ព្រឹត្តិការណ៍ប្រវត្តិសាស្ត្រមួយក្នុងទំនាក់ទំនងសាមគ្គីភាពវៀតណាម-អាល់ហ្សេរី

លោក Vo Hong Nam កូនប្រុសរបស់លោកនាយឧត្តមសេនីយ៍ Vo Nguyen Giap បានជួបជាមួយអតីតយុទ្ធជនអាល់ហ្សេរី ដែលភាគច្រើនបានចូលរួមជំនួបសំណេះសំណាលរបស់លោកនាយឧត្តមសេនីយ៍ក្នុងឆ្នាំ១៩៧៦។

ពហុកីឡដ្ឋាន ៥ កក្កដា នៅទីក្រុងអាល់ហ្សេរី ជាកន្លែងដែលលោកនាយឧត្តមសេនីយ៍ Vo Nguyen Giap  បានថ្លែងសុន្ទរកថាទៅកាន់ តំណាងប្រជាជនអាល់ហ្សេរីចំនួន ១០.០០០ នាក់ នៅថ្ងៃទី ៤ ខែមករា ឆ្នាំ ១៩៧៦។

នេះគឺជាដំណើរទស្សនកិច្ចលើកដំបូងរបស់លោកនាយឧត្តមសេនីយ៍ Vo Nguyen Giap ទៅកាន់ប្រទេសប្រជាធិបតេយ្យប្រជាជន បន្ទាប់ ពីជ័ យជម្នះនិទាឃរដូវរបស់វៀតណាមឆ្នាំ ១៩៧៥។ ដំណើរទស្សនកិច្ចនេះ មានគោលបំណងចែករំលែកជ័យជម្នះដ៏មហិមាដែលវៀតណាមសម្រេចបានបន្ទាប់ពីការតស៊ូប្រឆាំងនឹងបារាំង និងសហរដ្ឋអាមេរិក។ លោកនាយឧត្តមសេនីយ៍ Vo Nguyen Giap  និងគណៈប្រតិភូ បាននាំមកការថ្លែងអំណរគុណរបស់ប្រជាជនវៀតណាមជូនចំពោះប្រជាជនអាល់ហ្សេរី - ជាមិត្តភក្តិស្មោះត្រង់ដែលបានគាំទ្រ និងជួយវៀតណាមទាំងស្មារតី និងសម្ភារៈ។

ក្នុងចំណោមចលនារំដោះជាតិដែលកំពុងកើនឡើងនៅអាស៊ី អាហ្វ្រិក និងអាមេរិកឡាទីន ដំណើរទស្សនកិច្ចរបស់លោកនាយឧត្តមសេនីយ៍ Vo Nguyen Giap មានសារៈសំខាន់យ៉ាងខ្លាំង ដោយបង្ហាញពីការគាំទ្រយ៉ាងមុតមាំរបស់វៀតណាមចំពោះការតស៊ូដោយយុត្តិធម៌របស់ប្រជាជនអាល់ហ្សេរីដើម្បីឯករាជ្យ និងសេរីភាព ខណៈពេលដែលបញ្ជាក់ពីស្មារតីសាមគ្គីភាពអន្តរជាតិក្នុងចំណោមប្រជាជនដែលរងការគាបសង្កត់។ ដោយមិនអាចទៅទស្សនាគ្រប់ទីតាំងទាំងអស់នោះ អាល់ហ្សេរីបានរៀបចំកិច្ចប្រជុំរវាងលោកនាយឧត្តមសេនីយ៍ និងប្រជាជនប្រមាណ ១០.០០០ នាក់នៅពហុកីឡដ្ឋាន "Stade du 5 Juillet" (" ៥ កក្កដា") ក្នុងទីក្រុងអាល់ហ្សេរី។ ពាក្យសម្ដីរបស់លោកនាយឧត្តមសេនីយ៍នៅក្នុងជំនួបអំពីចំណងមិត្តភាពរវាងប្រទេសទាំងពីរបានបន្សល់ទុកនូវចំណាប់អារម្មណ៍យូរអង្វែងរហូតមកដល់សព្វថ្ងៃនេះ។ ដូច្នេះ លោកនាយឧត្តមសេនីយ៍បានបញ្ជាក់ថា វៀតណាម និងអាល់ហ្សេរីមានសាមគ្គីភាពក្នុងអតីតកាល សាមគ្គីភាពក្នុងបច្ចុប្បន្នកាល និងសាមគ្គីភាពជារៀងរហូតនាពេលអនាគត ដើម្បីផលប្រយោជន៍របស់ប្រជាជននៃប្រទេសទាំងពីរ និងដើម្បីឯករាជ្យភាព សេរីភាព និងយុត្តិធម៌សង្គមនៅក្នុងពិភពលោក។

ជាមួយនឹងកិត្យានុភាព និងឋានៈអន្តរជាតិរបស់ខ្លួន លោកនាយឧត្តមសេនីយ៍ Vo Nguyen Giap  មិនត្រឹមតែជានិមិត្តរូប នៃជ័យជំនះដ៏រុងរឿងរបស់ប្រជាជាតិវៀតណាមក្នុងការតស៊ូដើម្បីឯករាជ្យភាពរបស់ខ្លួនប៉ុណ្ណោះទេ ប៉ុន្តែក៏ជាប្រភពនៃការបំផុសគំនិតដ៏ធំធេងសម្រាប់ចលនារំដោះជាតិ រួមទាំងអាល់ហ្សេរីផងដែរ។ ការពិភាក្សា និងទំនាក់ទំនងក្នុងអំឡុងពេលទស្សនកិច្ចនេះបានរួមចំណែកដល់ការពង្រឹងការយល់ដឹងគ្នាទៅវិញទៅមក និងការជឿទុកចិត្តគ្នា ដោយបើកមូលដ្ឋានគ្រឹះដ៏សំខាន់សម្រាប់កិច្ចសហប្រតិបត្តិការទ្វេភាគីក្នុងវិស័យជាច្រើននាពេលអនាគត។

ក្នុងអំឡុងពេលនៃកិច្ចប្រជុំដ៏ស្និទ្ធស្នាល និងបើកចំហជាមួយលោកនាយឧត្តមសេនីយ៍ និងគណៈប្រតិភូវៀតណាម ប្រធានាធិបតីអាល់ហ្សេរីនាពេលនោះគឺលោក Houari Boumédìene បានសន្យាជួយវៀតណាមកសាងប្រទេសឡើងវិញ។ អាល់ហ្សេរី ក្រោមចំណុចខ្លាំងរបស់ខ្លួន បានបណ្តុះបណ្តាលវិស្វករប្រេង និងវេជ្ជបណ្ឌិតជូនវៀតណាម។ ទាំងនេះគឺជាមូលដ្ឋានគ្រឹះដំបូងសម្រាប់កិច្ចសហប្រតិបត្តិការដ៏ជោគជ័យក្នុងវិស័យប្រេង និងឧស្ម័នរវាង PetroVietnam និងអាល់ហ្សេរីនាពេលបច្ចុប្បន្ន។

ឆ្លងកាត់ពេលវេលា និងការសាកល្បង ទំនាក់ទំនងវៀតណាម-អាល់ហ្សេរីបានពង្រឹង និងអភិវឌ្ឍជាបន្តបន្ទាប់ ដោយផ្អែកលើមូលដ្ឋានគ្រឹះប្រវត្តិសាស្ត្រដ៏រឹងមាំ ឧត្តមគតិរួមគ្នានៃការតស៊ូដើម្បីឯករាជ្យជាតិ និងសេចក្តីប្រាថ្នាសម្រាប់ការអភិវឌ្ឍជាតិ។ ប្រទេសទាំងពីររក្សាទំនាក់ទំនងនយោបាយល្អ និងសហការប្រកបដោយប្រសិទ្ធភាពក្នុងវិស័យសេដ្ឋកិច្ច ពាណិជ្ជកម្ម ថាមពល កសិកម្ម អប់រំ និងវប្បធម៌ ខណៈពេលដែលក៏សម្របសម្រួលយ៉ាងជិតស្និទ្ធ និងគាំទ្រគ្នាទៅវិញទៅមកនៅក្នុងវេទិកាតំបន់ និងអន្តរជាតិ៕

បកប្រែដោយ Duy Hoan