លោក Pham Minh Chinh នាយករដ្ឋមន្ត្រី ជួបសន្ទនាជាមួយប្រធានាធិបតីប្រេស៊ីល

នៅក្នុងជំនួប លោក Pham Minh Chinh នាយករដ្ឋមន្ត្រីបានសង្កត់ធ្ងន់ថា ទំនាក់ទំនងរវាងប្រទេសទាំងពីរកំពុងអភិវឌ្ឍយ៉ាងល្អប្រសើរ។ នាពេលថ្មីៗនេះ ស្ថាប័ននៃភាគីទាំងពីរបានអនុវត្តយ៉ាងសកម្មនូវសេចក្តីថ្លែងការណ៍រួមស្តីពីដំណើរទស្សនកិច្ចផ្លូវរដ្ឋនៅវៀតណាមរបស់លោក Luiz Inacio Lula da Silva ប្រធានាធិបតីប្រេស៊ីល (ខែមីនា ឆ្នាំ ២០២៥) និងផែនការសកម្មភាពអនុវត្តទំនាក់ទំនងភាពជាដៃគូយុទ្ធសាស្ត្រ វៀតណាម-ប្រេស៊ីល ដំណាក់កាល ២០២៥-២០៣០។

លោក Pham Minh Chinh នាយករដ្ឋមន្ត្រីវៀតណាម និងលោក Luiz Inacio Lula da Silva ប្រធានាធិបតីប្រេស៊ីល (រូបថត៖ baochinhphu.vn)

ថ្នាក់ដឹកនាំទាំងពីរបានឯកភាពបន្តអនុវត្តវិធានការនានាដើម្បីពង្រឹងទំនាក់ទំនងទ្វេភាគីក្នុងក្របខ័ណ្ឌនៃទំនាក់ទំនងភាពជាដៃគូយុទ្ធសាស្ត្រ រួមទាំងការរក្សាការជួបជុំ និងការផ្លាស់ប្តូរគណៈប្រតិភូថ្នាក់ជាន់ខ្ពស់ បង្កើនទំនុកចិត្តនយោបាយ សម្របសម្រួលការអនុវត្តប្រកបដោយប្រសិទ្ធភាពនូវកិច្ចព្រមព្រៀងសំខាន់ៗដែលសម្រេចបាន។

ថ្នាក់ដឹកនាំទាំងពីរក៏បានឯកភាពជំរុញកិច្ចសហប្រតិបត្តិការលើវិស័យការពារជាតិ និងសន្តិសុខ រួមទាំងពាណិជ្ជកម្មការពារជាតិ ការផ្ទេរបច្ចេកវិទ្យា ការជំរុញកិច្ចសហប្រតិបត្តិការវិទ្យាសាស្ត្រ និងបច្ចេកវិទ្យា ការអភិវឌ្ឍធនធានមនុស្សប្រកបដោយគុណភាពខ្ពស់ ការកេងប្រវ័ញ្ច និងធ្វើពាណិជ្ជកម្មសារធាតុរ៉ែ អេតាណុល និងជីវម៉ាស ការធ្វើបរិវត្តកម្មឌីជីថល semiconductor និងបញ្ញាសិប្បនិម្មិត និងយុត្តិធម៌។

លោក Pham Minh Chinh នាយករដ្ឋមន្ត្រីវៀតណាម ជួបសន្ទនាជាមួយលោក Luiz Inacio Lula da Silva ប្រធានាធិបតីប្រេស៊ីល (រូបថត៖ baochinhphu.vn)

លោក Pham Minh Chinh នាយករដ្ឋមន្ត្រីវៀតណាម ជួបសន្ទនាជាមួយលោក Luiz Inacio Lula da Silva ប្រធានាធិបតីប្រេស៊ីល (រូបថត៖ baochinhphu.vn)

ភាគីទាំងពីរបានឯកភាពបន្តជំរុញការចរចាសំដៅចុះហត្ថលេខាលើឯកសារសហប្រតិបត្តិការលើវិស័យគាំពារការវិនិយោគ ការជៀសវាងការយកពន្ធត្រួតគ្នា និងការសម្រួលទិដ្ឋាការរវាងប្រជាពលរដ្ឋនៃប្រទេសទាំងពីរ។

ថ្នាក់ដឹកនាំទាំងពីរបានសម្តែងការពេញចិត្តចំពោះលទ្ធផលវិជ្ជមាន និងជាក់ស្តែងក្នុងការបើកទីផ្សារកសិកម្មនៃប្រទេសទាំងពីរ។ ក្នុងឱកាសនេះ ប្រេស៊ីលបាននាំចេញឡូសាច់គោដំបូងទៅកាន់ប្រទេសវៀតណាម ហើយវៀតណាមបាននាំចេញត្រីត្រា បាសា និងត្រីកន្រ្តប់ដំបូងទៅកាន់ប្រទេសប្រេស៊ីល រួមចំណែកលើកកំពស់ប្រសិទ្ធភាពនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្ម នាំមកនូវផលប្រយោជន៍ជាក់ស្តែងដល់ប្រជាជន និងធុរកិច្ចនៃប្រទេសទាំងពីរ។

ថ្នាក់ដឹកនាំទាំងពីរបានឯកភាពដឹកនាំរដ្ឋមន្ត្រីឱ្យអនុវត្តភ្លាមៗនូវលទ្ធផលជាក់លាក់នៃកិច្ចពិភាក្សា ដើម្បីសម្រេចឱ្យបានឆាប់រហ័ស និងនាំមកនូវផលប្រយោជន៍ជាក់ស្តែងដល់ធុរកិច្ចនៃប្រទេសទាំងពីរ ជាពិសេសក្នុងការជំរុញការបើកទីផ្សារសម្រាប់ទំនិញ កសិផល និងជលផលក្នុងបរិបទនៃពាណិជ្ជកម្មពិភពលោកកំពុងវិវឌ្ឍដ៏ស្មុគស្មាញនាពេលបច្ចុប្បន្ននេះ។

ភាគីទាំងពីរក៏បានឯកភាពបន្តជំរុញការផ្លាស់ប្តូរប្រជាជន និងយុវជនរវាងប្រទេសទាំងពីរ ជំរុញសន្តិភាព សាមគ្គីភាព និងមិត្តភាព តាមរយៈសកម្មភាពនានាដូចជាកិច្ចសហប្រតិបត្តិការកីឡា និងការផ្លាស់ប្តូរការសិក្សា បង្កើតលក្ខខណ្ឌអំណោយផលសម្រាប់សហគមន៍អាណិកជនវៀតណាម និងប្រេស៊ីលធ្វើសមាហរណកម្ម និងរួមចំណែកកាន់តែច្រើននៅក្នុងប្រទេសនីមួយៗ។

អំពីបញ្ហាអន្តរជាតិ និងតំបន់ ថ្នាក់ដឹកនាំទាំងពីរបានចាត់ទុកថា ចាំបាច់ត្រូវបន្តជំរុញការសម្របសម្រួល និងកិច្ចសហប្រតិបត្តិការលើបញ្ហាអភិបាលកិច្ចសកល កំណែទម្រង់អង្គការសហប្រជាជាតិ ការកាត់បន្ថយភាពក្រីក្រ និងការប្រយុទ្ធប្រឆាំងនឹងការប្រែប្រួលអាកាសធាតុ។ ភាគីទាំងពីរបានឯកភាពបន្តពង្រឹងការគាំទ្រគ្នាទៅវិញទៅមកនៅវេទិកាអន្តរជាតិ និងតំបន់ ជាពិសេសនៅអង្គការសហប្រជាជាតិ អង្គការពាណិជ្ជកម្មពិភពលោក ចលនាមិនចូលបក្សសម្ព័ន្ធ កិច្ចសហប្រតិបត្តិការត្បូង-ត្បូង និងសហភាពអន្តរសភា (IPU)។

ភាគីទាំងពីរបានអះអាងនូវសារៈសំខាន់នៃការរក្សាសន្តិភាព ស្ថិរភាព សន្តិសុខ សេរីភាពនៃការធ្វើនាវាចរណ៍ និងអាកាសចរណ៍នៅតំបន់សមុទ្រ រួមទាំងសមុទ្រខាងកើត ដោយឈរលើមូលដ្ឋានគោរពផលប្រយោជន៍របស់ប្រទេសជាប់មាត់សមុទ្រ ស្របតាមច្បាប់អន្តរជាតិ ជាពិសេសអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ឆ្នាំ ១៩៨២៕

បកប្រែដោយ Huyen Trang