សិក្ខាសាលាវិទ្យាសាស្ត្រ "លោកប្រធានហូជីមិញជាមួយការអប់រំ ការអប់រំជាមួយលោកប្រធានហូជីមិញ"

លោក Nguyen Trong Nghia មានប្រសាសន៍ក្នុង​សិក្ខាសាលា

សិក្ខាសាលានេះត្រូវបានគណៈឃោសនាអប់រំ និងចលនាមហាជនមជ្ឈិមបក្ស សម្របសម្រួលជាមួយក្រសួងអប់រំ និងបណ្តុះបណ្តាល ដែលប្រគល់ឲ្យ​មហាវិទ្យាល័យវិទ្យាសាស្ត្រសង្គម និងមនុស្សសាស្ត្រ នៃសកលវិទ្យាល័យជាតិហាណូយ រៀបចំឡើងក្នុងឱកាសអបអរសាទរខួបលើកទី ១៣៥ នៃទិវាកំណើតលោកប្រធានហូជីមិញ និងខួបលើកទី ៨០ នៃថ្ងៃលោកប្រធានហូជីមិញផ្ញើលិខិតដំបូងគេបង្អស់ជូនសិស្សានុសិស្ស និងលោកគ្រូអ្នកគ្រូ (ខែកញ្ញា ឆ្នាំ១៩៤៥ / ខែកញ្ញា ឆ្នាំ២០២៥) និងខួបលើកទី ៨០ នៃការបង្កើតក្រសួងអប់រំជាតិ (បច្ចុប្បន្នជាក្រសួងអប់រំ និងបណ្តុះបណ្តាល)។

សិក្ខាសាលាវិទ្យាសាស្ត្រ "លោកប្រធានហូជីមិញជាមួយការអប់រំ ការអប់រំជាមួយលោកប្រធានហូជីមិញ"

សិក្ខាសាលានេះបានទទួលបទអន្តរគមន៍ចំនួន ១២០ រួមចំណែកដល់ការបូកសរុបទ្រឹស្តី និងការអនុវត្តជាក់ស្តែង។ សិក្ខាសាលានេះគឺជាឱកាសមួយដើម្បីរំលឹកឡើងវិញ និងធ្វើឲ្យស៊ីជម្រៅថែមទៀតនូវតម្លៃនៃមនោគមវិជ្ជា រចនាបទ និងមរតកក្នុងវិស័យអប់រំរបស់លោកប្រធានហូជីមិញ អាស្រ័យលើនេះ បង្កើនការយល់ដឹង និងផ្សព្វផ្សាយមនោគមវិជ្ជារបស់លោកប្រធានហូជីមិញក្នុងបុព្វហេតុអប់រំលើគ្រប់ជ្រុងជ្រោយ និងបណ្តុះបណ្តាលមនុស្សវៀតណាមថ្មី។

ប្រតិភូអញ្ជើញ​ចូល​រួម​សិក្ខាសាលា

មានប្រសាសន៍ក្នុងសិក្ខាសាលា លោក Nguyen Trong Nghia បានសង្កត់ធ្ងន់ថា ការដកមេរៀនបទពិសោធន៍ពីមនោគមវិជ្ជា​របស់លោកប្រធានហូជីមិញ ដើម្បីអនុវត្តប្រកបដោយប្រសិទ្ធភាពក្នុងការគ្រប់គ្រង អប់រំ និងបណ្តុះបណ្តាលមនុស្សវៀតណាមអភិវឌ្ឍប្រកបដោយសុខដុមរមនាខាងសីលធម៌ បញ្ញា គំនិតច្នៃប្រឌិត សោភ័ណភាព បំណិនជីវិត និងជំនាញវិជ្ជាជីវៈ ព្រមទាំងជំរុញស្មារតីសិក្សាដោយខ្លួនឯង និងរៀនសូត្រពេញមួយជីវិត។ ទន្ទឹមនឹងនោះ ត្រូវកសាងមនុស្សជំនាន់ក្រោយ ហ៊ានគិត ហ៊ានធ្វើ ហ៊ានទទួលខុសត្រូវ និងមានឆន្ទៈចូលរួមចំណែកដើម្បីប្រយោជន៍រួម។

សិក្ខាសាលាបានរួមចំណែកជាក់ស្តែងក្នុងការដាក់ចេញដំណោះស្រាយសម្រាប់​ជំនះលំបាក និងដោះស្រាយបញ្ហាស្នូលក្នុងវិស័យអប់រំ រួមចំណែកផ្តល់យោបល់ជូនការិយាល័យនយោបាយក្នុងការប្រកាសចេញ និងអនុវត្តសេចក្តីសម្រេចចិត្តសំខាន់ៗ ប្រកបដោយប្រសិទ្ធភាព បង្កើតរបកគំហើញ និងជំរុញវិស័យអប់រំឲ្យ​មានការអភិវឌ្ឍយ៉ាងខ្លាំងក្លា​ថែម​ទៀត​ក្នុងសម័យកាលថ្មី៕

បកប្រែដោយ Duy Hoan