វៀតណាមតែងតែយកចិត្តទុកដាក់ និងផ្តល់អាទិភាពខ្ពស់បំផុតចំពោះទំនាក់ទំនងមិត្តភាពជាមួយឡាវ

នាព្រឹកថ្ងៃដដែល នៅវិមាននាយករដ្ឋមន្រ្តីនៃសាធារណរដ្ឋប្រជាធិបតេយ្យប្រជាមានិតឡាវ នៅទីក្រុងវៀងចន្ទន៍ លោក Sonexay Siphandone នាយករដ្ឋមន្ត្រីឡាវ បានរៀបចំពិធីទទួលស្វាគមន៍ជាផ្លូវការជូនចំពោះលោក Pham Minh Chinh នាយករដ្ឋមន្ត្រី និងគណៈប្រតិភូជាន់ខ្ពស់វៀតណាម បន្ទាប់ពីពិធីទទួលស្វាគមន៍ នាយករដ្ឋមន្ត្រីទាំងពីរបានជួបពិភាក្សាគ្នា។

លោក Sonexay Siphandone នាយករដ្ឋមន្ត្រីឡាវ ទទួលបដិសណ្ឋារកិច្ចលោក Pham Minh Chinh នាយករដ្ឋមន្ត្រីវៀតណាម

ទំនាក់ទំនងនយោបាយដែលមានទំនុកចិត្តពិសេស និងរឹងមាំជានិច្ចរវាងប្រទេសទាំងពីរ

នៅក្នុងជំនួបពិភាក្សានោះ នាយករដ្ឋមន្ត្រីទាំងពីរបានបន្តអះអាងនូវគោលនយោបាយដោយមិនងាករេរបស់បក្ស និងប្រទេសទាំងពីរតែងតែយកចិត្តទុកដាក់ និងផ្តល់អាទិភាពខ្ពស់បំផុតក្នុងការពង្រឹង និងពង្រីកទំនាក់ទំនងមិត្តភាពដ៏ធំធេង សាមគ្គីភាពពិសេស និងកិច្ចសហប្រតិបត្តិការលើគ្រប់វិស័យរវាងវៀតណាម និងឡាវ។ ភាគីទាំងពីរបានផ្លាស់ប្តូរគណៈប្រតិភូជាច្រើននៅគ្រប់កម្រិត និងបណ្តាញ; បន្តលើកកម្ពស់ប្រសិទ្ធភាពនៃយន្តការសហប្រតិបត្តិការទ្វេភាគី; រៀបចំដោយជោគជ័យនូវសកម្មភាពជាច្រើនដ៏មានអត្ថន័យក្នុង “ឆ្នាំសាមគ្គីភាព និងមិត្តភាពវៀតណាម - ឡាវ ឆ្នាំ២០២២” នៅប្រទេសទាំងពីរ។ ជាពិសេស កិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគត្រូវបានពង្រឹង និងលើកកម្ពស់ក្នុងទិសដៅត្រឹមត្រូវ។ ទំហំពាណិជ្ជកម្មគឺជាចំណុចភ្លឺជាមួយនឹងចំណូលទ្វេភាគីសរុបក្នុងឆ្នាំ ២០២២ ឈានដល់ជិត ១.៧ ពាន់លានដុល្លារ កើនឡើងជាង ២១% បើធៀបនឹងឆ្នាំ ២០២១ ដែលលើសពីគោលដៅដែលបានកំណត់ (កំណើន ១០-១៥%)។

អំពីទិសដៅនៃកិច្ចសហប្រតិបត្តិការនាពេលខាងមុខ ភាគីទាំងពីរបានឯកភាពនឹងខិតខំប្រឹងប្រែងអនុវត្តកិច្ចព្រមព្រៀងយុទ្ធសាស្ត្រសហប្រតិបត្តិការវៀតណាម-ឡាវ ដំណាក់កាល ២០២១-២០៣០ កិច្ចព្រមព្រៀងសហប្រតិបត្តិការទ្វេភាគីវៀតណាម-ឡាវ ២០២១-២០២៣  និងកិច្ចព្រមព្រៀងផ្សេងៗទៀត ភាគីទាំងពីរបានឯកភាពបន្តរក្សាស្ថិរភាពកំណើនពាណិជ្ជកម្ម ១០-១៥% ក្នុងមួយឆ្នាំ ឬច្រើនជាងនេះ; បន្តពង្រីកកិច្ចសហប្រតិបត្តិការវិនិយោគ ដែលក្នុងនោះត្រូវយកចិត្តទុកដាក់លើការជំរុញការវិនិយោគលើគម្រោងនានាក្នុងខេត្តជាប់ព្រំដែន;  បន្តលើកកម្ពស់ប្រសិទ្ធភាពនៃកិច្ចសហប្រតិបត្តិការលើវិស័យយុត្តិធម៌ វិទ្យាសាស្ត្រ-បច្ចេកវិទ្យា វប្បធម៌ ទេសចរណ៍ ការផ្លាស់ប្តូរប្រជាជន និងកិច្ចសហប្រតិបត្តិការរវាងមូលដ្ឋាន ជាពិសេសខេត្តជាប់ព្រំដែន។ ភាគីទាំងពីរក៏បានឯកភាពបន្តជំរុញកិច្ចសហប្រតិបត្តិការលើវិស័យព័ត៌មាន និងទូរគមនាគមន៍ ដោយយកចិត្តទុកដាក់លើការផ្សព្វផ្សាយ និងអប់រំយុវជនជំនាន់ក្រោយនៃប្រទេសទាំងពីរអំពីប្រពៃណីទំនាក់ទំនងពិសេសរវាងវៀតណាម និងឡាវ។

ពិភាក្សាអំពីបញ្ហាក្នុងតំបន់និងអន្តរជាតិដែលមានការយកចិត្តទុកដាក់ដូចគ្នាទៅវិញទៅមក ភាគីទាំងពីរបានឯកភាពបន្តសម្របសម្រួលយ៉ាងជិតស្និទ្ធ បង្កើនការផ្លាស់ប្តូរព័ត៌មាន និងគាំទ្រគ្នាទៅវិញទៅមកនៅវេទិកាពហុភាគីក្នុងតំបន់ និងអន្តរជាតិជាពិសេសនៅអង្គការសហប្រជាជាតិ អាស៊ាននិងយន្តការសហប្រតិបត្តិការអនុតំបន់។ រួមជាមួយបណ្តាប្រទេសអាស៊ានខិតខំរក្សាឯកភាព និងតួនាទីមជ្ឈភាពរបស់អាស៊ានសម្របសម្រួលរក្សាជំហររួមរបស់អាស៊ានលើបញ្ហាយុទ្ធសាស្ត្រ រួមទាំងបញ្ហាសមុទ្រខាងកើតផងដែរ។ វៀតណាមបានត្រៀមខ្លួនរួចជាស្រេចដើម្បីគាំទ្រប្រទេសឡាវទទួលជោគជ័យនូវរាល់ការទទួលខុសត្រូវអន្តរជាតិនាពេលខាងមុខ រួមទាំងតួនាទីជាប្រធានអាស៊ាន/AIPA ក្នុងឆ្នាំ២០២៤។

លោក Pham Minh Chinh អញ្ជើញចូលជួបសម្តែងការគួរសមជាមួយលោក Thongloun Sisoulith អគ្គលេខាបក្ស និងជាប្រធានរដ្ឋឡាវ

ទ្រព្យសម្បត្តិដែលមិនអាចកាត់ថ្លៃបាន

នារសៀលថ្ងៃដដែល នៅទីក្រុងវៀងចន្ទន៍ លោក Pham Minh Chinh បានអញ្ជើញជួបសម្តែងការគួរសមជាមួយលោក Thongloun Sisoulith អគ្គលេខាបក្ស និងជាប្រធានរដ្ឋឡាវ

លោក Thongloun Sisoulith អគ្គលេខាបក្ស និងជាប្រធានរដ្ឋ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រដ្ឋាភិបាលនៃ​ប្រទេសទាំងពីរក្នុងការបន្តធ្វើឱ្យទំនាក់ទំនងកិច្ចសហប្រតិបត្តិការរវាងប្រទេសទាំងពីរកាន់តែស៊ីជម្រៅ និងសម្រេចបានលទ្ធផលជាក់ស្តែង។ លោកជឿជាក់ថា លទ្ធផលសំខាន់ៗដែលសម្រេចបានក្នុងដំណើរទស្សនកិច្ចរបស់លោក Pham Minh Chinh នាយករដ្ឋមន្ត្រីវៀតណាមនៅប្រទេសឡាវនឹងរួមចំណែកជាវិជ្ជមានដល់ការអនុវត្តប្រកបដោយជោគជ័យនូវយុទ្ធសាស្ត្រសហប្រតិបត្តិការវៀតណាម-ឡាវ ដំណាក់កាល ២០២១-២០៣០ កិច្ចព្រមព្រៀងស្តីពីកិច្ចសហប្រតិបត្តិការទ្វេភាគី រវាងវៀតណាម និងឡាវក្នុងដំណាក់កាល ២០២១-២០២៥ និងកិច្ចព្រមព្រៀងសហប្រតិបត្តិការរវាងរដ្ឋាភិបាលទាំងពីរ។

លោក Pham Minh Chinh បានអះអាងថា វៀតណាមជានិច្ចកាលយកចិត្តទុកដាក់ និងផ្តល់អាទិភាពខ្ពស់បំផុតចំពោះទំនាក់ទំនងមិត្តភាពដ៏អស្ចារ្យ សាមគ្គីភាពពិសេស និងកិច្ចសហប្រតិបត្តិការលើគ្រប់វិស័យរវាងវៀតណាម និងឡាវ។

ភាគីទាំងពីរបានឯកភាពសម្របសម្រួលឱ្យបានល្អក្នុងការអនុវត្តកិច្ចព្រមព្រៀងកម្រិតខ្ពស់; បន្តលើកកម្ពស់ប្រពៃណីនៃកិច្ចសហប្រតិបត្តិការជិតស្និទ្ធ និងទំនុកចិត្តរវាងប្រទេសទាំងពីរក្នុងវិស័យនយោបាយ ការពារជាតិ និងសន្តិសុខ។ សម្របសម្រួលយ៉ាងជិតស្និទ្ធ និងជំរុញការអនុវត្តប្រកបដោយប្រសិទ្ធភាពនៃកិច្ចព្រមព្រៀងកម្រិតខ្ពស់; កែលម្អឥតឈប់ឈរនូវគុណភាព និងប្រសិទ្ធភាពនៃកិច្ចសហប្រតិបត្តិការរវាងគណៈកម្មាធិការបក្ស ក្រសួង និងគ្រប់ស្ថាប័ននៃប្រទេសទាំងពីរ។

លោកអគ្គលេខាបក្ស និងជាប្រធានរដ្ឋឡាវ ក៏បានឯកភាពថា ភាគីទាំងពីរនឹងជំរុញយ៉ាងសកម្មនូវលទ្ធផលនៃ “ឆ្នាំសាមគ្គីភាព និងមិត្តភាពវៀតណាម - ឡាវ ឡាវ - វៀតណាម ឆ្នាំ ២០២២” ដើម្បីបន្តជំរុញការឃោសនាអំពីប្រពៃណីនៃទំនាក់ទំនងពិសេសវៀតណាម និងឡាវ ជាពិសេសសម្រាប់ជំនាន់វ័យក្មេងនៃប្រទេសទាំងពីរ។

លោក Pham Minh Chinh នាយករដ្ឋមន្ត្រីវៀតណាម អញ្ជើញចូលជួបពិភាក្សាការងារជាមួយលោក Saysomphone Phomvihane ប្រធានរដ្ឋសភាឡាវ

រឹតបន្តឹងទំនាក់ទំនងកិច្ចសហប្រតិបត្តិការជិតស្និទ្ធរវាងរដ្ឋសភានៃប្រទេសទាំងពីរ

នារសៀលថ្ងៃទី១១ ខែមករា នៅវិមានរដ្ឋសភាឡាវ លោក Pham Minh Chinh នាយករដ្ឋមន្ត្រីវៀតណាម បានចូលជួបពិភាក្សាការងារជាមួយលោក Saysomphone Phomvihane ប្រធានរដ្ឋសភាឡាវ ។

ថ្នាក់ដឹកនាំទាំងពីរបានអះអាងថា ជានិច្ចកាលយកចិត្តទុកដាក់ និងផ្តល់អាទិភាពខ្ពស់បំផុតក្នុងការបង្រួបបង្រួម និងពង្រឹងទំនាក់ទំនងមិត្តភាព សាមគ្គីភាពពិសេស និងកិច្ចសហប្រតិបត្តិការលើគ្រប់វិស័យរវាងវៀតណាម និងឡាវ។ យើងមានសេចក្តីសោមនស្សរីករាយដែលឃើញថា ទោះបីជាមានការរីករាលដាលនៃមេរោគ Covid-19 ក៏ដោយក៏ទំនាក់ទំនងកិច្ចសហប្រតិបត្តិការទ្វេភាគី បានបន្តរក្សាបាននូវសន្ទុះនៃការអភិវឌ្ឍរបស់ខ្លួនលើគ្រប់វិស័យ ក្នុងនោះស្ថាប័ននីតិប្បញ្ញត្តិនៃប្រទេសទាំងពីរបន្តរក្សានូវការរៀបចំកិច្ចប្រជុំរបស់ប្រទេសទាំងពីរ និងការគាំទ្រគ្នាទៅវិញទៅមកនៅក្នុងវេទិកាសភាតំបន់ និងអន្តរជាតិ។

ប្រធានរដ្ឋសភាឡាវបានវាយតំលៃខ្ពស់ចំពោះលទ្ធផលល្អនៃដំណើរទស្សនកិច្ចជាផ្លូវការនៅប្រទេសឡាវក្នុងខែឧសភា ឆ្នាំ ២០២២ របស់លោក Vuong Dinh Hue ប្រធានរដ្ឋសភាវៀតណាម; បានសម្តែងនូវគោលបំណងចង់រឹតបន្តឹងជានិច្ចនូវទំនាក់ទំនងកិច្ចសហប្រតិបត្តិការជិតស្និទ្ធរវាងរដ្ឋសភានៃប្រទេសទាំងពីរ រួមទាំងការសម្របសម្រួលប្រកបដោយប្រសិទ្ធភាព និងការអនុវត្តសកម្មភាពត្រួតពិនិត្យរួម ដើម្បីរួមចំណែកអនុវត្តប្រកបដោយប្រសិទ្ធភាពនូវកិច្ចព្រមព្រៀងសហប្រតិបត្តិការ និងកិច្ចព្រមព្រៀងកម្រិតខ្ពស់រវាងប្រទេសទាំងពីរ; បន្តពង្រឹងការផ្លាស់ប្តូរ និងការចែករំលែកបទពិសោធន៍វិជ្ជាជីវៈ; រៀបចំសន្និសីទ សិក្ខាសាលា និងសិក្ខាសាលា ដើម្បីផ្លាស់ប្តូរបទពិសោធន៍; បន្តសម្របសម្រួល និងគាំទ្រគ្នាទៅវិញទៅមកយ៉ាងជិតស្និទ្ធនៅវេទិកាសភាតំបន់ និងអន្តរជាតិដូចជា៖ IPU, AIPA, APPF, APF... ប្រធានរដ្ឋសភាឡាវបានថ្លែងអំណរគុណវៀតណាមចំពោះការគាំទ្រ និងជំនួយដ៏ធំធេងសម្រាប់ឡាវក្នុងប៉ុន្មានឆ្នាំថ្មីៗនេះ រួមទាំងការសាងសង់អគាររដ្ឋសភាឡាវ; ព្រមទាំងសង្កត់ធ្ងន់ថា គាំទ្រជានិច្ចក្នុងការពង្រឹង និងធ្វើឱ្យស៊ីជម្រៅនូវទំនាក់ទំនងមិត្តភាពដ៏អស្ចារ្យ សាមគ្គីភាពពិសេស និងកិច្ចសហប្រតិបត្តិការលើគ្រប់វិស័យរវាងវៀតណាម និងឡាវ៕

បកប្រែដោយ Minh Trung