ជះឥទ្ធិពលយ៉ាងខ្លាំងដល់ការអភិវឌ្ឍទំនាក់ទំនងវៀតណាម-ចិន

នៅថ្ងៃទី ១៥ ខែមេសា សារព័ត៌មាន Reuters បានរាយការណ៍ថា ក្នុងដំណើរទស្សនកិច្ចទៅកាន់ប្រទេសវៀតណាម លោក Xi Jinping អគ្គលេខាបក្ស និងជាប្រធានរដ្ឋចិន បានអំពាវនាវឱ្យប្រទេសទាំងពីរពង្រឹងទំនាក់ទំនងពាណិជ្ជកម្ម បង្កើនកិច្ចសហប្រតិបត្តិការក្នុងខ្សែសង្វាក់ផ្គត់ផ្គង់ ក៏ដូចជាក្នុងវិស័យបញ្ញាសិប្បនិម្មិត និងសេដ្ឋកិច្ចបៃតង។ នាថ្ងៃទី ១៤ មេសា បន្ទាប់ពីបានជួបពិភាក្សាការងារជាមួយលោក To Lam អគ្គលេខាបក្សកុម្មុយនិស្តវៀតណាម មេដឹកនាំទាំងពីរបានមើល និងស្តាប់ការណែនាំអំពីកិច្ចព្រមព្រៀងសហប្រតិបត្តិការចំនួន ៤៥ លើវិស័យជាច្រើន ដែលបានចុះហត្ថលេខារវាងក្រសួង ស្ថាប័ន និងមូលដ្ឋាននានា នៃប្រទេសទាំងពីរ រួមទាំងកិច្ចព្រមព្រៀងសហប្រតិបត្តិការលើខ្សែសង្វាក់ផ្គត់ផ្គង់ និងផ្លូវដែកផងដែរ។

ទន្ទឹមនឹងនោះ កាសែតអង់គ្លេស The Guardian បានវាយតម្លៃខ្ពស់ចំពោះការចុះហត្ថលេខាលើកិច្ចព្រមព្រៀងសហប្រតិបត្តិការចំនួន ៤៥ រវាងចិន និងវៀតណាមលើវិស័យជាច្រើន។ កាសែតនេះបានអត្ថាធិប្បាយថា ដំណើរទស្សនកិច្ចរបស់លោក Xi Jinping អគ្គលេខាបក្ស និងជាប្រធានរដ្ឋចិន ទៅកាន់ប្រទេសវៀតណាម បានបើកឱកាសសម្រាប់ប្រទេសចិនក្នុងការពង្រឹងទំនាក់ទំនងជាមួយប្រទេសជិតខាងរបស់ខ្លួន ព្រមទាំងជាដៃគូពាណិជ្ជកម្មដ៏សំខាន់ផងដែរ។

លោកអគ្គលេខាបក្ស To Lam និងលោក Xi Jinping អគ្គលេខាបក្ស និងជាប្រធានរដ្ឋចិន

យោងតាមសារព័ត៌មាន CNN បានឲ្យដឹងថា វៀតណាមគឺជាដៃគូពាណិជ្ជកម្មដ៏ធំបំផុតរបស់ចិននៅអាស៊ីអាគ្នេយ៍ ហើយដំណើរទស្សនកិច្ចរបស់ លោក Xi Jinping អគ្គលេខាបក្ស និងជាប្រធានរដ្ឋចិន មានគោលបំណងពង្រឹងបន្ថែមទៀតនូវទំនាក់ទំនងមិត្តភាពរវាងប្រទេសទាំងពីរ។ CNN បានឲ្យដឹងថា ក្នុងប៉ុន្មានឆ្នាំថ្មីៗនេះ ការវិនិយោគរបស់ចិននៅវៀតណាមបានកើនឡើងយ៉ាងខ្លាំង។ ទំហំពាណិជ្ជកម្មទ្វេភាគីរវាងប្រទេសទាំងពីរក៏មានការកើនឡើងយ៉ាងឆាប់រហ័សផងដែរ។ ក្នុងដំណើរទស្សនកិច្ចនៅវៀតណាម លោក Xi Jinping អគ្គលេខាបក្ស និងជាប្រធានរដ្ឋចិន បានសង្កត់ធ្ងន់ថា ចិន និងវៀតណាមគួរតែសហការដើម្បីរក្សាស្ថិរភាពនៃប្រព័ន្ធពាណិជ្ជកម្មសេរីសកល ព្រមទាំងខ្សែសង្វាក់ផ្គត់ផ្គង់ និងឧស្សាហកម្ម។ លោកបានបញ្ជាក់ថាទីផ្សារធំរបស់ចិនតែងតែបើកទ្វារសម្រាប់វៀតណាម។ ក្នុងបរិបទដែលសេដ្ឋកិច្ចពិភពលោកប្រឈមមុខនឹងការលំបាកជាច្រើន ការពង្រឹងកិច្ចសហប្រតិបត្តិការនឹងជួយឱ្យប្រទេសទាំងពីរមានការរីកចម្រើនខ្លាំង​ក្លា​ និងបន្តឆ្ពោះទៅមុខទៀត។

នាថ្ងៃដដែល កាសែត The Rio Times (ប្រេស៊ីល) បានបញ្ជាក់ថា ដំណើរទស្សនកិច្ចរបស់លោក Xi Jinping អគ្គលេខាបក្ស និងជាប្រធានរដ្ឋចិន ទៅកាន់វៀតណាមបានពង្រឹងភាពជាដៃគូសេដ្ឋកិច្ចថ្មីរវាងប្រទេសទាំងពីរ។ កាសែត Rio Times បានពិនិត្យឡើងវិញនូវលទ្ធផលលេចធ្លោនៃកិច្ចសហប្រតិបត្តិការសេដ្ឋកិច្ចរវាងវៀតណាម និងចិន ដោយសង្កត់ធ្ងន់ថា ទំហំពាណិជ្ជកម្មទ្វេភាគីមានការកើនឡើងគួរឲ្យចាប់អារម្មណ៍ លើសពី ២៦០ ពាន់លានដុល្លារនៅឆ្នាំ ២០២៤។ យោងតាមគេហទំព័រព័ត៌មាន ការវិនិយោគរបស់ចិននៅវៀតណាមសម្រេចបាន១.៩៧ ពាន់លានដុល្លារក្នុងរយៈពេលពីខែមករាដល់ខែសីហា ឆ្នាំ២០២៤។ ប្រទេសចិនគឺជាដៃគូពាណិជ្ជកម្មដ៏ធំបំផុតរបស់វៀតណាមក្នុងរយៈពេលជាង ២ ឆ្នាំជាប់គ្នា។ លោក Xi Jinping អគ្គលេខាបក្ស និងជាប្រធានរដ្ឋចិន បានវាយតម្លៃខ្ពស់ចំពោះវៀតណាម ហើយចង់ពង្រឹងកិច្ចសហប្រតិបត្តិការសេដ្ឋកិច្ចជាមួយប្រទេសជិតខាង។ លោកបានបញ្ជាក់ថា ប្រទេសចិននឹងបើកទ្វារស្វាគមន៍ផលិតផលវៀតណាមដែលមានគុណភាពខ្ពស់ជាច្រើនចូលទៅក្នុងទីផ្សារប្រទេសចិន។

ក្នុងឱកាសនៃដំណើរទស្សនកិច្ចផ្លូវរដ្ឋរបស់ លោក Xi Jinping អគ្គលេខាបក្ស ប្រធានរដ្ឋចិន ទៅកាន់ប្រទេសវៀតណាម នាថ្ងៃទី ១៥ មេសា កាសែត Global Times បានចុះផ្សាយអត្ថបទវិចារណកថាដែលមានចំណងជើងថា “ការកសាងសហគមន៍ចែករំលែកអនាគតចិន-វៀតណាម មានអត្ថន័យជាសាកល។ វិចារណកថាបានលើកឡើងច្បាស់ថានេះគឺជាដំណើរទស្សនកិច្ចនៅបរទេសលើកដំបូងរបស់មេដឹកនាំចិននៅឆ្នាំនេះ ហើយក៏ជាដំណើរទស្សនកិច្ចលើកដំបូងរបស់គាត់ទៅកាន់ប្រទេសជិតខាងរបស់ប្រទេសចិនបន្ទាប់ ពីសន្និបាតមជ្ឈិមបក្សស្តីពីការងារជាមួយប្រទេសអ្នកជិតខាង។ ដំណើរទស្សនកិច្ចនេះបានទាក់ទាញការចាប់អារម្មណ៍យ៉ាងទូលំទូលាយពីអន្តរជាតិ។

ក្នុងជំនួបពិភាក្សាការងារនៅទីក្រុងហាណូយ ថ្នាក់ដឹកនាំនៃប្រទេសទាំងពីរបានផ្លាស់ប្តូរយោបល់យ៉ាងស៊ីជម្រៅលើបញ្ហារួម យុទ្ធសាស្ត្រ និងតម្រង់ទិសនៃទំនាក់ទំនងរវាងបក្សទាំងពីរ និងប្រទេសទាំងពីរ ព្រមទាំងបានកំណត់ចក្ខុវិស័យក្នុងការកសាងសហគមន៍ចែករំលែកវៀតណាម-ចិននាពេលខាងមុខប្រកបដោយអត្ថន័យជាយុទ្ធសាស្ត្រតាមទិសដៅ “៦ ជាង” រួមគ្នាឆ្ពោះទៅមុខ និងរួមចំណែកដល់សហគមន៍មនុស្សជាតិ។

យោងតាមអត្ថបទនោះ ក្នុងរយៈពេលប៉ុន្មានឆ្នាំថ្មីៗនេះ ទំនាក់ទំនងវៀតណាម-ចិនបានបោះជំហានទៅមុខយ៉ាងខ្លាំងក្លា ស្របតាមតម្រូវការជាក់ស្តែងរបស់ភាគីនីមួយៗក្នុងការបំពេញបន្ថែមឧត្តមភាពជូនគ្នាទៅវិញទៅមក និងចែករំលែកធនធានក្នុងវិស័យសេដ្ឋកិច្ច ហេដ្ឋារចនាសម្ព័ន្ធ ខ្សែសង្វាក់ឧស្សាហកម្មជាដើម។ ក្រោមការដឹកនាំជាយុទ្ធសាស្ត្រនៃការទូតប្រមុខរដ្ឋ ទំនាក់ទំនងរវាងប្រទេសទាំងពីរបានបោះជំហានថ្មី៖ ពីកិច្ចខិតខំប្រឹងប្រែងរួមគ្នាដើម្បីប្រយុទ្ធប្រឆាំងនឹងឧក្រិដ្ឋកម្មឆ្លងដែន និងការរៀបចំប្រកបដោយជោគជ័យនៃកិច្ចសន្ទនាយុទ្ធសាស្ត្រ “៣+៣” និងវឌ្ឍនភាពក្នុងការតភ្ជាប់ផ្លូវដែក ការកសាងកំពង់ផែឆ្លាតវៃរវាងប្រទេសទាំងពីរ និងកិច្ចសហប្រតិបត្តិការជិតស្និទ្ធកាន់តែខ្លាំងឡើងនៅក្នុងខ្សែសង្វាក់ឧស្សាហកម្ម និងខ្សែសង្វាក់ផ្គត់ផ្គង់។ ក្នុងនាមជាប្រទេសសំខាន់ពីរក្នុងតំបន់ កិច្ចសហប្រតិបត្តិការរឹងមាំរវាងចិន និងវៀតណាម បានធ្វើជាគំរូសម្រាប់ប្រទេសផ្សេងៗក្នុងការកសាងបណ្តាញហេដ្ឋារចនាសម្ព័ន្ធឆ្លងប្រទេស ជំរុញកិច្ចសហប្រតិបត្តិការសេដ្ឋកិច្ចក្នុងតំបន់។

វិចារណកថាក៏បានឲ្យដឹងថាដែរ វៀតណាមជាទិសដៅអាទិភាពនៃការទូតអ្នកជិតខាងរបស់ចិន។ ផ្ទុយទៅវិញ វៀតណាមតែងតែចាត់ទុកការអភិវឌ្ឍទំនាក់ទំនងជាមួយចិន ជាតម្រូវការសត្យានុម័ត ជាជម្រើសយុទ្ធសាស្ត្រ និងជាអាទិភាពកំពូលក្នុងគោលនយោបាយការបរទេសរួមរបស់ខ្លួន៕