អនុព័ន្ធយោធាបរទេសប្រចាំនៅវៀតណាមទៅបំពេញទស្សនកិច្ចការងារនៅបញ្ជាការដ្ឋានយោធាខេត្ត Quang Binh

គណៈប្រតិភូអនុព័ន្ធយោធានៃបណ្ដាប្រទេសប្រចាំនៅវៀតណាមទៅទស្សនាអាគារប្រពៃណីរបស់កងកម្លាំងប្រដាប់អាវុធខេត្ត Quang Binh

នៅក្នុងជំនួបនេះ ថ្នាក់ដឹកនាំបញ្ជាការដ្ឋានយោធាខេត្ត Quang Binh បានជូនដំណឹងអំពីស្ថានភាពសេដ្ឋកិច្ច នយោបាយ វប្បធម៌ និងសង្គមរបស់ខេត្ត; ប្រពៃណីនិងសមិទ្ធផលដែលកងកម្លាំងប្រដាប់អាវុធខេត្ត Quang Binh សម្រេចបានក្នុងប៉ុន្មានឆ្នាំថ្មីៗនេះ។

តាងនាមឱ្យអនុព័ន្ធយោធានៃបណ្ដាប្រទេសនៅវៀតណាម លោកវរសេនីយ៍ឯក Eugene V.J. Dudley បានថ្លែងអំណរគុណចំពោះការទទួលស្វាគមន៍យ៉ាងកក់ក្ដៅរបស់កម្មាភិបាលនិងយុទ្ធជននៃបញ្ជាការដ្ឋានយោធាខេត្ត។ ខ្លឹមសារទាំងឡាយដែលបានចែករំលែកក្នុងដំណើរទស្សនកិច្ចនេះបានជួយគណៈប្រតិភូយល់កាន់តែច្បាស់អំពីតួនាទី មុខងារ និងភារកិច្ចរបស់បញ្ជាការដ្ឋានយោធាខេត្ត Quang Binh ក្នុងការផ្ដល់សេនាធិការជូនថ្នាក់លើ និងមូលដ្ឋានក្នុងការរៀបចំ និងអនុវត្តន៍ភារកិច្ចយោធា ការពារជាតិ; ការហ្វឹកហ្វឺន ការត្រៀមខ្លួនប្រយុទ្ធ ការស្វែងរកនិងជួយសង្គ្រោះ ការបង្ការ និងការជំនះផលវិបាកដោយសារគ្រោះធម្មជាតិ, សម្របសម្រួលក្នុងការរៀបចំសកម្មភាពសន្តិសុខសង្គម ជួយប្រជាជនអភិវឌ្ឍសេដ្ឋកិច្ច និងកាត់បន្ថយភាពក្រីក្រ និង​កសាងជនបទថ្មី៕

បកប្រែដោយ Pham Diep