ពង្រឹង និងពង្រីកទំនាក់ទំនងវៀតណាម-អាហ្សង់ទីន

ទិដ្ឋភាពនៃកិច្ចពិភាក្សាការងារវាង លោក Nguyen Trong Nghia  និងលោក Jorge Kreyness

ក្នុងដំណើរទស្សនកិច្ចនៅអាហ្សង់ទីន លោក Nguyen Trong Nghia បានជួបពិភាក្សាការងារជាមួយអគ្គលេខាស្តីទីនៃបក្សកុម្មុយនិស្តអាហ្សង់ទីន Jorge Kreyness; អគ្គលេខាបក្សកុម្មុយនិស្តអ៊ុយរូហ្គាយ Juan Castillo; ប្រធានគណៈទាក់ទងបរទេសគណបក្សយុត្តិធម៌ អតីតរដ្ឋមន្ត្រីក្រសួងការពារជាតិ និងកិច្ចការបរទេស Jorge Taiana; អនុប្រធានគណៈកម្មាធិការអប់រំសភាជាន់ទាប Blanca Ines Osuna និងក្រុមសមាជិកសភាមិត្តភាពអាហ្សង់ទីន-វៀតណាម; ថ្នាក់ដឹកនាំខេត្ត Buenos Aires; ប្រធានវិទ្យាស្ថានវប្បធម៌អាហ្សង់ទីនវៀតណាម, Poldi Sosa; ថ្នាក់ដឹកនាំនៃក្រសួងការបរទេស ពាណិជ្ជកម្មបរទេស និងសាសនានៃប្រទេសអាហ្សង់ទីន។ គណៈប្រតិភូក៏អញ្ជើញចូលរួមសិក្ខាសាលអន្តរជាតិមួយក្រោមប្រធានបទ “លោកប្រធានហូជីមិញ និងទំនាក់ទំនងវៀតណាម - អាមេរិកឡាទីន”; អញ្ជើញដាក់ក្រមផ្កានៅវិមានប្រធានហូជីមិញ បំពេញទស្សនកិច្ច និងធ្វើការជាមួយស្ថានទូតវៀតណាមប្រចាំនៅអាហ្សង់ទីន។

ក្នុងជំនួបនេះ  លោក Nguyen Trong Nghia បានលើកច្បាស់អំពីសារៈសំខាន់នៃដំណើរទស្សនកិច្ចដែលប្រព្រឹត្តទៅក្នុងបរិបទដែលវៀតណាម និងអាហ្សង់ទីនទើបតែប្រារព្ធខួបលើកទី ៥០ នៃការបង្កើតទំនាក់ទំនងការទូត (២៥ តុលា ១៩៧៣ / ២៥ តុលា ឆ្នាំ ២០២៣) និងកំពុងរៀបចំអបអរសាទរខួបលើកទី ១៥ នៃការបង្កើតទំនាក់ទំនងភាពជាដៃគូលើគ្រប់ជ្រុងជ្រោយ។ ដំណើរទស្សនកិច្ចនេះមានគោលបំណងពង្រឹងទំនុកចិត្តផ្នែកនយោបាយ និងបង្កើតមូលដ្ឋានដើម្បីបន្តលើកកម្ពស់ទំនាក់ទំនងសហប្រតិបត្តិការល្អរវាងវៀតណាម និងអាហ្សង់ទីន។

លោក Nguyen Trong Nghia  ជួបសន្ទនាជាមួយ លោក Juan Castillo

លោក Nguyen Trong Nghia បានពាំនាំនូវការសាកសួរសុខទូក្ខពីសំណាកលោក To Lam អគ្គលេខាបក្ស ប្រធានរដ្ឋវៀតណាម  និងថ្នាក់ដឹកនាំបក្ស និងរដ្ឋវៀតណាម ជូនចំពោះថ្នាក់ដឹកនាំគណបក្សនយោបាយ និងអង្គការប្រជាជននៅអាហ្សង់ទីន និងអ៊ុយរូហ្គាយ និងថ្លែងអំណរគុណចំពោះចំណងសាមគ្គីភាព មិត្តភាព ការគាំទ្រ និងជំនួយរបស់ប្រជាជនជឿនលឿននៃបណ្តាប្រទេសនៅអាមេរិកឡាទីន ជាពិសេសប្រជាជនអាហ្សង់ទីន និងអ៊ុយរូហ្គាយ ជូនចំពោះការតស៊ូរំដោះជាតិ ការឯកភាពជាតិ ក៏ដូចជាក្នុងកិច្ចការផ្លាស់ប្តូរថ្មី ការកសាង និងការពារមាតុភូមិសព្វថ្ងៃនេះរបស់វៀតណាម ហើយបានថ្លែងអំណរគុណយ៉ាងស្មោះស្ម័គ្រចំពោះគណបក្សមិត្តដែលបានផ្ញើសារទូរលេខចូលរួមរំលែកទុក្ខ ជូនចំពោះថ្នាក់ដឹកនាំបក្សកុម្មុយនិស្តវៀតណាមចំពោះមរណភាពរបស់លោកអគ្គលេខាបក្ស Nguyen Phu Trong។

លោក Nguyen Trong Nghia បានអបអរសាទរចំពោះសមិទ្ធិផលដែលគណបក្សនយោបាយនៅអាហ្សង់ទីនសម្រេចបាននាពេលថ្មីៗនេះ ព្រមទាំងចែករំលែកជាមួយការលំបាកដែលអាហ្សង់ទីនកំពុងជួបប្រទះ និងជឿជាក់ថា ជាមួយនឹងប្រពៃណីដ៏យូរលង់ និងគោលនយោបាយត្រឹមត្រូវ គណបក្សនយោបាយ និងអង្គការមហាជនរបស់ប្រទេសអាហ្សង់ទីននឹងយកឈ្នះលើការលំបាក និងបញ្ហាប្រឈម ក្នុងពេលឆាប់ៗនេះ ហើយបន្តទទួលបានជ័យជំនះថ្មីៗក្នុងការតស៊ូដើម្បីសន្តិភាព និងឯករាជ្យជាតិ លទ្ធិប្រជាធិបតេយ្យ វឌ្ឍនភាព និងយុត្តិធម៌សង្គម កសាងការអភិវឌ្ឍន៍អាហ្សង់ទីនកាន់តែខ្លាំងឡើង និងរុងរឿង។

អំពីស្ថានភាពនៅវៀតណាម លោក Nguyen Trong Nghia បានលើកឡើងអំពីសមិទ្ធិផល និងមេរៀនបទពិសោធន៍របស់វៀតណាមក្រោយរយៈពេលជិត ៤០ ឆ្នាំនៃការអនុវត្តគោលនយោបាយផ្លាស់ប្តូរថ្មី គោលដៅអភិវឌ្ឍន៍ គោលការណ៍ណែនាំក្នុងវិស័យផ្សេងៗ ចំណុចសំខាន់ៗ និងរបកគំហើញជាយុទ្ធសាស្ត្រដែលកំណត់ដោយមហាសន្តិបាត លើកទី ១៣ របស់បក្សកុម្មុយនិស្តវៀតណាម ដោយខិតខំក្លាយជាប្រទេសកំពុងអភិវឌ្ឍន៍មានឧស្សាហកម្មទំនើបនៅឆ្នាំ ២០៣០  ចំណូលមធ្យមកម្រិតខ្ពស់ និងនៅឆ្នាំ ២០៤៥ ក្លាយជាប្រទេសអភិវឌ្ឍន៍ និងប្រាក់ចំណូលខ្ពស់។ លោក Nguyen Trong Nghia ក៏បានចែករំលែកការវាយតម្លៃអំពីស្ថានភាពពិភពលោក តំបន់ដែលទើបនឹងលេចចេញ ជាពិសេសតំបន់ក្តៅៗ ដែលមានការយកចិត្តទុកដាក់ពីសហគមន៍អន្តរជាតិ និងអះអាងថា វៀតណាមបន្តអនុវត្តយ៉ាងខ្ជាប់ខ្ជួននូវគោលនយោបាយការបរទេសឯករាជ្យ ស្វ័យភាព សន្តិភាព មិត្តភាព កិច្ចសហប្រតិបត្តិការ និងការអភិវឌ្ឍន៍ ពហុភាគីភាវូបនីយកម្ម និងការធ្វើពិពិធកម្ម នៃទំនាក់ទំនងបរទេស ដោយយកចិត្តទុកដាក់លើការអភិវឌ្ឍន៍ទំនាក់ទំនងមិត្តភាពប្រពៃណីជាមួយប្រទេសជិតខាង ប្រទេសធំៗ និងមិត្តភក្តិប្រពៃណី រួមទាំងបណ្តាប្រទេសនៅអាមេរិកឡាទីន។

លោក Nguyen Trong Nghia ស ជួបធ្វើការជាមួយ លោក Jorge Taiana

ថ្នាក់ដឹកនាំគណបក្សនយោបាយ និងអង្គការនានានៃប្រទេសអាហ្សង់ទីន និងអ៊ុយរូហ្គាយបានអបអរសាទរ និងសម្តែងការកោតសរសើរចំពោះសមិទ្ធិផលដែលវៀតណាមសម្រេចបានក្នុងដំណើរការផ្លាស់ប្តូរថ្មី ក៏ដូចជាក្នុងការអនុវត្តសេចក្តីសម្រេចចិត្តនៃមហាសន្និបាតលើកទី១៣ ជាពិសេសលើការអភិវឌ្ឍន៍សេដ្ឋកិច្ចសង្គម និងជឿជាក់ថា ក្រោមការដឹកនាំដ៏ឈ្លាសវៃរបស់បក្សកុម្មុយនិស្តវៀតណាម ការគាំទ្ររបស់ប្រជាជន និងសហគមន៍អន្តរជាតិ វៀតណាមនឹងបន្តសម្រេចបាននូវសមិទ្ធិផលថ្មី និងធំជាងនេះក្នុងដំណើរការផ្លាស់ប្តូរថ្មី និងការអនុវត្តដោយជោគជ័យនូវសេចក្តីសម្រេចចិត្តនៃមហាសន្និបាតបក្ស លើកទី១៣ កសាងប្រទេសវៀតណាមប្រកបដោយវិបុលភាព រឹងមាំ ប្រជាធិបតេយ្យ យុត្តិធម៌ និងអរិយធម៌។

ថ្នាក់ដឹកនាំគណបក្សនយោបាយបានសង្កត់ធ្ងន់លើតួនាទីដឹកនាំរបស់បក្សកុម្មុយនិស្តវៀតណាម លោកប្រធានហូជីមិញ និងថ្នាក់ដឹកនាំគ្រប់ជំនាន់ក្រោយក្នុងការតស៊ូរំដោះជាតិ និងការឯកភាពជាតិ នាពេលកន្លងមក ក៏ដូចជានក្នុងដំណើរផ្លាស់ប្តូរនាបច្ចុប្បន្ន ដោយចាត់ទុកថា នេះជាគំរូ ជាមេរៀនដ៏មានតម្លៃ សម្រាប់រដ្ឋាភិបាលនៅអាហ្សង់ទីន និងអ៊ុយរូហ្គាយ។

លោក Nguyen Trong Nghia ជួបជាមួយ លោកស្រី Blanca Ines Osuna

ថ្នាក់ដឹកនាំនៃគណបក្សនយោបាយអាហ្សង់ទីនក៏បានជូនដំណឹងអំពីស្ថានភាពនៃប្រទេសទាំងពីរ ស្ថានភាពនៃគណបក្សនយោបាយនៅក្នុងប្រទេសអាហ្សង់ទីន រួមទាំងការលំបាកនិងបញ្ហាប្រឈមដែលគណបក្សឆ្វេងនិយម និងកុម្មុយនិស្ត កំពុងប្រឈមមុខបន្ទាប់ពីការផ្លាស់ប្តូររដ្ឋអំណាច និងចែករំលែកអំពីគោលនយោបាយ និងវិធានការក្នុងការងារកសាង និងអភិវឌ្ឍន៍របស់គណបក្សទាំងឡាយ។

ចំពោះទំនាក់ទំនងរវាងវៀតណាម និងអាហ្សង់ទីន ភាគីទាំងពីរបានពិភាក្សា និងឯកភាពបន្តរក្សាការផ្លាស់ប្តូរគណៈប្រតិភូ បង្កើនការជួបប្រជុំ និងទំនាក់ទំនងរវាងគ្រប់ជាន់ថ្នាក់ និងអង្គការប្រជាជន; ធ្វើឱ្យប្រសើរឡើងនូវប្រសិទ្ធភាពនៃយន្តការសហប្រតិបត្តិការដែលមានស្រាប់ ពង្រីកយន្តការសហប្រតិបត្តិការផ្សេងទៀត; ពង្រឹងការចែករំលែកព័ត៌មាន និងបទពិសោធន៍ក្នុងការកសាងបក្ស និងអភិវឌ្ឍន៍ប្រទេស។ សម្របសម្រួល និងគាំទ្រគ្នាទៅវិញទៅមកនៅវេទិកាតំបន់ និងអន្តរជាតិ។

បកប្រែដោយ Duy Hoan