វៀតណាមមានបំណងជម្រុញកិច្ចសហប្រតិបត្តិការឲ្យកាន់តែស៊ីជម្រៅជាមួយសហរដ្ឋអាមេរិក

ក្នុងជំនួប លោក To Lam អគ្គលេខាបក្ស បានអបអរសាទរចំពោះលោក Marc Knapper ដែលបញ្ចប់អាណត្តិរបស់ខ្លួននៅវៀតណាមដោយជោគជ័យ និងវាយតម្លៃខ្ពស់ចំពោះការរួមចំណែកដ៏សំខាន់របស់លោកឯកអគ្គរដ្ឋទូតដល់ការអភិវឌ្ឍវិជ្ជមាននៃទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយរវាងវៀតណាម និងសហរដ្ឋអាមេរិក។ លោកអគ្គលេខាបក្សបានកោតសរសើរចំពោះសមិទ្ធផលដែលប្រទេសទាំងពីរសម្រេចបានលើវិស័យផ្សេងៗ ជាពិសេសទំនាក់ទំនងនយោបាយ-ការបរទេស សេដ្ឋកិច្ច-ពាណិជ្ជកម្ម ការពារជាតិ សន្តិសុខ ការជំនះផលវិបាកក្រោយសង្គ្រាម វិទ្យាសាស្ត្រ និងបច្ចេកវិទ្យា។ល។ លោកសង្កត់ធ្ងន់ថា វៀតណាមត្រៀមខ្លួនជាស្រេចជម្រុញឲ្យកាន់តែស៊ីជម្រៅនូវកិច្ចសហប្រតិបត្តិជាមួយសហរដ្ឋអាមេរិក រួមទាំងការចុះហត្ថលេខាលើកិច្ចព្រមព្រៀងពាណិជ្ជកម្មបដិការ យុត្តិធម៌ និងមានតុល្យភាព។

លោក To Lam អគ្គលេខាបក្ស ទទួលជួបលោក Marc Knapper ឯកអគ្គរដ្ឋទូត (រូបថត៖ vnanet.vn)

វៀតណាមមានបំណងចង់បន្តសហប្រតិបត្តិការយ៉ាងជិតស្និទ្ធជាមួយអាជ្ញាធរអាមេរិក ដើម្បីពង្រឹងទំនាក់ទំនងទ្វេភាគីបន្ថែមទៀត ដោយផ្អែកលើការគោរពគ្នាទៅវិញទៅមកចំពោះឯករាជ្យភាព អធិបតេយ្យភាព បូរណភាពទឹកដី និងរបបនយោបាយ ចូលរួមចំណែកជាវិជ្ជមានដល់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍនៅក្នុងតំបន់ និងពិភពលោក។

ទាក់ទងនឹងបញ្ហាតំបន់ និងអន្តរជាតិដែលភាគីទាំងពីរយកចិត្តទុកដាក់ដូចគ្នា លោក To Lam អគ្គលេខាបក្ស បានសង្កត់ធ្ងន់លើការគោរពនូវធម្មនុញ្ញអង្គការសហប្រជាជាតិ ច្បាប់អន្តរជាតិ និងដោះស្រាយជម្លោះតាមរយៈកិច្ចសន្ទនា និងសន្តិវិធីផ្សេងទៀត។ ទាក់ទងនឹងស្ថានភាពក្នុងតំបន់ លោកអគ្គលេខាបក្ស បានស្នើឲ្យអាមេរិកបន្តគាំទ្រដល់ការរក្សាសន្តិភាព ស្ថិរភាព សន្តិសុខ សុវត្ថិភាព និងសេរីភាពនៃការធ្វើនាវាចរណ៍ និងអាកាសចរណ៍នៅក្នុងតំបន់ ស្របតាមច្បាប់អន្តរជាតិ ជាពិសេសអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ឆ្នាំ ១៩៨២ ហើយបញ្ជាក់ថា សកម្មភាពរបស់គ្រប់ភាគីទាំងអស់នៅក្នុងសមុទ្រខាងកើតគួរតែរួមចំណែកដល់គោលដៅរួមនេះ។

លោក To Lam អគ្គលេខាបក្ស និងលោក Marc Knapper ឯកអគ្គរដ្ឋទូត (រូបថត៖ vnanet.vn)

លោកអគ្គលេខាបក្ស សម្តែងទំនុកចិត្តថា នាពេលអនាគត លោក Marc Knapper នឹងបន្តគាំទ្រ និងជម្រុញទំនាក់ទំនងវៀតណាម - អាមេរិក និងរួមចំណែកដល់ការជម្រុញទំនាក់ទំនងទ្វេភាគីឲ្យសម្រេចបាននូវសមិទ្ធផលថ្មីៗជាច្រើននាពេលអនាគត។

ក្នុងឱកាសនេះ លោក Marc Knapper ថ្លែងអំណរគុណយ៉ាងស្មោះស្ម័គ្រចំពោះថ្នាក់ដឹកនាំនៃបក្ស រដ្ឋ និងប្រជាជនវៀតណាម ដែលបានយកចិត្តទុកដាក់ និងជួយគាំទ្រលោកឲ្យបំពេញល្អនូវរាល់ភារកិច្ចក្នុងអាណត្តិរបស់ខ្លួន។ លោកឯកអគ្គរដ្ឋទូតបានអបអរសាទរចំពោះសមិទ្ធផលលេចធ្លោរបស់វៀតណាម រួមទាំងកំណើនសេដ្ឋកិច្ចប្រកបដោយស្ថិរភាព ការធ្វើឲ្យប្រសើរឡើងនូវជីវភាពរស់នៅរបស់ប្រជាជន ការលើកកម្ពស់តួនាទី និងកិត្យានុភាពរបស់វៀតណាមលើឆាកអន្តរជាតិ។ លោកឯកអគ្គរដ្ឋទូតបានបញ្ជាក់ថា ក្នុងឋានៈណាក៏ដោយ ក៏លោកនឹងខិតខំប្រឹងប្រែងអស់ពីសមត្ថភាពដើម្បីអភិវឌ្ឍទំនាក់ទំនងទ្វេភាគីបន្ថែមទៀត ចូលរួមចំណែកជាក់ស្តែងដល់សន្តិភាព ស្ថិរភាព កិច្ចសហប្រតិបត្តិការ និងវិបុលភាពនៅក្នុងតំបន់ និងពិភពលោក៕

បកប្រែដោយ Thuy Anh