ការរំពឹងទុកសម្រាប់ទំនាក់ទំនងវៀតណាម-សិង្ហបុរី

យោងតាមបណ្តាអ្នកជំនាញសិង្ហបុរី ដំណើរទស្សនកិច្ចរបស់លោកនាយករដ្ឋមន្ត្រី Lawrence Wong ទៅកាន់ប្រទេសវៀតណាមចាប់ពីថ្ងៃទី២៥ ដល់ថ្ងៃទី ២៦ ខែមីនា បង្ហាញពីការរំពឹងទុកយ៉ាងខ្លាំងចំពោះទំនាក់ទំនងជាក់ស្តែងរវាងវៀតណាម និងសិង្ហបុរី។

លោកសាស្ត្រាចារ្យ Vu Minh Khuong នៅសាលាគោលនយោបាយសាធារណៈ Lee Kuan Yew នៃសកលវិទ្យាល័យជាតិសិង្ហបុរីបានបញ្ជាក់ថា ការតម្លើងទំនាក់ទំនងទ្វេភាគីទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ រួមជាមួយនឹងដំណើរទស្សនកិច្ចរបស់លោកនាយករដ្ឋមន្ត្រី Lawrence Wong ទៅកាន់ប្រទេសវៀតណាម បានបង្ហាញពីការរំពឹងទុកដ៏ធំធេងរបស់ប្រទេសសិង្ហបុរីចំពោះទំនាក់ទំនងទ្វេភាគី។

លោកអគ្គលេខាបក្ស To Lam និងលោក Lawrence Wong នាយករដ្ឋមន្ត្រីនៃសាធារណរដ្ឋសិង្ហបុរី អគ្គលេខាធិការគណបក្ស PAP ត្រួតពលកងកិត្តិយស ក្នុងឱកាសបំពេញទស្សនកិច្ចផ្លូវការរបស់លោកអគ្គលេខាបក្ស To Lam នៅប្រទេសសិង្ហបុរី (រូបថត៖ vnanet.vn)

យោងតាមលោកសាស្ត្រាចារ្យ Vu Minh Khuong ពេលវេលាប្រព្រឹត្តទៅ​ដំណើរទស្សនកិច្ចរបស់លោក​នាយករដ្ឋមន្ត្រី Lawrence Wong បង្ហាញពីជំនឿយ៉ាងមុតមាំរបស់សិង្ហបុរីថា ទំនាក់ទំនងរវាងប្រទេសទាំងពីរអាចនាំមកនូវតម្លៃដ៏ធំសម្បើម។ ប្រការនេះកាន់តែមានសារៈសំខាន់នៅពេលដែលសិង្ហបុរីត្រៀមរៀបចំការបោះឆ្នោតសកលនាពេលខាងមុខ ដែលជាព្រឹត្តិការណ៍ដ៏សំខាន់សម្រាប់គណបក្សសកម្មភាពប្រជាជន (PAP) កាន់អំណាច និងប្រជាជនសិង្ហបុរីទាំងអស់។ លោកសាស្ត្រាចារ្យ Vu Minh Khuong បានសន្និដ្ឋាន​ថា  ការពង្រឹងទំនាក់ទំនងជាមួយវៀតណាមបានក្លាយជាអាទិភាពយុទ្ធសាស្ត្ររបស់សិង្ហបុរីក្នុងឆ្នាំ ២០២៥ និងនាពេលអនាគត។

លោកសាស្ត្រាចារ្យ Vu Minh Khuong បានវាយតំលៃខ្ពស់ចំពោះទំនាក់ទំនងវៀតណាម-សិង្ហបុរី ក្នុងបរិបទទូទៅនៃអាស៊ាន និងការប្រែប្រួលនាពេលបច្ចុប្បន្ននៅលើពិភពលោក។ លោកបានសង្កត់ធ្ងន់លើសារៈសំខាន់នៃការពង្រឹងភាពធន់នឹងការប្រែប្រួលជាសកល។ ប្រទេសទាំងពីរត្រូវយកចិត្តទុកដាក់យ៉ាងខ្លាំងលើការពិគ្រោះយោបល់ជាប្រចាំ និងដោះស្រាយបញ្ហាជាក់ស្តែង ដូចជាការលើកកំពស់ផលិតភាពពលកម្ម ការប្រកួតប្រជែង ការតភ្ជាប់សេដ្ឋកិច្ចឌីជីថល សេដ្ឋកិច្ចបៃតង logistics និងការធ្វើនាវាចរណ៍។ លោកសាស្ត្រាចារ្យ Vu Minh Khuong ក៏រំពឹងដែរថា វៀតណាម និងសិង្ហបុរីនឹងក្លាយជាចំណុចភ្លឺ មិនត្រឹមតែនៅក្នុងតំបន់អាស៊ីអាគ្នេយ៍ប៉ុណ្ណោះទេ ថែមទាំងនៅលើពិភពលោកទៀតផង។

លោកសាស្ត្រាចារ្យ Bilveer Singh នៅសាកលវិទ្យាល័យជាតិសិង្ហបុរី បានសន្និដ្ឋាន​ថា ដំណើរទស្សនកិច្ចរបស់លោកនាយករដ្ឋមន្ត្រី Lawrence Wong ទៅកាន់វៀតណាមបានបង្ហាញយ៉ាងច្បាស់នូវសុច្ឆន្ទៈក្នុងការជំរុញទំនាក់ទំនងទ្វេភាគីតាមទស្សនៈរបស់ថ្នាក់ដឹកនាំសិង្ហបុរី ។

លោកសាស្ត្រាចារ្យ Singh បានបញ្ជាក់យ៉ាងច្បាស់ថា ការផ្លាស់ប្តូរដំណើរទស្សនកិច្ចថ្នាក់ជាន់ខ្ពស់ជាប្រចាំរវាងប្រទេសទាំងពីរ ជួយបង្កើនការយល់ដឹងគ្នាទៅវិញទៅមក ជាពិសេសអ្វីៗទាក់ទងនឹងអាទិភាពរបស់​ប្រទេសនីមួយៗ។ ក្រៅពីនោះ ដំណើរទស្សនកិច្ចនេះក៏បានអះអាងនូវប្រពៃណីដ៏ល្អក្នុងទំនាក់ទំនង វៀតណាម-សិង្ហបុរី ពោលគឺរក្សាទំនាក់ទំនងជិតស្និទ្ធ និងខិតខំប្រឹងប្រែងរួមគ្នាដើម្បីអភិវឌ្ឍទំនាក់ទំនងទ្វេភាគី ឱ្យកាន់តែជាក់ស្តែង និងប្រកបដោយប្រសិទ្ធភាព៕

បកប្រែដោយ Huyen Trang