អបអរសាទរខួបលើកទី ៥០ នៃទិវាឯករាជ្យជាតិឡាវ និងខួបលើកទី ១០៥ នៃថ្ងៃកំណើតរបស់លោកប្រធាន កៃសុន ភូមិវិហារ

ថ្លែងសុន្ទរកថានៅក្នុងពិធីនេះ ដោយរំលឹកពីព្រឹត្តិការណ៍សំខាន់ៗជាប្រវត្តិសាស្ត្រនៃបដិវត្តន៍ឡាវ លោក Luong Cuong ប្រធានរដ្ឋបានមានប្រសាសន៍ថា ក្រោមការដឹកនាំរបស់បក្សប្រជាជនបដិវត្តន៍ឡាវ ប្រជាជនឡាវបានរួបរួមគ្នា ប្រយុទ្ធដោយឥតឈប់ឈរ ក្លាហាន និងសម្រេចបានជ័យជម្នះដ៏រុងរឿង។ នៅថ្ងៃទី ១២ ខែតុលា ឆ្នាំ១៩៤៥ រដ្ឋាភិបាលឡាវ អ៉ីតសាឡា ត្រូវបានបង្កើតឡើង ហើយនៅថ្ងៃទី ២ ខែធ្នូ ឆ្នាំ១៩៧៥ សាធារណរដ្ឋប្រជាធិបតេយ្យប្រជាមានិតឡាវបានកើតមក។ នេះគឺជាព្រឹត្តិការណ៍ដ៏អស្ចារ្យមួយ ដោយបើកសម័យកាលថ្មីនៃឯករាជ្យភាព និងសេរីភាពសម្រាប់ប្រជាជនឡាវ។ បក្សប្រជាជនបដិវត្តន៍ឡាវ បានក្លាយជាបក្សកាន់អំណាច ដោយបានកំណត់មាគ៌ា គោលដៅ ភារកិច្ច និងទិសដៅអភិវឌ្ឍន៍របស់ប្រទេសឡាវយ៉ាងត្រឹមត្រូវ និងច្បាស់លាស់នៅក្នុងសម័យកាលថ្មី។

លោកប្រធានរដ្ឋបានបញ្ជាក់ថា រយៈពេល ៥០ ឆ្នាំកន្លងមកនេះ គឺជាដំណើរប្រវត្តិសាស្ត្រដ៏រុងរឿងរបស់ប្រជាជនឡាវ ជាដំណើរដ៏អង់អាចក្លាហាន ពោរពេញដោយជំនឿ ការតស៊ូលើផ្លូវដែលបានជ្រើសរើស និងជំនឿលើអនាគតដ៏ភ្លឺស្វាងរបស់ប្រទេស។ ក្រោមការដឹកនាំរបស់គណបក្សប្រជាជនបដិវត្តន៍ឡាវ ប្រទេសឡាវបានផ្លាស់ប្តូរខ្លួនឯងយ៉ាងរឹងមាំ រួបរួមគ្នា និងជំនះការលំបាក និងបញ្ហាប្រឈមទាំងអស់ដោយភាពធន់ ដោយសម្រេចបាននូវសមិទ្ធផលដ៏អស្ចារ្យ និងលេចធ្លោជាច្រើនលើគ្រប់វិស័យ។ នយោបាយ និងសង្គម មានស្ថិរភាព ខឿនការពារជាតិ និងសន្តិសុខត្រូវបានរក្សារឹងមាំ ជីវភាពរស់នៅរបស់ប្រជាជនត្រូវបានកែលម្អកាន់តែខ្លាំងឡើង។ ទំនាក់ទំនងការបរទេសត្រូវបានពង្រីកកាន់តែខ្លាំងឡើង។ កិត្យានុភាព និងតួនាទីរបស់ឡាវត្រូវបានលើកកម្ពស់ឥតឈប់ឈរលើឆាកអន្តរជាតិ។

លោក Luong Cuong ប្រធានរដ្ឋវៀតណាម អញ្ជើញចូលរួមពិធី

ក្នុងនាមថ្នាក់ដឹកនាំនៃបក្ស រដ្ឋ និងប្រជាជនវៀតណាម លោក Luong Cuong ប្រធានរដ្ឋបានអបអរសាទរយ៉ាងកក់ក្តៅចំពោះសមិទ្ធផលសំខាន់ៗ និងជាប្រវត្តិសាស្ត្រដែលបក្ស រដ្ឋ និងប្រជាជនឡាវ សម្រេចបានក្នុងរយៈពេល ៥០ ឆ្នាំកន្លងមកនៃការអភិវឌ្ឍ។

ក្នុងឱកាសពិសេសនេះផងដែរ ដោយរំលឹកនិងផ្តល់កិត្តិយសជូនចំពោះលោកប្រធាន កៃសុន ភូមិវិហារ - ស្ថាបនិកនៃបក្សប្រជាជនបដិវត្តន៍ឡាវ ដែលជាមិត្តជិតស្និទ្ធ និងស្មោះត្រង់របស់បក្ស រដ្ឋ និងប្រជាជនវៀតណាម លោកប្រធានរដ្ឋបានសង្កត់ធ្ងន់ថា ជីវិតរបស់លោកប្រធាន កៃសុន ភូមិវិហារ គឺជានិមិត្តរូបដ៏ភ្លឺស្វាងនៃស្នេហាជាតិ ភាពវៃឆ្លាតជាយុទ្ធសាស្ត្រ និងការលះបង់គ្រប់យ៉ាងដើម្បីប្រជាជន។ ទោះបីជាលោកបានទទួលមរណភាពក៏ដោយ ប៉ុន្តែគំនិត ចក្ខុវិស័យ និងគោលការណ៍ណែនាំត្រឹមត្រូវរបស់លោកប្រធាន កៃសុន ភូមិវិហារ បានក្លាយជាមរតកដ៏មានតម្លៃជារៀងរហូត ជាត្រីវិស័យសម្រាប់បុព្វហេតុនៃការកសាង និងអភិវឌ្ឍប្រទេសឡាវ ក្នុងយុគសម័យថ្មី។

ដោយចង្អុលបង្ហាញថា ទំនាក់ទំនងពិសេសរវាងវៀតណាម និងឡាវ ត្រូវបានដាក់គ្រឹះផ្ទាល់ដោយអគ្គមគ្គុទ្ទេសន៏ គឺលោកប្រធាន ហូ ជីមិញ លោកប្រធាន កៃសុន ភូមិវិហារ និងលោកប្រធាន ស៊ូផានុវង្ស។ លោកប្រធានរដ្ឋបានបញ្ជាក់ថា ទំនាក់ទំនងនេះដែលត្រូវបានកសាង ថែរក្សា និងពូនជ្រំយ៉ាងយកចិត្តទុកដាក់ដោយថ្នាក់ដឹកនាំ និងប្រជាជនគ្រប់ជំនាន់នៃប្រទេសទាំងពីរ ហើយបានក្លាយជាទ្រព្យសម្បត្តិដ៏មានតម្លៃ ជា “ទំនាក់ទំនងតែមួយគត់ក្នុងប្រវត្តិសាស្ត្រពិភពលោក” ជាមូលដ្ឋានគ្រឹះដ៏រឹងមាំសម្រាប់ជំនាន់ក្រោយៗ ដើម្បីបន្តសរសេររឿងរ៉ាវដ៏ស្រស់ស្អាតអំពីមិត្តភាពដ៏អស្ចារ្យ សាមគ្គីភាពពិសេស និងកិច្ចសហប្រតិបត្តិការដ៏ទូលំទូលាយរវាងប្រទេសទាំងពីរ។

លោកប្រធានរដ្ឋបានបញ្ជាក់ថា វៀតណាមគាំទ្រយ៉ាងមុតមាំ និងទូលំទូលាយចំពោះបុព្វហេតុនៃការច្នៃប្រឌិត ការកសាង និងការអភិវឌ្ឍប្រទេសឡាវ ហើយនឹងធ្វើគ្រប់យ៉ាងដែលអាចធ្វើទៅបាន ដើម្បីបន្តពង្រឹង និងអភិវឌ្ឍចំណងមិត្តភាពដ៏អស្ចារ្យ សាមគ្គីភាពពិសេស និងកិច្ចសហប្រតិបត្តិការដ៏ទូលំទូលាយរវាងប្រទេសទាំងពីរ។ លោកប្រធានរដ្ឋបានសង្កត់ធ្ងន់ថា ក្នុងប៉ុន្មានឆ្នាំថ្មីៗនេះ ស្ថានភាពពិភពលោក និងតំបន់បានផ្លាស់ប្តូរយ៉ាងឆាប់រហ័ស ស្មុគស្មាញ និងមិនអាចទាយទុកជាមុនបាន ដែលមានផលប៉ះពាល់យ៉ាងសំខាន់ទៅលើប្រទេសនានា រួមទាំងឡាវ និងវៀតណាម ប៉ុន្តែក្រោមការដឹកនាំរបស់បក្សទាំងពីរ និងរដ្ឋទាំងពីរ ការអនុវត្តនូវសេចក្តីសម្រេចរបស់មហាសន្និបាតរបស់បក្សនីមួយៗបានបន្តសម្រេចបានលទ្ធផលសំខាន់ៗ។ រាល់ខ្លឹមសារនៃកិច្ចព្រមព្រៀងរវាងបក្សទាំងពីរ និងប្រទេសទាំងពីរត្រូវបានសម្របសម្រួល និងអនុវត្តយ៉ាងសកម្មដោយគ្រប់កម្រិត និងគ្រប់វិស័យនៃភាគីទាំងពីរ ដោយសម្រេចបានលទ្ធផលជាក់ស្តែង រួមចំណែកដល់ការអភិវឌ្ឍប្រទេសនីមួយៗ ពង្រឹងចំណងមិត្តភាពដ៏អស្ចារ្យ សាមគ្គីភាពពិសេស និងកិច្ចសហប្រតិបត្តិការដ៏ទូលំទូលាយរវាងវៀតណាម និងឡាវ ដែលមានការអភិវឌ្ឍកាន់តែស៊ីជម្រៅលើគ្រប់វិស័យ។

លោកស្រី Khamphao Ernthavanh  ឯកអគ្គរដ្ឋទូតឡាវ ប្រចាំនៅវៀតណាម ថ្លែងសុន្ទរកថានៅក្នុងពិធី

ថ្លែងសុន្ទរកថានៅក្នុងពិធីនេះ លោកស្រី Khamphao Ernthavanh ឯកអគ្គរដ្ឋទូតឡាវ ប្រចាំនៅវៀតណាម បានថ្លែងអំណរគុណយ៉ាងស្មោះស្ម័គ្រចំពោះទឹកចិត្តមនោសញ្ចេតនាដ៏ជ្រាលជ្រៅដែលថ្នាក់ដឹកនាំនៃបក្ស រដ្ឋ និងប្រជាជនវៀតណាម ផ្តល់ជូនចំពោះបក្ស រដ្ឋ និងប្រជាជនឡាវ ក៏ដូចជាលោកប្រធានរដ្ឋ កៃសុន ភូមិវិហារ និងទំនាក់ទំនងពិសេសឡាវ-វៀតណាម ដែលបង្ហាញពីភាពស្មោះត្រង់ និងភាពរឹងមាំរវាងប្រជាជនទាំងពីររហូតក្នុងការតស៊ូដើម្បីឯករាជ្យជាតិ ក៏ដូចជារយៈពេល ៥០ ឆ្នាំនៃការកសាងប្រទេសឡាវ។

លោកស្រីឯកអគ្គរដ្ឋទូតបានសង្កត់ធ្ងន់ថា ក្នុងរយៈពេល ៥០ ឆ្នាំកន្លងមកនេះ ទោះបីជាមានការប្រែប្រួលវិវឌ្ឍដ៏ស្មុគស្មាញនៃស្ថានភាពតំបន់ និងពិភពលោកក៏ដោយ ចំណងមិត្តភាពដ៏អស្ចារ្យ សាមគ្គីភាពពិសេស និងកិច្ចសហប្រតិបត្តិការគ្រប់ជ្រុងជ្រោយរវាងឡាវ និងវៀតណាម ដែលបានកសាង និងថែរក្សាដោយលោកប្រធានហូជីមិញ លោកប្រធានកៃសុន ភូមិវិហារ និងលោកប្រធានស៊ូផានុវង្ស ត្រូវបានបន្តលើកកម្ពស់ដោយថ្នាក់ដឹកនាំ បដិវត្តន៍ និងប្រជាជននៃប្រទេសទាំងពីរជំនាន់។ សព្វថ្ងៃនេះ ទំនាក់ទំនងនេះបានក្លាយជាទ្រព្យសម្បត្តិដ៏មានតម្លៃរបស់ប្រទេសទាំងពីរ ជាក្រិតក្រមនៃអត្ថិភាព និងការអភិវឌ្ឍ និងជាកត្តាកំណត់នូវរាល់ជ័យជម្នះទាំងអស់នៃបដិវត្តន៍របស់ប្រទេសនីមួយៗ។ លោកស្រីឯកអគ្គរដ្ឋទូតបានសម្តែងការដឹងគុណយ៉ាងជ្រាលជ្រៅចំពោះជំនួយដ៏ស្មោះស្ម័គ្រ និងមិនគិតពីប្រយោជន៍ផ្ទាល់ខ្លួនរបស់បក្ស រដ្ឋ និងប្រជាជនវៀតណាមចំពោះប្រទេសឡាវ ក្នុងអំឡុងពេលនៃការតស៊ូដើម្បីរំដោះជាតិ ក៏ដូចជាក្នុងការកសាងជាតិបច្ចុប្បន្ន ហើយលោកស្រីបានប្រាថ្នាចង់បន្តថែរក្សា និងលើកកម្ពស់ទំនាក់ទំនងពិសេសឡាវ-វៀតណាម ឱ្យស្រស់បំព្រងជារៀងរហូត៕

បកប្រែដោយ Minh Trung