លោក Nguyen Phu Trong អគ្គលេខាបក្សកុម្មុយនិស្តវៀតណាម និងលោក Xi Jinping អគ្គលេខាបក្សកុម្មុយនិស្តចិន និងជាប្រធានរដ្ឋចិន ផ្ញើសារអបអរសាទរឆ្នាំថ្មីជូនគ្នាទៅវិញទៅមក
កប.អនឡាញ - នាថ្ងៃទី ២ ខែកុម្ភៈ លោក Nguyen Phu Trong អគ្គលេខាបក្សកុម្មុយនិស្តវៀតណាម និងលោក Xi Jinping អគ្គលេខាបក្សកុម្មុយនិស្តចិន និងជាប្រធានរដ្ឋចិន បានផ្ញើសារអបអរសាទរឆ្នាំថ្មីជូនគ្នាទៅវិញទៅមកក្នុងឱកាសដែលប្រជាជន នៃប្រទេសទាំងពីរវៀតណាម ចិន ត្រៀមទទួលស្វាគមន៍ឆ្នាំថ្មីប្រពៃណីជាតិ។
ក្នុងសារអបអរសាទរ អគ្គលេខាបក្សទាំងពីរបានសម្តែងនូវសេចក្តីរីករាយចំពោះនិន្នាការអភិវឌ្ឍន៍ជាវិជ្ជមាន និងការវិវឌ្ឍសំខាន់ៗក្នុងទំនាក់ទំនងរវាងបក្សទាំងពីរ និងប្រទេសទាំងពីរ វៀតណាម និងចិន លើគ្រប់វិស័យ ជាពិសេសបន្ទាប់ពីដំណើរទស្សនកិច្ចជាប្រវត្តិសាស្រ្តរបស់លោកអគ្គលេខាបក្ស Nguyen Phu Trong នៅប្រទេសចិន នៅខែតុលា ឆ្នាំ២០២២ បន្ទាប់ពីមហាសន្និបាត លើកទី ២០ នៃបក្សកុម្មុយនិស្តចិន។
    |
 |
|
លោក Nguyen Phu Trong អគ្គលេខាបក្សកុម្មុយនិស្តវៀតណាម និងលោក Xi Jinping អគ្គលេខាបក្សកុម្មុយនិស្តចិន និងជាប្រធានរដ្ឋចិន ថតរូបជុំគ្នាក្នុងកិច្ចពិភាក្សាការងារកាលពីថ្ងៃទី ១២ ខែធ្នូ ឆ្នាំ ២០២៣ ក្នុងដំណើរបំពេញទស្សនកិច្ចផ្លូវរដ្ឋនៅវៀតណាម (រូបថត៖ vnanet.vn) |
ថ្នាក់ដឹកនាំកំពូលនៃបក្សទាំងពីរ បានវាយតម្លៃខ្ពស់ចំពោះអត្តន័យនៃព្រឹត្តិការណ៍សំខាន់ៗ និងលទ្ធផលផ្សេងៗ នៃដំណើរទស្សនកិច្ចផ្លូវរដ្ឋនៅវៀតណាម ក្នុងខែធ្នូ ឆ្នាំ២០២៣ របស់លោក Xi Jinping អគ្គលេខាបក្ស និងជាប្រធានរដ្ឋចិន ជាពិសេសការចេញសេចក្តីថ្លែងការណ៍រួមស្តីពីការបន្តធ្វើឱ្យស៊ីជម្រៅ និងលើកកំពស់ទំនាក់ទំនងភាពជាដៃគូសហប្រតិបត្តិការយុទ្ធសាស្ត្រលើគ្រប់ជ្រុងជ្រោយ កសាងសហគមន៍ចែករំលែកអនាគតវៀតណាម-ចិនដែលមានអត្ថន័យជាយុទ្ធសាស្ត្រ និងការចុះហត្ថលេខាលើឯកសារកិច្ចសហប្រតិបត្តិការចំនួន ៣៦ ដែលជាការបង្ហាញពីការប្តេជ្ញាចិត្តរបស់ភាគីទាំងពីរ និងបង្កើតការតម្រង់ទិសយុទ្ធសាស្ត្រសំខាន់សម្រាប់ការអភិវឌ្ឍយូរអង្វែងនៃទំនាក់ទំនងរវាងបក្សទាំងពីរ និងប្រទេសទាំងពីរក្នុងសម័យកាលថ្មី។
សម្រាប់ឆ្នាំ ២០២៤ លោកអគ្គលេខាបក្ស Nguyen Phu Trong សង្ឃឹមថា ក្រសួង ស្ថាប័ន និងមូលដ្ឋាននានា នៃប្រទេសទាំងពីរ នឹងអនុវត្តបានល្អនូវកិច្ចព្រមព្រៀង និងទស្សនៈរួមកម្រិតខ្ពស់ ដែលបានសម្រេច បន្តជំរុញទំនាក់ទំនងវៀតណាម - ចិន ឱ្យមានការអភិវឌ្ឍប្រកបដោយស្ថិរភាព ស៊ីជម្រៅ ជាក់ស្តែង និងមានប្រសិទ្ធភាព ដើម្បីការអភិវឌ្ឍ និងផលប្រយោជន៍របស់ប្រជាជនទាំងពីរ រួមចំណែកដល់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍក្នុងតំបន់ និងជុំវិញពិភពលោក។
លោក Xi Jinping អគ្គលេខាបក្ស និងជាប្រធានរដ្ឋចិន សង្ឃឹមថា ភាគីទាំងពីរនឹងជំរុញកម្ពស់ថ្មីនៃទំនាក់ទំនងទ្វេភាគី ដើម្បីជំរុញការផ្លាស់ប្តូរ និងកិច្ចសហប្រតិបត្តិការលើគ្រប់បណ្តាញ គ្រប់លំដាប់ថ្នាក់ បំពញបន្ថែមកម្លាំងចលករដល់បុព្វហេតុទំនើបភាវូបនីយកម្មនៃប្រទេសទាំងពីរ រួមចំណែកបន្ថែមទៀតដល់សន្តិភាព និងវឌ្ឍនភាពរបស់មនុស្សជាតិ។
អគ្គលេខាបក្សទាំងពីរបានជូនពរបក្ស រដ្ឋ និងប្រជាជននៃប្រទេសទាំងពីរ ទទួលស្វាគមន៍ឆ្នាំថ្មីប្រកបដោយសុខសន្តិភាព សុខភាព និងសុភមង្គល ប្រទេសទាំងពីរវៀតណាម និងចិន កាន់តែរីកចម្រើន និងវិបុលភាព។
បកប្រែដោយ Thanh Cong