ទំនាក់ទំនង វៀតណាម-គុយបា ជាគំរូដ៏ភ្លឺស្វាងមួយក្នុងទំនាក់ទំនងអន្តរជាតិ

តាងនាមថ្នាក់ដឹកនាំបក្ស និងរដ្ឋវៀតណាម លោក Ho Quoc Dung ឧបនាយករដ្ឋមន្ត្រី បានអបអរសាទរយ៉ាងកក់ក្តៅចំពោះថ្នាក់ដឹកនាំបក្ស រដ្ឋ និងប្រជាជនគុយបា។ លោក Ho Quoc Dung បានបញ្ជាក់ថា ទំនាក់ទំនងវៀតណាម-គុយបា គឺជាទ្រព្យសម្បត្តិរួមដែលមិនអាចកាត់ថ្លៃបានរបស់ប្រជាជាតិទាំងពីរ និងជាគំរូដ៏ភ្លឺស្វាងមួយក្នុងទំនាក់ទំនងអន្តរជាតិ។

លោក Ho Quoc Dung ឧបនាយករដ្ឋមន្ត្រី មានប្រសាសន៍នៅក្នុងពិធី (រូបថត៖ vnanet.vn)

មានប្រសាសន៍នៅក្នុងពិធី លោក Miguel Díaz-Canel Bermúdez លេខាទីមួយ និងជាប្រធានរដ្ឋគុយបា បានវាយតម្លៃថា ទំនាក់ទំនងទ្វេភាគីបានកត់ស្គាល់ឆ្នាំដ៏ជោគជ័យជាមួយនឹងព្រឹត្តិការណ៍សំខាន់ៗជាច្រើន។ បណ្តាសកម្មភាពយ៉ាងសកម្មក្នុងអំឡុងពេលឆ្នាំមិត្តភាពវៀតណាម-គុយបា បាននាំមកនូវលទ្ធផលគួរឱ្យកត់សម្គាល់ ដែលរួមចំណែកយ៉ាងសកម្មដល់ការអភិវឌ្ឍសេដ្ឋកិច្ចសង្គមរបស់ប្រទេសនីមួយៗ និងបង្ហាញពីចំណងសាមគ្គីភាពមិត្តភាពពិសេស រវាងប្រជាជននៃប្រទេសទាំងពីរ។ លោក Miguel Díaz-Canel Bermúdez លេខាទីមួយ បានសម្តែងការដឹងគុណចំពោះប្រជាជនវៀតណាម ដែលបានគាំទ្រប្រជាជនគុយបាតាមរយៈកម្មវិធីដែលរៀបចំដោយសមាគមកាកបាទក្រហមវៀតណាម ដោយចាត់ទុកថានេះជាសក្ខីភាពនៃមនោសញ្ចេតនាយ៉ាងជ្រាលជ្រៅ ជិតស្និទ្ធ និងស្មោះស្ម័គ្ររវាងប្រជាជននៃប្រទេសទាំងពីរ។

បន្ទាប់ពីពិធីនេះ លោក Ho Quoc Dung ឧបនាយករដ្ឋមន្ត្រីរួមជាមួយលោក Miguel Díaz-Canel Bermúdez លេខាទីមួយ និងជាប្រធានរដ្ឋគុយបា និងថ្នាក់ដឹកនាំនៃប្រទេសទាំងពីរ បានចូលរួមក្នុងពិធីបើកការដ្ឋានសាងសង់គម្រោងរោងចក្រថាមពលពន្លឺព្រះអាទិត្យ ដែលជាអំណោយពីបក្ស រដ្ឋ និងប្រជាជនវៀតណាមដល់ប្រជាជនគុយបា ជាគម្រោងមួយដែលរំពឹងថានឹងជួយគុយបាជំនះការលំបាកផ្នែកថាមពល។

ក្នុងក្របខ័ណ្ឌនៃពិធី ថ្នាក់ដឹកនាំនៃប្រទេសទាំងពីរក៏បានធ្វើជាសាក្ខីភាពក្នុងពិធីប្រគល់ថវិកាលើកទីពីរនៃយុទ្ធនាការ "៦៥ ឆ្នាំនៃចំណងមិត្តភាពវៀតណាម-គុយបា" ដែលរៀបចំដោយសមាគមកាកបាទក្រហមវៀតណាម។

លោក Ho Quoc Dung ឧបនាយករដ្ឋមន្ត្រី ជួបជាមួយលោក Miguel Díaz-Canel Bermúdez លេខាទីមួយ និងជាប្រធានរដ្ឋគុយបា (រូបថត៖ vov.vn)

* នៅរសៀលថ្ងៃដដែល នៅវិមានបដិវត្តន៍គុយបា រដ្ឋធានី La Habana លោក Ho Quoc Dung ឧបនាយករដ្ឋមន្ត្រីបានជួបជាមួយលោក Miguel Díaz-Canel Bermúdez លេខាទីមួយ និងជាប្រធានរដ្ឋគុយបា។ នៅក្នុងជំនួប ភាគីទាំងពីរបានឯកភាពគ្នាលើកកម្ពស់បន្ថែមទៀតនូវទំនុកចិត្តខាងនយោបាយ និងការសម្របសម្រួលជាយុទ្ធសាស្ត្រ រក្សាការផ្លាស់ប្តូរគណៈប្រតិភូជាន់ខ្ពស់ជាប្រចាំ និងការតភ្ជាប់យ៉ាងជិតស្និទ្ធរវាងថ្នាក់ដឹកនាំជាន់ខ្ពស់របស់បក្សទាំងពីរ និងរដ្ឋទាំងពីរ រក្សា និងលើកកម្ពស់ប្រសិទ្ធភាពនៃយន្តការសហប្រតិបត្តិការជាប្រចាំ។ ភាគីទាំងពីរក៏បានពិភាក្សាយ៉ាងស៊ីជម្រៅអំពីបញ្ហាអន្តរជាតិ និងតំបន់ដែលភាគីទាំងពីរមានការយកចិត្តទុកដាក់ដូចគ្នា ព្រមទាំងឯកភាពបន្តពិគ្រោះយោបល់ សម្របសម្រួល និងគាំទ្រគ្នាទៅវិញទៅមកនៅអង្គការអន្តរជាតិ និងវេទិកាពហុភាគីដែលវៀតណាម និងគុយបាជាសមាជិក ជាពិសេសនៅអង្គការសហប្រជាជាតិ និងចលនាមិនចូលបក្សសម្ព័ន្ធ។ ថ្នាក់ដឹកនាំនៃប្រទេសទាំងពីរបានចែករំលែកជំហរគាំទ្រការដោះស្រាយជម្លោះអន្តរជាតិដោយសន្តិវិធី ដោយផ្អែកលើការគោរពច្បាប់អន្តរជាតិ និងធម្មនុញ្ញអង្គការសហប្រជាជាតិ៕

បកប្រែដោយ Huyen Trang