លោក Luong Cuong ប្រធានរដ្ឋ ជូនពរឆ្នាំថ្មីប្រពៃណីជាតិដល់អតីតថ្នាក់ដឹកនាំបក្ស និងរដ្ឋ

អញ្ជើញមកជូនពរឆ្នាំថ្មីដល់លោក​ Nguyen Minh Triet​ អតីតប្រធានរដ្ឋ  និងលោក Truong Tan Sang អតីតប្រធានរដ្ឋ  លោក Luong Cuong​ ប្រធានរដ្ឋ បានសាកសួរសុខទុក្ខដល់ជីវិតគ្រួសាររបស់អតីតប្រធានរដ្ឋទាំងពីរ។

លោក Luong Cuong ប្រធានរដ្ឋ  បានសម្តែងការដឹងគុណយ៉ាងជ្រាលជ្រៅចំពោះការរួមចំណែកដ៏ធំធេងរបស់លោក​ Nguyen Minh Triet​ អតីតប្រធានរដ្ឋ និងលោក Truong Tan Sang អតីតប្រធានរដ្ឋ ចំពោះបុព្វហេតុបដិវត្តន៍របស់បក្ស និងប្រទេសជាតិ។ ព្រមទាំងមានបំណងចង់បន្តទទួលបានមតិយោបល់ដ៏ជ្រាលជ្រៅ និងបទពិសោធន៍ដ៏មានតម្លៃពីអតីតប្រធានរដ្ឋទាំងពីរសម្រាប់ការកសាងនិងអភិវឌ្ឍប្រទេសជាតិក្នុងយុគសម័យថ្មី។

លោក Luong Cuong ប្រធានរដ្ឋ មកសួរសុខទុក្ខ និងជូនពរឆ្នាំថ្មីដល់លោក Nguyen Minh Triet អតីតប្រធានរដ្ឋ

អតីតប្រធានរដ្ឋទាំងពីរបានសម្តែងសេចក្តីរីករាយចំពោះសមិទ្ធផលសំខាន់ៗដែលប្រទេសជាតិសម្រេចបានក្នុងឆ្នាំកន្លងមក។ ព្រមទាំង​ជឿជាក់ថា បន្ទាប់ពីជោគជ័យនៃមហាសន្និបាតលើកទី ១៤ របស់បក្ស ប្រទេសនឹងឈានចូលយុគសម័យថ្មីនៃការអភិវឌ្ឍយ៉ាងឆាប់រហ័សនិងប្រកបដោយចីរភាព​។

ក្នុងពេលជាមួយគ្នានេះ អតីតប្រធានរដ្ឋទាំងពីរក៏បានចែករំលែកមតិយោបល់ដ៏ជ្រាលជ្រៅ ដែលបង្ហាញពីការទទួលខុសត្រូវនិងការយកចិត្ដទុកដាក់ចំពោះបុព្វហេតុនៃការកសាង និងការពារមាតុភូមិ។

ក្នុងឱកាសនេះ លោក Luong Cuong ប្រធានរដ្ឋ បានប្រគល់អំណោយតេតដល់លោក​ Nguyen Minh Triet​ អតីតប្រធានរដ្ឋ  និងលោក Truong Tan Sang អតីតប្រធានរដ្ឋ ព្រមទាំងជូនពរអតីតប្រធានរដ្ឋទាំងពីរ និងក្រុមគ្រួសារមានសុខភាពល្អបរិបូរ សុភមង្គល ជោគជ័យក្នុងឱកាសឆ្នាំថ្មីប្រពៃណីជាតិខាងមុខនេះ។

លោក Luong Cuong ប្រធានរដ្ឋ មកសួរសុខទុក្ខ និងជូនពរឆ្នាំថ្មីដល់លោក Truong Tan Sang អតីតប្រធានរដ្ឋ

* នៅថ្ងៃដដែល លោក Luong Cuong ប្រធានរដ្ឋ  បានមកសួរសុខទុក្ខ និងអុជធូបគោរពវិញ្ញាណក្ខន្ធលោក Le Duan អតីតអគ្គលេខាបក្ស  និងអុជធូបគោរពវិញ្ញាណក្ខន្ធលោក Nguyen Van Linh អតីតអគ្គលេខាបក្ស  ព្រមទាំងអុជធូបគោរពវិញ្ញាណក្ខន្ធលោក Vo Chi Cong​​ អតីតប្រធានក្រុមប្រឹក្សារដ្ឋ និងអុជធូបគោរពវិញ្ញាណក្ខន្ធលោក Le Duc Anh អតីតប្រធានរដ្ឋ។

ក្នុងបរិយាកាសកក់ក្តៅ លោក​ Luong Cuong ប្រធានរដ្ឋ  បានសាកសួរសុខទុក្ខអំពីជីវិត ការសិក្សា និងការងាររបស់គ្រួសារលោក Le Duan អតីតអគ្គលេខាបក្ស   និងលោក Nguyen Van Linh អតីតអគ្គលេខាបក្ស  និងលោក Vo Chi Cong អតីតប្រធានក្រុមប្រឹក្សារដ្ឋ  និងលោក Le Duc Anh អតីតប្រធានរដ្ឋ ព្រមទាំងជូនពរសាចញ្ញាត្ដិ ក្រុមគ្រួសារមានសុខភាពល្អ សុភមង្គល និងជោគជ័យ ហើយបន្តលើកកម្ពស់ប្រពៃណីនិងសមិទ្ធផលដែលគ្រួសារសម្រេចបាន ​ ខិតខំចូលរួមចំណែកច្រើនបំផុតដល់មាតុភូមិនិងប្រជាជន​៕

បកប្រែដោយ Pham Diep