លោក Pham Minh Chinh នាយករដ្ឋមន្ត្រីវៀតណាមផ្តួចផ្តើមគំនិត “ត្រួសត្រាយផ្លូវចំនួន ៣” ក្នុងកិច្ចប្រជុំកំពូល BRICS បើកទូលាយ
កប.អនឡាញ - នារសៀលថ្ងៃទី ៦ ខែកក្កដា តាមម៉ោងក្នុងតំបន់ នៅទីក្រុង Rio de Janeiro ប្រទេសប្រេស៊ីល លោក Pham Minh Chinh នាយករដ្ឋមន្ត្រីវៀតណាម បានអញ្ជើញចូលរួមកិច្ចប្រជុំកំពូល BRICS 2025 បើកទូលាយ និងបានមានសុន្ទរកថាសំខាន់ៗនៅកិច្ចពិភាក្សាកម្រិតខ្ពស់ស្តីពី "ការពង្រឹងពហុភាគីនិយម បញ្ហាសេដ្ឋកិច្ច-ហិរញ្ញវត្ថុ និងបញ្ញាសិប្បនិមិត្ត"។
កិច្ចពិភាក្សានេះត្រូវបានដឹកនាំដោយប្រធានាធិបតីប្រទេសម្ចាស់ផ្ទះ Lula da Silva - ប្រធាន BRICS ២០២៥ ដោយមានការចូលរួមពីមេដឹកនាំចំនួន ៣៥ រូប និងតំណាងប្រទេសសមាជិក ប្រទេសដៃគូ និងភ្ញៀវ BRICS រួមជាមួយនឹងថ្នាក់ដឹកនាំនៃអង្គការអន្តរជាតិដូចជា៖ អង្គការសហប្រជាជាតិ (UN) អង្គការពាណិជ្ជកម្មពិភពលោក (WTO) អង្គការសុខភាពពិភពលោក (WHO) ស្ថាប័នហិរញ្ញវត្ថុអភិវឌ្ឍន៍អន្តរជាតិ និងតំបន់។
    |
 |
|
លោក Pham Minh Chinh នាយករដ្ឋមន្ត្រីវៀតណាម អញ្ជើញចូលរួមកិច្ចប្រជុំកំពូល BRICS 2025 បើកទូលាយ |
ថ្លែងសុន្ទរកថាក្នុងកិច្ចប្រជុំ លោក Pham Minh Chinh នាយករដ្ឋមន្ត្រីបានចាត់ទុកថា ក្នុងបរិបទពិភពលោកកំពុងមានការផ្លាស់ប្តូរជាច្រើន ដោយការជឿទុកចិត្តលើស្ថាប័នពិភពលោកត្រូវបានរងការសឹករិចរិល ការជឿទុកចិត្តលើកិច្ចសហប្រតិបត្តិការពហុភាគីត្រូវបានថមថយ ហើយការជឿទុកចិត្តលើច្បាប់អន្តរជាតិត្រូវបានរង្គោះរង្គើ ប្រទេសនានាត្រូវបន្តជំរុញសាមគ្គីភាព ពង្រឹងកិច្ចសហប្រតិបត្តិការ និងកិច្ចសន្ទនាដើម្បីដោះស្រាយរាល់បញ្ហាប្រឈមជាមួយនឹងវិធីសាស្រ្តសកល និងគ្រប់ជ្រុងជ្រោយ។ ក្នុងស្មារតីនោះ លោកនាយករដ្ឋមន្ត្រីវៀតណាម បានលើកឡើងនូវគំនិតខាន់ៗ និងជាក់ស្តែងចំនួនបីដូចខាងក្រោម៖
ទីមួយ បណ្តាប្រទេស BRICS និងប្រទេសទិសខាងត្បូងគប្បីតែនាំមុខគេក្នុងការស្តារឡើងវិញនូវកិច្ចសហប្រតិបត្តិការពហុភាគី ដោយបន្តចូលរួមកិច្ចសន្ទនា និងកិច្ចសហប្រតិបត្តិការដោយឈរលើគោលការណ៍ជាមូលដ្ឋាននៃធម្មនុញ្ញអង្គការសហប្រជាជាតិ និងច្បាប់អន្តរជាតិ។ BRICS គួរតែចូលរួមយ៉ាងសកម្មក្នុងការជំរុញការធ្វើកំណែទម្រង់ស្ថាប័នពិភពលោក ដូចជាអង្គការសហប្រជាជាតិ មូលនិធិរូបិយវត្ថុអន្តរជាតិ (IMF) ធនាគារពិភពលោក (WB) និង WTO តាមទិសដៅដែលបំពេញតម្រូវការជាក់ស្តែង និងតម្រូវការរបស់ប្រទេសកំពុងអភិវឌ្ឍ ពង្រឹងកិច្ចសហប្រតិបត្តិការទិសខាងត្បូង-ខាងត្បូង លើកកម្ពស់ការតភ្ជាប់ ការកសាងទំនុកចិត្ត និងកិច្ចសហប្រតិបត្តិការរវាងប្រទេសអភិវឌ្ឍ និងប្រទេសកំពុងអភិវឌ្ឍ។
ទីពីរ ត្រួសត្រាយផ្លូវក្នុងការលើកកម្ពស់សេរីភាវូបនីយកម្មពាណិជ្ជកម្ម គោរពសិទ្ធិ និងផលប្រយោជន៍ស្របច្បាប់នៃប្រទេសនានា។ ដើម្បីបង្កើនស្វ័យភាពជាយុទ្ធសាស្ត្រ BRICS និងបណ្តាប្រទេសភាគខាងត្បូងត្រូវបង្កើនការបើកទីផ្សារ ជំរុញការតភ្ជាប់ខ្សែសង្វាក់ផ្គត់ផ្គង់ ប្រមូល និងចែករំលែកធនធាន គាំទ្រការផ្ទេរបច្ចេកវិទ្យា និងការបណ្តុះបណ្តាលធនធានមនុស្សសម្រាប់គម្រោងក្នុងការថែទាំសុខភាព ការអប់រំ ហេដ្ឋារចនាសម្ព័ន្ធឌីជីថល ការផ្លាស់ប្តូរបៃតង និងការបន្សាំបម្រែបម្រួលអាកាសធាតុ។
ទីបី ត្រួសត្រាយផ្លូវក្នុងការលើកកម្ពស់កម្លាំងនៃបញ្ញាសិប្បនិមិត្ត (AI) ដើម្បីបម្រើមនុស្ស មិនមែនជំនួសមនុស្សនោះទេ។ BRICS គប្បីតែធ្វើការជាមួយយន្តការពហុភាគី ដើម្បីលើកកម្ពស់ការកសាងប្រព័ន្ធអភិបាលកិច្ច AI សកលប្រកបដោយយុត្តិធម៌ សុវត្ថិភាព និងងាយប្រើបាន។ កសាងប្រព័ន្ធអេកូឡូស៊ី AI ដែលប្រកាន់ខ្ជាប់នូវតម្លៃសីលធម៌ តុល្យភាពការច្នៃប្រឌិត និងផលប្រយោជន៍សង្គម ...
សុន្ទរកថារបស់លោក Pham Minh Chinh នាយករដ្ឋមន្ត្រីវៀតណាម បានបញ្ជូនសារដ៏ជ្រាលជ្រៅអំពីការពង្រឹងកិច្ចសហប្រតិបត្តិការពហុភាគី លើកកំពស់តួនាទីរបស់ប្រទេសកំពុងអភិវឌ្ឍក្នុងប្រព័ន្ធអភិបាលកិច្ចពិភពលោក បញ្ជាក់ពីការប្តេជ្ញាចិត្តរបស់វៀតណាម និងការរួមចំណែកយ៉ាងសកម្ម និងការទទួលខុសត្រូវចំពោះកិច្ចខិតខំប្រឹងប្រែងរួមរបស់សហគមន៍អន្តរជាតិ៕
បកប្រែដោយ Minh Trung