ប្រទេសនានាវាយតម្លៃខ្ពស់ចំពោះការដែលវៀតណាមធ្វើជាអធិបតីនៃកិច្ចប្រជុំយោធា - ការពារជាតិអាស៊ាន ២០២០

កិច្ចប្រជុំនេះត្រូវបានរៀបចំឡើងក្នុងបំណងពង្រឹងកិច្ចសហប្រតិបត្តិការការពារជាតិរវាងប្រទេសអាស៊ាន និងបណ្តាប្រទេសជាដៃគូ ហើយនិងលើកកម្ពស់តួនាទីរបស់ក្រសួងការពារប្រទេសវៀតណាមក្នុងនាមជាប្រធានកិច្ចប្រជុំរដ្ឋមន្ត្រីការពារជាតិអាស៊ាន (ADMM) និងកិច្ចប្រជុំរដ្ឋមន្ត្រីការពារជាតិអាស៊ានបូក (ADMM +) ក្នុងឆ្នាំប្រធានអាស៊ាន ២០២០ ព្រមទាំងត្រៀមរៀបចំកិច្ចប្រជុំ ADMM + លើកទី ៧ ដែលនឹងត្រូវធ្វើឡើងតាមរយៈប្រព័ន្ធវីដេអូ នាខែធ្នូ ខាងមុខនេះ។

លោកឧត្តមសេនីយ៍ឯក Nguyen Chi Vinh ថ្លែងនៅកិច្ចប្រជុំ

ថ្លែងនៅក្នុងកិច្ចប្រជុំ លោកឧត្តមសេនីយ៍ឯក Nguyen Chi Vinh បានសង្កត់ធ្ងន់ថា ក្នុងរយៈពេលកន្លងមក កិច្ចសហប្រតិបត្តិការការពារជាតិបានរួមចំណែកយ៉ាងសំខាន់ក្នុងការការពារនិងប្រយុទ្ធប្រឆាំងជំងឺរាតត្បាត Covid-19 នៃបណ្ដាប្រទេសអាស៊ាន និងដៃគូនានា។ លោកឧត្តមសេនីយ៍ឯក Nguyen Chi Vinh បានវាយតម្លៃខ្ពស់ចំពោះការចូលរួមរបស់គណៈប្រតិភូនៃប្រទេសនានា​ ក៏ដូចជាលទ្ធផលនៃកិច្ចប្រជុំក្រុមមន្ត្រីជាន់ខ្ពស់ការពារជាតិអាស៊ានបើកទូលាយ (ADSOM + WG) តាមរយៈប្រព័ន្ធវីដេអូ នាថ្ងៃទី ១៨ ខែវិច្ឆិកា ។

នៅឯកិច្ចប្រជុំ ប្រតិភូទាំងឡាយនិងអគ្គលេខាធិការរងអាស៊ាន លោក Hoang Anh Tuan បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រសួងការពារប្រទេសវៀតណាមក្នុងការរៀបចំកិច្ចប្រជុំយោធា-ការពារជាតិអាស៊ាន ឆ្នាំ ២០២០ ដែលក្នុងនោះមានកិច្ចប្រជុំ ADSOM + ក្នុងបរិបទនៃការរីករាលដាលនៃ Covid-19 តាមរយៈនោះ រួមចំណែកក្នុងការរក្សាកិច្ចសហប្រតិបត្តិការការពារជាតិនៅក្នុងក្របខ័ណ្ឌនៃ ADMM និង ADMM +។ លោកនាយឧត្តមសេនីយ៍ Natt Intracharoen រដ្ឋលេខាធិការប្រចាំការនៃក្រសួងការពារជាតិថៃបានមានប្រសាសន៍ថា “យើងខ្ញុំសូមថ្លែងអំណរគុណចំពោះក្រសួងការពារប្រទេស​វៀតណាមក្នុងនាមជាប្រធាន ADMM និង ADMM + ដែលបានជួយបង្ហាញពីសារៈសំខាន់នៃកិច្ចសហប្រតិបត្តិការការពារជាតិក្នុងការប្រយុទ្ធប្រឆាំងជំងឺរាតត្បាត Covid-19”។

ប្រតិភូទាំងឡាយចូលរួមកិច្ចប្រជុំ ADSOM + តាមរយៈប្រព័ន្ធវីដេអូ

ខណៈដែលលោក Kim Sangjin ប្រធាននាយកដ្ឋានគោលនយោបាយអន្តរជាតិនៃក្រសួងការពារជាតិកូរ៉េខាងត្បូង បានឲ្យដឹងថា កិច្ចប្រជុំ ADSOM + លើកនេះ ត្រូវបានធ្វើឡើងយ៉ាងទាន់ពេលវេលាដើម្បីពិភាក្សាអំពីបញ្ហាដែលទាក់ទងនឹងជំងឺរាតត្បាត Covid-19 ក៏ដូចជាកិច្ចសហប្រតិបត្តិការការពារជាតិក្នុងក្របខ័ណ្ឌនៃ ADMM +។ រីឯលោក Dato Seri Pahlawan Shahril Anwar bin Haji Ma’awiah លេខាធិការនៃក្រសួងការពារជាតិប្រ៊ុយណេ  បានវាយតម្លៃថា កិច្ចប្រជុំ ADSOM + លើកនេះគឺជា “វិធីសាស្រ្តវិជ្ជមានដើម្បីពង្រឹងកិច្ចសហប្រតិបត្តិការការពារជាតិរវាងអាស៊ាន និងដៃគូនានា”។

នៅក្នុងកិច្ចប្រជុំនេះដែរ ប្រតិភូទាំងឡាយត្រូវបានជម្រាបជូនអំពីកិច្ចសហប្រតិបត្តិការក្នុងអាស៊ានដែលធ្វើបច្ចុប្បន្នភាពដោយលេខាធិការដ្ឋានអាស៊ាន និងស្តាប់របាយការណ៍ស្តីពីលទ្ធផលនៃកិច្ចប្រជុំ ADSOM + WG នៅថ្ងៃទី ១៨ ខែវិច្ឆិកា; ចែករំលែកទស្សនៈស្តីពីស្ថានភាពពិភពលោកនិងតំបន់ក្នុងបរិបទនៃការរីករាលដាលនៃ Covid-19; អនុម័តលើផែនការការងារដំណាក់កាល ២០២១-២០២៣ នៃបណ្ដាក្រុមជំនាញ ADMM +; ពិភាក្សាលើសេចក្តីព្រាងនៃសេចក្តីថ្លែងការណ៍រួមនៃកិច្ចប្រជុំ ADMM + លើកទី ៧ ក៏ដូចជាការងារត្រៀមរៀបចំកិច្ចប្រជុំនេះផងដែរ។

បកប្រែដោយ Pham Diep