ពង្រឹងកិច្ចសហប្រតិបត្តិការរវាងបក្សកុម្មុយនិស្តវៀតណាម និងបក្សប្រជាជនបដិវត្តន៍ឡាវ

លោក To Lam អគ្គលេខាបក្សកុម្មុយនិស្តវៀតណាម  និងលោក Thongloun Sisoulith អគ្គលេខាបក្ស និងជាប្រធានរដ្ឋឡាវ (រូប​ថត៖​ vnanet.vn)

នៅក្នុងកិច្ចប្រជុំនេះ លោក To Lam អគ្គលេខាបក្សកុម្មុយនិស្តវៀតណាម  និងលោក Thongloun Sisoulith អគ្គលេខាបក្ស និងជាប្រធានរដ្ឋឡាវ បានអះអាងថានឹងបន្តពង្រឹង និងធ្វើឱ្យកាន់តែស៊ីជម្រៅនូវចំណងមិត្តភាពដ៏អស្ចារ្យ សាមគ្គីភាពពិសេស កិច្ចសហប្រតិបត្តិការដ៏ទូលំទូលាយ និងការតភ្ជាប់ជាយុទ្ធសាស្ត្ររវាងវៀតណាម និងឡាវ តាមរយៈយន្តការសហប្រតិបត្តិការជាក់ស្តែង និងមានប្រសិទ្ធភាពដែលមានស្រាប់ ព្រមទាំងបង្កើត និងរៀបចំយន្តការថ្មីៗ ដែលត្រូវបានឯកភាពគ្នាដោយថ្នាក់ដឹកនាំជាន់ខ្ពស់នៃប្រទេសទាំងពីរ។

ទិដ្ឋភាពនៃកិច្ចប្រជុំ (រូបថត៖ vnanet.vn)

ភាគីទាំងពីរបានអះអាងថា នឹងបន្តសហការរួមគ្នា ដើម្បីពង្រឹងទំនាក់ទំនងរវាងបក្សទាំងពីរ និងប្រទេសទាំងពីរ និងបញ្ជាក់ពីគោលនយោបាយឥតងាករេរបស់បក្សទាំងពីរ និងរដ្ឋទាំងពីរ ក្នុងការគាំទ្រ និងជួយគ្នាទៅវិញទៅមក ក្នុងបុព្វហេតុនៃការផ្លាស់ប្តូរថ្មី ការកសាង ការអភិវឌ្ឍ និងការការពារមាតុភូមិ ព្រមទាំងកំណត់ថា ទំនាក់ទំនងវៀតណាម-ឡាវ ឡាវ-វៀតណាម តែងតែជាអាទិភាពចម្បងនៅក្នុងគោលនយោបាយការបរទេសរបស់ប្រទេសនីមួយៗ។

ភាគីទាំងពីរបានបញ្ជាក់ថា នឹងសម្របសម្រួលយ៉ាងជិតស្និទ្ធលើបញ្ហាយុទ្ធសាស្ត្រទាក់ទងនឹងសន្តិសុខ និងការអភិវឌ្ឍ ហើយរួមគ្នារៀបចំមហាសន្និបាតបក្សនីមួយៗដោយជោគជ័យ។ មេដឹកនាំទាំងពីរបានសង្កត់ធ្ងន់ និងបញ្ជាក់ពីសារៈសំខាន់ជាយុទ្ធសាស្ត្រនៃការពង្រឹងបន្ថែមទៀតនូវសសរស្តម្ភនៃកិច្ចសហប្រតិបត្តិការការពារជាតិ សន្តិសុខ និងការបរទេស ដើម្បីរក្សាស្ថិរភាពនយោបាយ សន្តិសុខ និងសណ្តាប់ធ្នាប់សង្គម។

លោក To Lam អគ្គលេខាបក្សកុម្មុយនិស្តវៀតណាម  និងលោក Thongloun Sisoulith អគ្គលេខាបក្ស និងជាប្រធានរដ្ឋ​ឡាវ អញ្ជើញជាសហអធីបតីនៃកិច្ចប្រជុំ (រូប​ថត៖​ vnanet.vn)

នៅក្នុងកិច្ចប្រជុំ លោក Pham Minh Chinh នាយករដ្ឋមន្ត្រីវៀតណាម​ និងលោក Sonexay Siphandone នាយករដ្ឋមន្ត្រីឡាវ បានឯកភាពគ្នាក្នុងការលើកកម្ពស់កិច្ចសហប្រតិបត្តិការពាណិជ្ជកម្ម វិនិយោគ និងលើកកម្ពស់ការតភ្ជាប់ និងជួយគាំទ្រគ្នាទៅវិញទៅមករវាងខឿនសេដ្ឋកិច្ចទាំងពីរ ហើយ​និងដោះស្រាយការលំបាកនិងឧបសគ្គនៅក្នុងដំណើរការអនុវត្ត។ ភាគីទាំងពីរបានឯកភាពគ្នាក្នុងការលើកកម្ពស់កំណើននៃទំហំពាណិជ្ជកម្មទ្វេភាគី ដើម្បីសម្រេចបានគោលដៅ ៥ ពាន់លានដុល្លារអាមេរិក និងកំណត់គោលដៅ ១០ ពាន់លានដុល្លារអាមេរិក នាពេលខាងមុខ និងផ្តោតលើការប្រមូលធនធានដើម្បីអនុវត្តគម្រោងតភ្ជាប់ហេដ្ឋារចនាសម្ព័ន្ធសំខាន់ៗ ដូចជា គម្រោងផ្លូវល្បឿនលឿនហាណូយ-វៀងចន្ទន៍ ការជម្រុញការអនុវត្តគំរូតំបន់ឧស្សាហកម្មវៀតណាម-ឡាវ សេដ្ឋកិច្ចច្រកទ្វារព្រំដែនលើច្រករបៀងសេដ្ឋកិច្ចខាងកើត-ខាងលិច កសាងបរិយាកាសវិនិយោគ ធ្វើអាជីវកម្ម​​ និងការតភ្ជាប់ហេដ្ឋារចនាសម្ព័ន្ធ ដើម្បីបង្កើតលក្ខខណ្ឌអំណោយផលក្នុងការជម្រុញ​ការអភិវឌ្ឍប្រកបដោយចីរភាពនៃសហគ្រាសរបស់​ប្រទេសទាំងពីរ និងពង្រឹងការជួយគាំទ្រគ្នាទៅវិញទៅមករវាងសេដ្ឋកិច្ចទាំងពីរវៀតណាម-ឡាវ។

លើសពីនេះ វៀតណាម និងឡាវនឹងពង្រីកកិច្ចសហប្រតិបត្តិការរវាងបក្ស រដ្ឋ រណសិរ្ស អង្គការមហាជន និងអង្គការប្រជាជន ពង្រឹងការសម្របសម្រួល និងការគាំទ្រគ្នាទៅវិញទៅមកក្នុងការអភិវឌ្ឍសេដ្ឋកិច្ចសង្គម ក៏ដូចជាធានាសន្តិសុខ និងស្ថិរភាពនៅតំបន់ព្រំដែន ដែលរួមចំណែកដល់ការពង្រឹងទំនាក់ទំនងពិសេសរវាងប្រទេសទាំងពីរ៕

បកប្រែដោយ Duy Hoan