លោក Le Hoai Trung រដ្ឋមន្ត្រីក្រសួងការបរទេសវៀតណាមអញ្ជើញទៅបំពេញទស្សនកិច្ចការងារនៅប្រទេសថៃ

ក្នុងក្របខ័ណ្ឌនៃដំណើរទស្សនកិច្ចនេះ លោក Le Hoai Trung រដ្ឋមន្ត្រីក្រសួងការបរទេសវៀតណាម បានជួបជាមួយលោក   Sihasak Phuangketkeow រដ្ឋមន្ត្រីក្រសួងការបរទេសថៃ។

ក្នុងជំនួបនេះ ភាគីទាំងពីរវាយតម្លៃខ្ពស់ចំពោះទំនាក់ទំនងមិត្តភាពជាប្រពៃណី និងភាពជាដៃគូយុទ្ធសាស្ត្រគ្រប់​ជ្រុងជ្រោយរវាងប្រទេសទាំងពីរ ព្រមទាំងឯកភាពគ្នាបន្តពង្រឹងទំនុកចិត្តខាងនយោបាយតាមរយៈការរក្សាការផ្លាស់ប្តូរគណៈប្រតិភូជាន់ខ្ពស់ និងគ្រប់លំដាប់ថ្នាក់ ជាពិសេសឆ្នាំ២០២៦ នៅពេលដែលប្រទេសទាំងពីររំលឹកខួបលើកទី៥០ នៃការបង្កើតទំនាក់ទំនងការទូត។

ទិដ្ឋភាពនៃជំនួប (រូបថត៖ ក្រសួងការបរទេសវៀតណាម)

រដ្ឋមន្ត្រីទាំងពីរបានវាយតម្លៃថា កិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគនៅតែជាសសរស្តម្ភមួយក្នុងទំនាក់ទំនងទ្វេភាគី និងឯកភាពគ្នាបន្តខិតខំបង្កើនទំហំពាណិជ្ជកម្មទ្វេភាគីឲ្យសម្រេចបាន  ២៥ ពាន់លានដុល្លារអាមេរិក  និងអនុវត្តប្រកបដោយប្រសិទ្ធភាពនូវយុទ្ធសាស្ត្រ "ការតភ្ជាប់បី" និងពង្រឹងកិច្ចសហប្រតិបត្តិការក្នុងវិស័យដែលមានសក្តានុពលនិងបំពេញបន្ថែមគ្នាទៅវិញទៅមកដូចជា ថាមពល ការផ្លាស់ប្តូរបៃតង សេដ្ឋកិច្ចរង្វង់ សេដ្ឋកិច្ចឌីជីថល និង logistics។ ភាគីទាំងពីរបានលើកទឹកចិត្តអង្គភាពអាជីវកម្មនៃប្រទេសទាំងពីរពង្រីកការវិនិយោគនៅក្នុងប្រទេសរបស់គ្នាទៅវិញទៅមក ដែលរួមចំណែកដល់គោលដៅអភិវឌ្ឍសេដ្ឋកិច្ចទ្វេភាគីដែលមានតុល្យភាព ស្ថិរភាព និងចីរភាព។

ភាគីទាំងពីរសំដែងការពេញចិត្ដចំពោះកិច្ចសហប្រតិបត្តិការយ៉ាងជិតស្និទ្ធ និងមានប្រសិទ្ធភាពរវាងទីភ្នាក់ងារការពារជាតិ និងសន្តិសុខ ព្រមទាំងបញ្ជាក់សារជាថ្មីថា មិនអនុញ្ញាតឱ្យអង្គការ ឬ បុគ្គលណាមួយប្រើប្រាស់ទឹកដីខ្លួន ដើម្បីប្រឆាំងប្រទេសមួយផ្សេងទៀតឡើយ ហើយបានឯកភាពគ្នាបន្តសម្របសម្រួលក្នុងការទប់ស្កាត់ និងប្រយុទ្ធប្រឆាំងនឹងឧក្រិដ្ឋកម្មឆ្លងដែន ការជួញដូរគ្រឿងញៀន និងឧក្រិដ្ឋកម្មបច្ចេកវិទ្យាខ្ពស់។

លោក Le Hoai Trung រដ្ឋមន្ត្រីក្រសួងការបរទេសវៀតណាមថ្លែងក្នុងជំនួប​ (រូបថត៖ ក្រសួងការបរទេសវៀតណាម)

លោក  Sihasak Phuangketkeow រដ្ឋមន្ត្រីក្រសួងការបរទេសថៃក្នុងជំនួប (រូបថត៖ ក្រសួងការបរទេសវៀតណាម)

ពិភាក្សាលើបញ្ហាក្នុងតំបន់និងអន្តរជាតិ រដ្ឋមន្ត្រីទាំងពីរបានសង្កត់ធ្ងន់លើសារៈសំខាន់នៃការរក្សាសន្តិភាព ស្ថិរភាព សន្តិសុខ និងសុវត្ថិភាពនៅក្នុងតំបន់ លើកកម្ពស់តួនាទីមជ្ឈភាពរបស់អាស៊ាន ពង្រឹងសាមគ្គីភាពក្នុងប្លុក និងឯកភាពគ្នានូវទស្សនៈ និងសំឡេងរួមរបស់អាស៊ានលើបញ្ហាតំបន់ និងពិភពលោក។

អំពីភាពតានតឹងព្រំដែនថ្មីៗរវាងថៃនិងកម្ពុជា លោក Le Hoai Trung រដ្ឋមន្ត្រីការបរទេសវៀតណាម បានសម្តែងនូវការព្រួយបារម្ភចំពោះការវិវឌ្ឍដ៏ស្មុគស្មាញតាមបណ្តោយព្រំដែនរវាងថៃ និងកម្ពុជា។ លោក Le Hoai Trung បានអំពាវនាវឲ្យគ្រប់ភាគីទាំងអស់ឱ្យអត់ធ្មត់ មិនទុកឲ្យភាពតានតឹងកើនឡើង និងដោះស្រាយការខ្វែងគំនិតដោយសន្ដិវិធី តាមរយៈការសន្ទនា ស្របតាមច្បាប់អន្តរជាតិ និងកិច្ចព្រមព្រៀង និងយន្តការក្នុងតំបន់ដែលមានស្រាប់។ លោក Le Hoai Trung បានបញ្ជាក់ថា វៀតណាមត្រៀមខ្លួនសហការជាមួយប្រទេសអាស៊ាន និងចូលរួមចំណែកជាវិជ្ជមានចំពោះកិច្ចខិតខំប្រឹងប្រែងរួម ដើម្បីរក្សាសន្តិភាព និងស្ថិរភាពរយៈពេលវែងនៅក្នុងតំបន់។

ក្នុងឱកាសនេះដែរ លោក Le Hoai Trung រដ្ឋមន្ត្រីការបរទេសវៀតណាម អញ្ជើញទៅទស្សនកិច្ចនៅស្ថានទូតវៀតណាមប្រចាំប្រទេសថៃ និងជួបសំណេះសំណាលជាមួយកម្មាភិបាល និងបុគ្គលិកនៃស្ថាប័នតំណាងវៀតណាមប្រចាំប្រទេសថៃ៕

បកប្រែដោយ Pham Diep