បន្តបញ្ជាក់ពីឋានៈ និងកិត្យានុភាពលើឆាកអន្តរជាតិរបស់វៀតណាម

លោកស្រី Nguyen Minh Hang អនុរដ្ឋមន្ត្រីក្រសួងការបរទេសវៀតណាម ផ្តល់បទសម្ភាសន៍ដល់សារព័ត៌មានមុនដំណើរបំពេញទស្សនកិច្ចការងាររបស់នាយករដ្ឋមន្ត្រី

អ្នកយកព័ត៌មាន៖ តើលោកស្រីអាចឱ្យដឹងអំពីអត្ថន័យ និងគោលបំណងនៃដំណើរការងារអញ្ជើញចូលរួម WEF Tianjin 2025 របស់លោក Pham Minh Chinh នាយករដ្ឋមន្ត្រីបានទេ?

លោកស្រី Nguyen Minh Hang៖ កិច្ចប្រជុំ WEF Tianjin 2025 គឺជាព្រឹត្តិការណ៍ទ្រង់ទ្រាយធំដ៏សំខាន់របស់ WEF ដែលត្រូវបានចាត់ទុកថាជាវេទិកាសម្រាប់ “អ្នកត្រួសត្រាយ” សំដៅវាយតម្លៃ និងពិភាក្សាអំពីនិន្នាការថ្មី បញ្ហាសំខាន់ៗដែលកំពុងប្រឈមមុខនឹងសេដ្ឋកិច្ចពិភពលោក ជំរុញកិច្ចសហប្រតិបត្តិការអន្តរជាតិ ជាពិសេសកិច្ចសហប្រតិបត្តិការសាធារណៈនិងឯកជន រួមចំណែកដល់កំណើនសេដ្ឋកិច្ច និងការអភិវឌ្ឍប្រកបដោយចីរភាព។ ដំណើរបំពេញការងាររបស់លោក Pham Minh Chinh នាយករដ្ឋមន្ត្រី អញ្ជើញចូលរួមកិច្ចប្រជុំ WEF Tianjin 2025 ពិតជាមានអត្ថន័យណាស់។ នេះជាឆ្នាំទី៣ជាប់ៗគ្នាហើយដែលវៀតណាមត្រូវបានប្រទេសម្ចាស់ផ្ទះចិននិង WEF អញ្ជើញឱ្យចូលរួមវេទិកា “អ្នកត្រួសត្រាយ”។ ប្រការនេះបានបញ្ជាក់ពីការឱ្យតម្លៃរបស់ចិនចំពោះភាពជាដៃគូសហប្រតិបត្តិការយុទ្ធសាស្ត្រលើគ្រប់វិស័យរវាងវៀតណាម-ចិន ការវាយតម្លៃខ្ពស់ពីសហគមន៍អន្តរជាតិចំពោះរាល់សមិទ្ធផលអភិវឌ្ឍន៍របស់វៀតណាម និងទិសដៅអភិវឌ្ឍន៍យុទ្ធសាស្ត្រក៏ដូចជាសក្តានុពល ឋានៈ និងកិត្យានុភាពរបស់វៀតណាម។

ដោយមានអត្ថន័យនោះ ការអញ្ជើញចូលរួមរបស់លោកនាយករដ្ឋមន្ត្រីនៅកិច្ចប្រជុំ WEF Tianjin 2025 បង្ហាញពីការផ្តល់តម្លៃ និងការគាំទ្រដ៏រឹងមាំរបស់វៀតណាម ចំពោះប្រទេសម្ចាស់ផ្ទះចិន ដោយហេតុនេះ រួមចំណែកក្នុងការបន្តជំរុញសន្ទុះអភិវឌ្ឍដ៏ល្អប្រសើរនៃទំនាក់ទំនងភាពដៃគូសហប្រតិបត្តិការយុទ្ធសាស្ត្រលើគ្រប់ជ្រុងជ្រោយ កសាងសហគមន៍ទំនាក់ទំនងវៀតណាម - ចិន ប្រកបដោយអត្ថន័យយុទ្ធសាស្ត្រនាពេលអនាគត។ នេះជាឱកាសសំខាន់មួយសម្រាប់វៀតណាមបន្តចូលរួមយ៉ាងសកម្ម រួមវិភាគទាន និងជំរុញដំណោះស្រាយចំពោះបញ្ហាសេដ្ឋកិច្ច និងការអភិវឌ្ឍក្នុងតំបន់ និងពិភពលោក ដោយហេតុនេះបន្តអះអាងនូវគោលជំហរ និងកិត្យានុភាពអន្តរជាតិរបស់វៀតណាម។ ប្រការនេះបញ្ជូនសារទៅកាន់សហគមន៍អន្តរជាតិអំពីគោលដៅ ចក្ខុវិស័យ និងទិសដៅអភិវឌ្ឍន៍របស់វៀតណាម ជាពិសេសគោលនយោបាយធំៗរបស់វៀតណាម ដើម្បីឈានចូលយុគសម័យថ្មីនៃការអភិវឌ្ឍ។ លោកនាយករដ្ឋមន្ត្រីវៀតណាមក៏នឹងមានកិច្ចប្រជុំ និងកិច្ចសន្ទនាជាច្រើនជាមួយថ្នាក់ដឹកនាំប្រទេស អង្គការអន្តរជាតិ និងសាជីវកម្មឈានមុខគេដើម្បីជំរុញកិច្ចសហប្រតិបត្តិការសេដ្ឋកិច្ច ពង្រីក និងធ្វើពិពិធកម្មទីផ្សារនាំចេញ ទាក់ទាញការវិនិយោគ ជំរុញកិច្ចសហប្រតិបត្តិការលើវិស័យយុទ្ធសាស្ត្រថ្មី និងបង្កើនធនធានជាអតិបរមា ដើម្បីបម្រើដល់ការអនុវត្តកំណើន និងគោលដៅអភិវឌ្ឍន៍ជាតិ។

អ្នកយកព័ត៌មាន៖ តើអ្វីជាសារៈសំខាន់ គោលបំណង និងការរំពឹងទុកសម្រាប់ទំនាក់ទំនងវៀតណាម-ចិន ក្នុងដំណើរទស្សនកិច្ចការងាររបស់លោក Pham Minh Chinh នាយករដ្ឋមន្ត្រីទៅកាន់ប្រទេសចិននៅពេលនេះបានទេ?

លោកស្រី Nguyen Minh Hang៖ ដំណើរទស្សនកិច្ចការងាររបស់លោកនាយករដ្ឋមន្ត្រីបន្តអះអាងថា បក្ស រដ្ឋាភិបាល និងប្រជាជនវៀតណាមជានិច្ចកាលយកចិត្តទុកដាក់ និងផ្តល់អាទិភាពកំពូលក្នុងការកសាង និងអភិវឌ្ឍទំនាក់ទំនងល្អជាមួយបក្ស រដ្ឋាភិបាល និងប្រជាជនចិន ដើម្បីផលប្រយោជន៍ជាមូលដ្ឋាន និងយូរអង្វែងរបស់ប្រជាជននៃប្រទេសទាំងពីរ ដើម្បីសន្តិភាព កិច្ចសហប្រតិបត្តិការ និងការអភិវឌ្ឍលើពិភពលោក និងតំបន់។ ដំណើរទស្សនកិច្ចការងារនេះនឹងជំរុញការអនុវត្តប្រកបដោយប្រសិទ្ធភាព និងជាក់ស្តែងនៃកិច្ចព្រមព្រៀងកម្រិតខ្ពស់ដែលសម្រេចបាននាពេលកន្លងមក ជាពិសេសដំណើរទស្សនកិច្ចផ្លូវរដ្ឋទៅកាន់ប្រទេសចិនរបស់លោក To Lam អគ្គលេខាបក្ស និងប្រធានរដ្ឋ (ខែសីហា ឆ្នាំ ២០២៤) និងដំណើរទស្សនកិច្ចផ្លូវរដ្ឋនៅវៀតណាមរបស់លោក Xi Jinping អគ្គលេខាបក្ស និងជាប្រធានរដ្ឋចិន (ខែមេសា ឆ្នាំ២០២៥)។

ថ្នាក់ដឹកនាំជាន់ខ្ពស់របស់ភាគីទាំងពីរនឹងពិភាក្សាអំពីវិធានការសំខាន់ៗ ដើម្បីជំរុញការអភិវឌ្ឍថ្មីក្នុងវិស័យសហប្រតិបត្តិការយុទ្ធសាស្ត្រ ដូចជាវិទ្យាសាស្ត្រ និងបច្ចេកវិទ្យា នវានុវត្តន៍ ហេដ្ឋារចនាសម្ព័ន្ធយុទ្ធសាស្ត្រ ការតភ្ជាប់ផ្លូវដែក ហិរញ្ញវត្ថុ និងរូបិយវត្ថុ ការកែលម្អគុណភាព និងប្រសិទ្ធភាពនៃកិច្ចសហប្រតិបត្តិការពាណិជ្ជកម្ម និងវិនិយោគ កិច្ចសហប្រតិបត្តិការសេដ្ឋកិច្ចតាមព្រំដែន ផលិតផលកសិកម្ម បរិស្ថានទីក្រុង ទេសចរណ៍ និងការបណ្តុះបណ្តាលធនធានមនុស្សប្រកបដោយគុណភាពខ្ពស់។ ក្នុងឱកាសនេះ ភាគីទាំងពីរក៏នឹងពិភាក្សាអំពីវិធានការគ្រប់គ្រង និងដោះស្រាយការខ្វែងគំនិតគ្នាកាន់តែប្រសើរឡើងនៅសមុទ្រ រួមចំណែករក្សាសន្តិភាព ស្ថិរភាព និងកិច្ចសហប្រតិបត្តិការក្នុងតំបន់។

ខ្ញុំជឿជាក់ថា ដំណើរទស្សនកិច្ចការងារទ្វេភាគីរបស់លោក Pham Minh Chinh នាយករដ្ឋមន្ត្រីទៅកាន់ប្រទេសចិនលើកនេះ នឹងបន្តបង្កើតកម្លាំងចលករដ៏រឹងមាំសម្រាប់កិច្ចសហប្រតិបត្តិការទ្វេភាគី ដោយហេតុនេះនាំទំនាក់ទំនងដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយ និងសហគមន៍ចែករំលែកអនាគតវៀតណាម-ចិន ដែលមានសារៈសំខាន់ជាយុទ្ធសាស្ត្រ ដើម្បីបន្តអភិវឌ្ឍប្រកបដោយស្ថិរភាព សុខភាពល្អ និងនិរន្តរភាព។

អ្នកយកព័ត៌មាន៖ សូមអរគុណលោកស្រីអនុរដ្ឋមន្ត្រី!

បកប្រែដោយ Minh Trung