វៀតណាមចូលរួមចំណែកយ៉ាងសកម្មក្នុងសន្និសីទអន្តរជាតិស្តីពីសន្ធិសញ្ញាមិនរីកសាយភាយអាវុធនុយក្លេអ៊ែរ

សន្និសីទអន្តរជាតិស្តីពីសន្ធិសញ្ញាមិនរីកសាយភាយអាវុធនុយក្លេអ៊ែរ (NPT) ត្រូវបានប្រារព្ធឡើងនៅទីក្រុងវីយែន ប្រទេសអូទ្រីស ដោយមានការចូលរួមពីតំណាងជាច្រើនមកពីប្រទេសផ្សេងៗគ្នា រួមទាំងវៀតណាម អង្គការអន្តរជាតិ និងអ្នកជំនាញផងដែរ។ ព្រឹត្តិការណ៍នេះត្រូវបានរៀបចំរួមគ្នាដោយស្ថានបេសកម្មអចិន្ត្រៃយ៍មកពីប្រទេសអូទ្រីស កាហ្សាក់ស្ថាន និងស្វីស ដើម្បីផ្លាស់ប្តូរទស្សនៈ និងរៀបចំសម្រាប់សន្និសីទពិនិត្យឡើងវិញ NPT លើកទី ១១ ដែលគ្រោងធ្វើនៅចុងខែមេសា ឆ្នាំ ២០២៦ នៅទីក្រុងញូវយ៉ក សហរដ្ឋអាមេរិក។

លោក Vu Le Thai Hoang ឯកអគ្គរដ្ឋទូតវៀតណាមប្រចាំប្រទេសអូទ្រីស បានថ្លែង នៅក្នុងសន្និសីទ។ រូបថត៖ VOV-Praha

ថ្លែងនៅក្នុងសន្និសីទ លោក Vu Le Thai Hoang ឯកអគ្គរដ្ឋទូតវៀតណាមប្រចាំប្រទេសអូទ្រីស បានសង្កត់ធ្ងន់លើសារៈសំខាន់នៃការធានាតុល្យភាពរវាងសសរស្តម្ភទាំងបីនៃសន្ធិសញ្ញា រួមទាំងការរំសាយអាវុធ ការមិនរីកសាយភាយអាវុធ និងការប្រើប្រាស់ថាមពលនុយក្លេអ៊ែរដោយសន្តិវិធី។ លោកបានសង្កត់ធ្ងន់ថា គោលការណ៍នៃការឯកភាពគ្នាគឺជាមូលដ្ឋានគ្រឹះដ៏សំខាន់សម្រាប់ធានាបាននូវភាពស្របច្បាប់ និងប្រសិទ្ធភាពនៃសន្និសីទ។ ហើយបានអំពាវនាវដល់ប្រទេសនានាឱ្យបង្ហាញពីភាពបត់បែន និងស្មារតីស្ថាបនាដើម្បីសម្រេចបានលទ្ធផលជាក់ស្តែង។ លោកឯកអគ្គរដ្ឋទូតក៏បានស្នើឱ្យបង្កើនប្រសិទ្ធភាពនៃដំណើរការពិនិត្យឡើងវិញ ការកែលម្អវិធីសាស្រ្តធ្វើការ និងបង្កើនការទទួលខុសត្រូវក្នុងការអនុវត្តការប្តេជ្ញាចិត្ត។

លោកឯកអគ្គរដ្ឋទូត Vu Le Thai Hoang បានជំរុញឱ្យប្រទេសចូលរួមសន្និសីទដោយស្មារតីបើកចំហ ភាពបត់បែន និងស្មារតីស្ថាបនា (រូបថត៖ VOV-Praha)

ជាពិសេស ក្នុងឋានៈជាប្រធានកិច្ចប្រជុំពិនិត្យឡើងវិញនៃ NPT លើកទី ១១ លោកឯកអគ្គរដ្ឋទូត Vu Le Thai Hoang បានបញ្ជាក់ពីការត្រៀមខ្លួនរបស់វៀតណាមក្នុងកិច្ចសហប្រតិបត្តិការយ៉ាងជិតស្និទ្ធជាមួយប្រទេសជាសមាជិកទាំងអស់ ដើម្បីលើកកម្ពស់ដំណើរការពិគ្រោះយោបល់ដ៏ទូលំទូលាយ មានតម្លាភាព និងបរិយាប័ន្ន ដោយមានគោលបំណងទទួលបានលទ្ធផលវិជ្ជមាន និងរួមចំណែកដល់ការពង្រឹងតួនាទីរបស់ NPT ក្នុងសន្តិភាព និងសន្តិសុខអន្តរជាតិបន្ថែមទៀត។

បកប្រែដោយ Duy Hoan