វៀតណាមវាយតំលៃខ្ពស់ចំពោះការលះបង់ដ៏ធំធេងរបស់លោក Khamtay Siphandone ចំពោះទំនាក់ទំនងវៀតណាម-ឡាវ

ក្នុងឱកាសនេះ លោក Pham Minh Chinh នាយករដ្ឋមន្ត្រីបានមានជំនួប និងជួបសវនាការជាមួយលោក Thongloun Sisoulith អគ្គលេខាបក្ស និងជាប្រធានរដ្ឋឡាវ និងលោក Sonexay Siphandone នាយករដ្ឋមន្ត្រីឡាវ។

លោក Pham Minh Chinh នាយករដ្ឋមន្ត្រីវៀតណាម ដឹកនាំគណៈប្រតិភូជាន់ខ្ពស់បក្ស និងរដ្ឋវៀតណាម អញ្ជើញចូលរួមពិធីគោរពវិញ្ញាណក្ខន្ធលោក Khamtay Siphandone (រូបថត៖ vnanet.vn)

នៅក្នុងជំនួបទាំងនេះ ក្នុងនាមបក្ស រដ្ឋ និងប្រជាជនវៀតណាម លោក Pham Minh Chinh នាយករដ្ឋមន្ត្រីបានសម្តែងនូវសមានទុក្ខសោកស្តាយ និងចូលរួមរំលែកទុក្ខយ៉ាងក្រៀមក្រំបំផុតជូនបក្ស រដ្ឋ ប្រជាជនឡាវ និងក្រុមគ្រួសារលោក Khamtay Siphandone។ លោក Pham Minh Chinh នាយករដ្ឋមន្ត្រីបានសម្តែងការកោតសរសើរចំពោះការរួមចំណែកដ៏ធំធេងក្នុងប្រវត្តិសាស្ត្រកសាង និងអភិវឌ្ឍប្រទេសឡាវ និងចលនាបដិវត្តន៍នៃប្រទេសឥណ្ឌូចិនទាំងបីរបស់លោក Khamtay Siphandone សមាជិកបក្សកុម្មុយនិស្តឥណ្ឌូចិន។

លោក Pham Minh Chinh នាយករដ្ឋមន្ត្រី រំលែកទុក្ខជាមួយលោក Thongloun Sisoulith អគ្គលេខាបក្ស និងជាប្រធានរដ្ឋឡាវ ចំពោះមរណភាពរបស់លោក Khamtay Siphandone (រូបថត៖ vnanet.vn)

លោក Pham Minh Chinh នាយករដ្ឋមន្ត្រីបានអះអាងថា បក្ស រដ្ឋ និងប្រជាជនវៀតណាមចងចាំជានិច្ចនូវការលះបង់ ការរួមវិភាគទានដ៏ធំធេងរបស់លោក Khamtay Siphandone ដែលជាមិត្តដ៏ល្អ ជិតស្និទ្ធ ស្មោះត្រង់ ដែលជាមេដឹកនាំបានដើរតួនាទីយ៉ាងសំខាន់ក្នុងការកសាង ពូនជ្រំ និងអភិវឌ្ឍទំនាក់ទំនងសាមគ្គីភាពពិសេសវៀតណាម-ឡាវ។ លោកនាយករដ្ឋមន្ត្រីមានជំនឿយ៉ាងមុតមាំថា បក្ស រដ្ឋ និងប្រជាជនឡាវនឹងប្រែក្លាយការបាត់បង់ ទុក្ខសោកនេះទៅជាប្រភពកម្លាំងដ៏ធំធេងក្នុងការកសាង និងអភិវឌ្ឍប្រទេសឡាវឱ្យកាន់តែរឹងមាំថែមទៀត។

ក្នុងឱកាសនេះ ថ្នាក់ដឹកនាំនៃប្រទេសទាំងពីរក៏បានជួបពិភាក្សាគ្នាអំពីស្ថានភាពអភិវឌ្ឍន៍សេដ្ឋកិច្ច-សង្គម និងការផ្តល់អាទិភាពបច្ចុប្បន្នរបស់ប្រទេសនីមួយៗ។ លោក Pham Minh Chinh នាយករដ្ឋមន្ត្រី បានជូនដំណឹងអំពីការត្រៀមរៀបចំមហាសន្និបាតបក្សទូទាំងប្រទេសលើកទី ១៤ ការរៀបចំឡើងវិញនូវរចនាសម្ព័ន្ធចាត់តាំងនៃក្បាលម៉ាស៊ីនរដ្ឋតម្រង់ទិស បង្រួម ចំណាន ឆ្ពោះទៅរកប្រសិទ្ធភាព និងសម្រេចបានគោលដៅអភិវឌ្ឍន៍សេដ្ឋកិច្ចសង្គមរបស់វៀតណាម។

លោក Pham Minh Chinh នាយករដ្ឋមន្ត្រី និងថ្នាក់ដឹកនាំជាន់ខ្ពស់ឡាវបានអះអាងថា ទោះស្ថិតក្នុងកាលៈទេសៈណាក៏ដោយ បក្ស រដ្ឋ និងប្រជាជនវៀតណាម និងឡាវ នឹងបន្តខិតខំប្រឹងប្រែងឱ្យអស់ពីសមត្ថភាពដើម្បីរក្សា និងលើកកម្ពស់ទំនាក់ទំនងមិត្តភាព សាមគ្គីភាពពិសេស និងកិច្ចសហប្រតិបត្តិការលើគ្រប់វិស័យរវាងវៀតណាម និងឡាវ ឱ្យស្ថិតស្ថិរជានិរន្តរភាព និងបន្តទំនាក់ទំនងដ៏ល្អ ជិតស្និទ្ធនេះទៅជំនាន់ក្រោយជារៀងរហូត៕

បកប្រែដោយ Minh Trung