បង្កើតលក្ខខណ្ឌអំណោយផលសម្រាប់អាជីវកម្មបរទេសវិនិយោគនៅវៀតណាម

នៅក្នុងជំនួប លោក Pham Minh Chinh នាយករដ្ឋមន្ត្រីបានស្វាគមន៍ចំពោះបំណងចង់បណ្តាក់ទុនវិនិយោគនៅវៀតណាមរបស់ SYRE និងលោកបានតម្រូវឱ្យក្រសួង ស្ថាប័ន និងមូលដ្ឋានពាក់ព័ន្ធសម្របសម្រួលយ៉ាងជិតស្និទ្ធជាមួយសាជីវកម្មលើរាល់ការងារជាក់លាក់។

លោកនាយករដ្ឋមន្ត្រីបានអះអាងថា វៀតណាមនឹងបន្តរួមដំណើរ និងបង្កើតលក្ខខណ្ឌអំណោយផលសម្រាប់អង្គភាពអាជីវកម្មបរទេស រួមទាំងក្រុមហ៊ុន SYRE ក្នុងការវិនិយោគ និងធ្វើអាជីវកម្មនៅវៀតណាម ដោយធានាការអនុលោមតាមច្បាប់វៀតណាម និងក្នុងស្មារតីនៃ "ផលប្រយោជន៍សុខដុមរមនា និងហានិភ័យរួម"។

លោក Pham Minh Chinh នាយករដ្ឋមន្ត្រីវៀតណាម ទទួលជួបលោក Johan Ndisi ឯកអគ្គរដ្ឋទូតស៊ុយអែតប្រចាំនៅវៀតណាម  (រូបថត៖ vnanet.vn)

លោក Johan Ndisi ឯកអគ្គរដ្ឋទូត និងលោក Dennis Nobelius បានបញ្ជាក់ថា នឹងបន្តជំរុញសកម្មភាពសហប្រតិបត្តិការដូចដែលលោកនាយករដ្ឋមន្ត្រីបានលើកឡើង ដោយសម្របសម្រួលជាមួយក្រសួង ស្ថាប័ន និងមូលដ្ឋាននានា អនុវត្តគម្រោងនានាស្របតាមទិសដៅអភិវឌ្ឍន៍របស់វៀតណាម ស្របតាមសេចក្តីសម្រេចរបស់មហាសន្និបាតលើកទី១៤ របស់បក្សកុម្មុយនិស្តវៀតណាម រួមចំណែកជំរុញទំនាក់ទំនងវៀតណាម-សហភាពអឺរ៉ុប និងវៀតណាម-ស៊ុយអែត។

នាថ្ងៃដដែល លោក Pham Minh Chinh នាយករដ្ឋមន្ត្រី បានទទួលជួបលោក Hong Tianzhu ប្រធានសារជីវកម្ម Texhong របស់ចិន។

លោក Pham Minh Chinh នាយករដ្ឋមន្ត្រីវៀតណាម ទទួលជួបលោក Hong Tianzhu ប្រធានសារជីវកម្ម Texhong (រូបថត៖ vnanet.vn)

នៅក្នុងជំនួប លោក Pham Minh Chinh នាយករដ្ឋមន្ត្រី បានអបអរសាទរចំពោះសាជីវកម្ម Texhong នាប៉ុន្មានឆ្នាំកន្លងមក បានពង្រីកការវិនិយោគនៅក្នុងខេត្ត Quang Ninh និង Dong Nai ព្រមទាំងសង្ឃឹមថា Texhong នឹងពង្រីកការវិនិយោគយ៉ាងស៊ីជម្រៅ ផលិតវត្ថុធាតុដើមសម្រាប់វៀតណាម រៀបចំកម្មវិធីបង្ហាញម៉ូដ និងពង្រីកមណ្ឌលឧស្សាហកម្ម Hai Ha (ខេត្ត Quang Ninh)។ ដោយសង្កត់ធ្ងន់លើការអភិវឌ្ឍយ៉ាងល្អប្រសើរនៃទំនាក់ទំនងវៀតណាម-ចិន លោកនាយករដ្ឋមន្ត្រីបានបញ្ជាក់ថា វៀតណាមនឹងបង្កើតបរិយាកាសអំណោយផលសម្រាប់សាជីវកម្ម Texhong និយោគនៅវៀតណាម ជាពិសេសការវិនិយោគស៊ីជម្រៅ ការអនុវត្តវិទ្យាសាស្ត្រ និងបច្ចេកវិទ្យា នវានុវត្តន៍ ការធ្វើបរិវត្តកម្មឌីជីថល និងផលិតកម្មបៃតង។

លោក Hong Tianzhu ប្រធានសាជីវកម្ម Texhong បានបញ្ជាក់ថា Texhong យកចិត្តទុកដាក់ចំពោះការវិនិយោគនៅវៀតណាមក្នុងវិស័យអភិវឌ្ឍន៍ឌីជីថល ការអភិវឌ្ឍបៃតង ការអភិវឌ្ឍថាមពល បញ្ញាសិប្បនិម្មិត (AI) វាយនភណ្ឌ ការវិនិយោគលើមណ្ឌលឧស្សាហកម្មឆ្លងដែន... ព្រមទាំងសង្ឃឹមថារដ្ឋាភិបាលវៀតណាមនឹងបន្តជួយគាំទ្រ Texhong ដើម្បីប្រតិបត្តិការយូរអង្វែង ប្រកបដោយប្រសិទ្ធភាពនៅវៀតណាម៕

បកប្រែដោយ Huyen Trang