សក្ដានុពល និងលទ្ធភាពសម្រាប់កិច្ចសហប្រតិបត្តិការរវាងខេត្តក្វាងស៊ី (ចិន) និងតំបន់នានារបស់វៀតណាមនៅតែមានច្រើនណាស់

នេះជាការអះអាងរបស់លោក Pham Thanh Binh ឯកអគ្គរដ្ឋទូតវៀតណាមប្រចាំនៅប្រទេសចិន ក្នុងជំនួបជាមួយក្រុមការងារនៃតំបន់ស្វយ័ត Zhuang (ខេត្ត Guangxi) ដឹកនាំដោយលោក Liao Pinhu អនុប្រធាននៃតំបន់ស្វយ័ត Zhuang ដែលបានមកជួបសម្តែងការគួរសមនារសៀលថ្ងៃទី៨ ខែឧសភា នៅទីក្រុងប៉េកាំង ប្រទេសចិន។

លោក Pham Thanh Binh ឯកអគ្គរដ្ឋទូតវៀតណាមប្រចាំនៅប្រទេសចិន ទទួលជួបលោក Liao Pinhu អនុប្រធាននៃតំបន់ស្វយ័ត Zhuang ខេត្ត Guangxi (រូបថត៖ ស្ថានទូតវៀតណាមប្រចាំនៅប្រទេសចិន)

លោកឯកអគ្គរដ្ឋទូតបានអះអាងថា កិច្ចសហប្រតិបត្តិការរវាងមូលដ្ឋាននានាតែងតែជាចំណុចភ្លឺក្នុងទំនាក់ទំនងវៀតណាម-ចិន។ វៀតណាមជានិច្ចកាលវាយតម្លៃខ្ពស់ចំពោះយន្តការសហប្រតិបត្តិការរវាងខេត្តក្វាងស៊ី និងមូលដ្ឋាននានារបស់វៀតណាម ជាពិសេសជាមួយខេត្តដែលជាប់ព្រំដែន។

នៅក្នុងជំនួបនេះ ភាគីទាំងពីរបានពិភាក្សាអំពីវិធានការជាក់ស្តែងលើការកសាងច្រកទ្វារព្រំដែនឆ្លាតវៃនៅតំបន់ព្រំដែនគោកវៀតណាម-ចិន ជំរុញកិច្ចសហប្រតិបត្តិការពាណិជ្ជកម្មឆ្លងដែន ដើម្បីបន្តជំរុញកិច្ចសហប្រតិបត្តិការរវាងខេត្តក្វាងស៊ី និងមូលដ្ឋាននានារបស់វៀតណាមឲ្យកាន់តែជាក់ស្តែងថែមទៀត អនុវត្តប្រកបដោយប្រសិទ្ធភាពនូវទស្សនៈរួមរបស់ថ្នាក់ដឹកនាំនៃប្រទេសទាំងពីរ៕

បកប្រែដោយ Huyen Trang