អ្នកយកព័ត៌មាន៖ តើលោកអាចប្រាប់អំពីលទ្ធផលលេចធ្លោនៃដំណើរ​ទស្សនកិច្ច​របស់ លោក Tran Thanh Man ប្រធានរដ្ឋសភា និងគណៈប្រតិភូជាន់ខ្ពស់វៀតណាមទៅកាន់សេណេហ្គាល់ ម៉ារ៉ុក និងស្វីសទេ?

លោក Dang Hoang Giang ៖ អាចបញ្ជាក់បានថា ដំណើរទស្សនកិច្ច​របស់ លោក Tran Thanh Man ប្រធានរដ្ឋសភា និងគណៈប្រតិភូលើកនេះ ទទួលបានជោគជ័យយ៉ាងត្រចះត្រចង់។ ដំណើរទស្សនកិច្ចនេះបានបើកដំណាក់កាលថ្មីក្នុងទំនាក់ទំនងរវាងវៀតណាម និងសេណេហ្គាល់ និងម៉ារ៉ុក បង្កើតសន្ទុះសម្រាប់កិច្ចសហប្រតិបត្តិការលើគ្រប់ជ្រុងជ្រោយ និងសំខាន់ៗលើគ្រប់វិស័យ ជាពិសេសសេដ្ឋកិច្ច ពាណិជ្ជកម្ម វិនិយោគ កសិកម្ម ទូរគមនាគមន៍។ល។

តាមរយៈកិច្ចពិភាក្សា កិច្ចប្រជុំ ការផ្លាស់ប្តូរ និងទំនាក់ទំនងទ្វេភាគី ថ្នាក់ដឹកនាំជាន់ខ្ពស់នៃប្រទេសនានាបានសម្តែងការចាប់អារម្មណ៍ចំពោះសមិទ្ធិផលអភិវឌ្ឍន៍សេដ្ឋកិច្ចសង្គមរបស់វៀតណាម ព្រមទាំង​​បានអះអាងនូវសារៈសំខាន់នៃទំនាក់ទំនងជាមួយវៀតណាម និងបានសម្តែងការប្តេជ្ញាចិត្តអភិវឌ្ឍន៍ទំនាក់ទំនងជាមួយវៀតណាមឱ្យកាន់តែ​ស៊ីជម្រៅ និងមានប្រសិទ្ធភាពថែម​ទៀត។

សេណេហ្គាល់បានស្វាគមន៍ និងត្រៀមខ្លួនជាស្រេចដើម្បីបង្កើតលក្ខខណ្ឌសម្រាប់សហគ្រាសបច្ចេកវិទ្យា និងសេវាកម្មវៀតណាមដើម្បីវិនិយោគ និងធ្វើអាជីវកម្មនៅសេណេហ្គាល់។ ប្រធានាធិបតីសេណេហ្គាល់ស្នើឱ្យវៀតណាមពិចារណាបើកការិយាល័យតំណាងការទូតនៅរដ្ឋធានីដាកាក្នុង​ពេល​ឆាប់ៗនេះ។ មេដឹកនាំម៉ារ៉ុកបានគាំទ្រប្រទេសទាំងពីរឱ្យឆាប់សិក្សា និងចរចាកិច្ចព្រមព្រៀងពាណិជ្ជកម្មថ្មីមួយ ហើយនិងស្នើឱ្យដំឡើងនូវក្របខ័ណ្ឌនៃកិច្ចសហប្រតិបត្តិការទ្វេភាគី និងសិក្សាពីលទ្ធភាពនៃការបង្កើតយន្តការសហប្រតិបត្តិការរួម ដោយមានការចូលរួមពីរដ្ឋសភា ក្រសួង ស្ថាប័ន និងសហគ្រាសនៃប្រទេសទាំងពីរ។ នៅសេណេហ្គាល់ ភាគីទាំងពីរបានដាក់ឲ្យដំណើរការសមាគមសមាជិកសភាមិត្តភាពរវាងប្រទេសទាំងពីរ ក្រោមអធិបតីភាពអនុប្រធានរដ្ឋសភាសេណេហ្គាល់ និងអនុលេខាគណៈកម្មាធិការបក្សនៃរដ្ឋសភាវៀតណាម។

leftcenterrightdel
លោក Dang Hoang Giang អនុរដ្ឋមន្ត្រីក្រសួងការបរទេសវៀតណាម

គួរកត់សម្គាល់ថា កិច្ចព្រមព្រៀងចំនួន ៨ ត្រូវបានចុះហត្ថលេខានៅក្នុងប្រទេសទាំងពីរ រួមទាំងឯកសារសំខាន់ៗដែលតម្រង់ទិសសម្រាប់ទំនាក់ទំនងរវាងវៀតណាម និងប្រទេសទាំងពីរនាពេលខាងមុខលើវិស័យផ្សេងៗ។ គួរកត់សម្គាល់ថាកិច្ចព្រមព្រៀងទាំងនោះរួមមានកិច្ចព្រមព្រៀងសហប្រតិបត្តិការជាមួយសភានៃប្រទេសទាំងពីរ កិច្ចព្រមព្រៀងសហប្រតិបត្តិការក្នុងវិស័យកសិកម្ម។ ព្រមទាំងកិច្ចព្រមព្រៀងសេដ្ឋកិច្ចដូចជាកិច្ចព្រមព្រៀងទិញអង្ករ ១០០០០០ តោនក្នុងមួយឆ្នាំរវាងវៀតណាម និងសេណេហ្គាល់។

ក្នុងសកម្មភាពរបស់ប្រធានរដ្ឋសភានៅប្រទេសស្វីស មានសេចក្តីសោមនស្សរីករាយដែលទាំងប្រធានព្រឹទ្ធសភា និងសភាតំណាងភាគីមិត្ត បាន​គាំទ្រការបន្តការចរចាលើកិច្ចព្រមព្រៀងពាណិជ្ជកម្មសេរីរវាងវៀតណាម និងសមាគមពាណិជ្ជកម្មសេរីអឺរ៉ុប (EFTA) ដែលស្វីសជាសមាជិកក្នុងឆ្នាំ ២០២៥ សំដៅបង្កើនពាណិជ្ជកម្មទ្វេភាគីឲ្យសមស្របនឹងសក្តានុពលនៃប្រទេសទាំងពីរ។ ភាគីទាំងពីរក៏បានផ្លាស់ប្តូរបទពិសោធន៍លើផ្នែកច្បាប់ ការត្រួតពិនិត្យ និងការសម្រេចចិត្តលើបញ្ហាសំខាន់ៗរបស់ប្រទេសជាតិផងដែរ។ ចែករំលែកបទពិសោធន៍របស់ប្រទេសស្វីសក្នុងវិស័យអភិវឌ្ឍន៍មជ្ឈមណ្ឌលហិរញ្ញវត្ថុអន្តរជាតិ បច្ចេកវិទ្យាហិរញ្ញវត្ថុ និងធនាគារ។ល។ ក្នុងសិក្ខាសាលាស្តីពីអនុសាសន៍សម្រាប់វៀតណាមក្នុងការកសាង និងប្រតិបត្តិការមជ្ឈមណ្ឌលហិរញ្ញវត្ថុអន្តរជាតិ ភាគីទាំងពីរបានចុះហត្ថលេខាលើកិច្ចព្រមព្រៀងសហប្រតិបត្តិការចំនួន៤។

អ្នកយកព័ត៌មាន៖ តើលោកអនុរដ្ឋមន្ត្រីអាចចែករំលែកឱ្យកាន់តែច្បាស់អំពីវិធានការអនុវត្តលទ្ធផលដែលសម្រេចបានក្នុងដំណើរ​ទស្សនកិច្ចនេះដែរឬទេ?

លោក Dang Hoang Giang៖ ដើម្បីអនុវត្តប្រកបដោយប្រសិទ្ធភាពនូវលទ្ធផលនៃដំណើរទស្សនកិច្ចការងារនោះ នាពេលខាងមុខ វៀតណាមនឹងរួមជាមួយនឹងដៃគូ Senegal, Morocco និង Switzerland បង្កើនការផ្លាស់ប្តូរគណៈប្រតិភូគ្រប់ជាន់ថ្នាក់ ជាពិសេសថ្នាក់េជាន់​ខ្ពស់ តាមរយៈបណ្តាញរដ្ឋសភា និងរដ្ឋាភិបាល និងសម្របសម្រួលរៀបចំឱ្យបានល្អដើម្បីអបអរសាទរខួបលើកទី ៥៥ នៃការបង្កើតទំនាក់ទំនងការទូតរវាងវៀតណាម និងស្វីស និងខួបលើកទី ៦៥ នៃការបង្កើតទំនាក់ទំនងការទូតរវាងវៀតណាម និងម៉ារ៉ុក ឆ្នាំ ២០២៦ ទន្ទឹមនឹងនោះ ក្រសួង ស្ថាប័នពាក់ព័ន្ធ និងមូលដ្ឋាននានា ត្រូវមានភាពសកម្ម និងប្តេជ្ញាចិត្តក្នុងការអនុវត្តកិច្ចព្រមព្រៀងដែលបានព្រមព្រៀងគ្នា ប្រកបដោយប្រសិទ្ធភាព ជាក់ស្តែង និងទទួលបានលទ្ធផលជាក់លាក់។

អ្នកយកព័ត៌មាន៖ តើលោកអាចប្រាប់អំពីលទ្ធផលនៃសន្និសីទប្រធានសភាពិភពលោកលើកទី៦ និងការរួមចំណែករបស់គណៈប្រតិភូវៀតណាមក្នុងសន្និសីទបានទេ?

លោក Dang Hoang Giang៖ សហភាពអន្តរសភា (IPU) គឺជាស្ថាប័នសភាពហុភាគីធំជាងគេបំផុតនៅលើពិភពលោក។ ការចូលរួមរបស់ លោក Tran Thanh Man ប្រធានរដ្ឋសភាវៀតណាម ក្នុងសន្និសីទគឺមានសារៈសំខាន់ខ្លាំងណាស់ ដែលបង្ហាញថា វៀតណាមជាសមាជិកដែលមានការទទួលខុសត្រូវ ចូលរួមយ៉ាងសកម្មក្នុងសកម្មភាពរួមរបស់ IPU និងការប្តេជ្ញាចិត្តយ៉ាងម៉ឺងមាត់របស់វៀតណាមចំពោះពហុភាគីនិយមក្នុងបរិបទរបស់អង្គការសហប្រជាជាតិ និងយន្តការពហុភាគីប្រឈមមុខនឹងបញ្ហាជាច្រើន។

ក្នុងនាមជាមេដឹកនាំដំបូងគេដែលថ្លែងសុន្ទរកថានៅក្នុងសន្និសីទនោះ ប្រធានរដ្ឋសភាបានបង្ហាញសារមួយត្រឹមត្រូវ និងសមស្របតាមប្រធានបទរួមនៃសន្និសីទ ក៏ដូចជាសុន្ទរកថារបស់ប្រទេសនានា ពោលគឺជំរុញកិច្ចសហប្រតិបត្តិការ សាមគ្គីភាពសភា និងពហុភាគីនិយម ដើម្បីផ្តល់ផលប្រយោជន៍ដល់ប្រជាជនទាំងអស់ក្នុងពិភពលោក។

សកម្មភាពរបស់ប្រធានរដ្ឋសភា និងគណៈប្រតិភូក្នុងសន្និសីទបានរួមវិភាគទានលើកកំពស់តួនាទី​របស់វៀតណាមនិយាយរួម និងរដ្ឋសភាវៀតណាមនិយាយដោយឡែកលើឆាកអន្តរជាតិ។ ដៃគូអន្តរជាតិបានវាយតំលៃខ្ពស់ចំពោះតួនាទីសកម្ម និងទំនួលខុសត្រូវរបស់រដ្ឋសភាវៀតណាមក្នុងវេទិកាពហុភាគី ដោយបង្ហាញពីបំណងចង់បន្តកិច្ចសហប្រតិបត្តិការ និងសម្របសម្រួលកាន់តែជិតស្និទ្ធ ជាក់ស្តែង និងមានប្រសិទ្ធភាពជាមួយវៀតណាម៕

អ្នកយកព័ត៌មាន៖ អរគុណលោកអនុរដ្ឋមន្ត្រី!

បកប្រែដោយ Duy Hoan