ក្រសួងនគរបាលវៀតណាមប្រគល់ម៉ាស់ចំនួន ១ ម៉ឺនសន្លឹកជូនក្រសួងមហាផ្ទៃនៃប្រទេសបារាំង

តាមរយៈឯកអគ្គរដ្ឋទូតបារាំងប្រចាំនៅវៀតណាម លោក Nicolas Wrarney លោកឧត្តមសេនីយ៍ទោ Truong Van Thong  បានប្រគល់ម៉ាស់របស់ក្រសួងនគរបាលវៀតណាមជូនក្រសួងមហាផ្ទៃបារាំង (រូប​ថត៖ vov.vn)

នៅក្នុងពិធីនេះ លោកឧត្តមសេនីយ៍ទោ Truong Van Thong  ប្រធាននាយកដ្ឋានទាក់ទងបរទេស​នៃ​ក្រសួង​​នគរបាល​វៀត​ណាម​បាន​អះ​អាងថា វៀត​ណាម​និង​បារាំង​តែង​តែយក​ចិត្តទុ​កដាក់លើកា​រជំរុញទំ​នាក់ទំនងភាពជាដៃគូយុទ្ធសាស្រ្តឲ្យកាន់តែរីកចម្រើន និងមានប្រសិទ្ធភាព ដោយ​​ស្រប​តាមគោលការណ៍​ទាំង​ឡាយដែលត្រូវបានបញ្ជាក់នៅក្នុងសេចក្តីថ្លែងការណ៍រួម​របស់​​ថ្នាក់​​ដឹកនាំជាន់ខ្ពស់នៃប្រទេសទាំងពីរ ដើម្បីផ្តល់ផល​ប្រយោជន៍ដល់ប្រជាជន​នៃ​ប្រទេសទាំងពីរ ដើម្បីសន្តិភាព សន្តិសុខ ស្ថិរភាព និងការអភិវឌ្ឍនៅក្នុងតំបន់អាស៊ីប៉ាស៊ីហ្វិក និងនៅលើពិភពលោក។

ក្រសួង​នគរបាល​វៀតណាម និងដៃគូនានានៃប្រទេសបារាំងបានអនុវត្តយ៉ាងសកម្មនូវកិច្ចសហប្រតិបត្តិការក្នុងការប្រយុទ្ធ​ប្រឆាំងឧក្រិដ្ឋកម្ម ហើយទទួលបានលទ្ធផលគួរឲ្យកត់សម្គាល់ជាច្រើន។ នាពេលខាងមុខ ក្រសួងនគរបាលវៀតណាមរំពឹងថា កិច្ចសហប្រតិបត្តិការល្អរវាងក្រសួងនគរបាលវៀតណាម និងស្ថាប័ននីតិប្រតិបត្តិនានា​នៃ​ប្រទេសបារាំងនឹង​​កាន់​​តែ​​រីក​ចម្រើន​ថែម​ទៀត តាម​រយៈ​ការ​បន្តអនុវត្តបណ្តាសកម្មភាព​សហប្រតិបត្តិការរវាងក្រសួងនគរបាលវៀតណាម និងដៃគូនានានៃប្រទេសបារាំង ក្រោយពេល​ដែល​ជំងឺរាតត្បាត Covid-19 ផុត​រ​លត់​ទៅ​។

លោកឯកអគ្គរដ្ឋទូត Nicolas Warnery បានថ្លែងអំណរគុណយ៉ាងជ្រាលជ្រៅចំពោះមនោសញ្ចេតនាល្អពីក្រសួង​នគរបាល​វៀតណាម  និងបានសង្កត់ធ្ងន់​ថា នេះ​គឺជាការយកចិត្តទុកដាក់ និងការចែករំលែកបានទាន់ពេលវេលា ដែលបង្ហាញពីចំណងមិត្តភាពរវាងប្រទេសទាំងពីរ ជាពិសេសរវាងស្ថាប័ននីតិប្រតិបត្តិនៃប្រទេសទាំងពីរ។

លោកឯកអគ្គរដ្ឋទូត Nicolas Warnery បានបញ្ជាក់ថា ក្នុងឋានៈរបស់ខ្លួនលោកនឹងបន្តចូលរួមលើកកម្ពស់ទំនាក់ទំនងរវាងប្រទេសទាំងពីរបារាំង - វៀត​ណាម ក៏​ដូច​ជា​រវាងបណ្តាស្ថាប័ននីតិប្រតិបត្តិបារាំង និងក្រសួងនគរបាលវៀតណាមឲ្យកាន់តែរីកចម្រើនថែមទៀត  ដើម្បីផ្តល់ផល​ប្រយោជន៍ដល់ប្រជាជននៃប្រទេសទាំងពីរ ដើម្បីសន្តិភាព និងស្ថិរភាពក្នុងតំបន់ និងនៅលើពិភពលោក៕

បកប្រែដោយ Duy Hoan