ក្នុងកិច្ចពិភាក្សាទាំងនេះ  លោកអនុរដ្ឋមន្ត្រី Dang Hoang Giang វាយតំលៃខ្ពស់ចំពោះការសម្របសម្រួលរបស់បណ្តាឯកអគ្គរដ្ឋទូតក្នុងការត្រៀមរៀបចំ និងការគាំទ្រដំណើរទស្សនកិច្ចការងាររបស់លោក Tran Thanh Man ប្រធានរដ្ឋសភាវៀតណាម និងលោកជំទាវ រួមទាំងគណៈប្រតិភូជាន់ខ្ពស់វៀតណាមអញ្ជើញទៅចូលរួមសន្និសីទថ្នាក់ប្រធានរដ្ឋសភាពិភពលោក (IPU) លើកទី៦ នៅប្រទេសស្វីស និងចូលរួមសកម្មភាពទ្វេភាគីនៅប្រទេសស្វីស និងទស្សនកិច្ចជាផ្លូវការទៅប្រទេសម៉ារ៉ុក និងសេណេហ្គាល់ពីថ្ងៃទី២២ ដល់ថ្ងៃទី៣០ ខែកក្កដា។

leftcenterrightdel
លោក Dang Hoang Giang អនុរដ្ឋមន្ត្រីក្រសួងការបរទេស ទទួលជួបលោក Aldo de Luca ភារធារីសហព័ន្ធស្វីសប្រចាំវៀតណាម

លោកអនុរដ្ឋមន្ត្រី Dang Hoang Giang បានអះអាងថា ដំណើរទស្សនកិច្ចការងាររបស់លោក Tran Thanh Man ប្រធានរដ្ឋសភាវៀតណាម បង្ហាញពីការគោរពរបស់វៀតណាមចំពោះ IPU ក៏ដូចជាទំនាក់ទំនងសហប្រតិបត្តិការប្រពៃណីជាមួយសេណេហ្គាល់ ម៉ារ៉ុក ស្វីស ជាពិសេសប្រទេសទាំងបីជាសមាជិកនៃសហគមន៍ Francophonie។

លោកអនុរដ្ឋមន្ត្រី Dang Hoang Giang សង្ឃឹមថា ដំណើរទស្សនកិច្ចការងារលើកនេះនឹងសម្រេចបានលទ្ធផលជាក់ស្ដែង ជាពិសេសលើវិស័យពាណិជ្ជកម្ម វិនិយោគ កសិកម្ម អភិវឌ្ឍន៍ប្រកបដោយចីរភាព នវានុវត្តន៍ ធ្វើជាមូលដ្ឋានសម្រាប់ទំនាក់ទំនងទ្វេភាគីរវាងវៀតណាមជាមួយសេណេហ្គាល់ និងម៉ារ៉ុក និងស្វីស កាន់តែស៊ីជម្រៅ និងមានប្រសិទ្ធភាព នាំមកនូវផលប្រយោជន៍ជាក់ស្តែងដល់ប្រទេសនីមួយៗ រួមចំណែកដល់សន្តិភាព ស្ថិរភាព អភិវឌ្ឍន៍ក្នុងតំបន់ និងពិភពលោក។

leftcenterrightdel
លោក Dang Hoang Giang អនុរដ្ឋមន្ត្រីក្រសួងការបរទេស និងលោក Jamale Chouaibi ឯកអគ្គរាជទូតនៃព្រះរាជាណាចក្រម៉ារ៉ុកប្រចាំវៀតណាម

ឯកអគ្គរដ្ឋទូតនៃប្រទេសសេណេហ្គាល់ ម៉ារ៉ុក និងស្វីស បានអះអាងនូវការយកចិត្តទុកដាក់យ៉ាងខ្លាំងចំពោះដំណើរទស្សនកិច្ចការងារលើកនេះរបស់លោក Tran Thanh Man ប្រធានរដ្ឋសភាវៀតណាម ព្រមទាំងជឿជាក់ថា ដំណើរទស្សនកិច្ចនេះនឹងបើកទំព័រថ្មីក្នុងទំនាក់ទំនងជាមួយប្រទេសនានា និងជាឱកាសពង្រីកកិច្ចសហប្រតិបត្តិការក្នុងវិស័យថ្មី រួមចំណែកជំរុញការផ្លាស់ប្តូររវាងមូលដ្ឋាននានានៃវៀតណាមនិងប្រទេសនានា។

ឯកអគ្គរដ្ឋទូតទាំងនេះ បានឯកភាពគ្នានឹងបន្តសហការយ៉ាងជិតស្និទ្ធជាមួយស្ថាប័ន និងអង្គភាពនានានៃក្រសួងការបរទេស ទីភ្នាក់ងារនៃរដ្ឋសភា និងក្រសួង ស្ថាប័នពាក់ព័ន្ធ ដើម្បីជំរុញនិងរៀបចំដំណើរទស្សនកិច្ចការងាររបស់លោកប្រធានរដ្ឋសភាវៀតណាមប្រកបដោយជោគជ័យ៕

បកប្រែដោយ Pham Diep