក្សា និងធ្វើដំណើរនៅសាធារណរដ្ឋឆែក។

ភាគីទាំងពីរបានឯកភាពជំរុញយន្តការសហប្រតិបត្តិការដែលមានស្រាប់ ជាពិសេសគណៈកម្មាធិការអន្តររដ្ឋាភិបាលវៀតណាម-ឆែកស្តីពីកិច្ចសហប្រតិបត្តិការសេដ្ឋកិច្ច លើកទឹកចិត្តស្ថាប័ន និងអង្គភាពអាជីវកម្មនៃប្រទេសទាំងពីរបន្តអនុវត្តប្រកបដោយប្រសិទ្ធភាពនូវកិច្ចព្រមព្រៀងពាណិជ្ជកម្មសេរីវៀតណាម-សហភាពអឺរ៉ុប ជំរុញកិច្ចសហប្រតិបត្តិការប្រកបដោយប្រសិទ្ធភាពលើវិស័យអប់រំ-បណ្តុះបណ្តាល វិទ្យាសាស្ត្រ-បច្ចេកវិទ្យា ព័ត៌មាន កសិកម្ម វប្បធម៌  ជំរុញការចរចា និងចុះហត្ថលេខាលើកិច្ចព្រមព្រៀងសហប្រតិបត្តិការលើវិស័យអប់រំ ពលកម្ម ការបង្កើតមជ្ឈមណ្ឌលវប្បធម៌ បន្តសម្របសម្រួល និងគាំទ្រគ្នាទៅវិញទៅមកនៅវេទិកាពហុភាគី ព្រមទាំងឲ្យដឹងថា រាល់វិវាទ និងជម្លោះទាំងអស់គួរតែត្រូវបានដោះស្រាយដោយសន្តិវិធី ស្របតាមធម្មនុញ្ញអង្គការសហប្រជាជាតិ និងការគោរពច្បាប់អន្តរជាតិ។

បកប្រែដោយ Duy Hoan