លោក Pham Minh Chinh នាយករដ្ឋមន្ត្រី អញ្ជើញទទួលជួបឯកអគ្គរដ្ឋទូតឥណ្ឌូនេស៊ីប្រចាំប្រទេសវៀតណាម

ថ្លែងនៅក្នុងពិធីទទួលលោក Adam Mulawarman Tugio ឯកអគ្គរដ្ឋទូតនៃសាធារណរដ្ឋឥណ្ឌូនេស៊ីប្រចាំប្រទេសវៀតណាម កាលពីថ្ងៃទី ២០ ខែមីនា នៅទីស្នាក់ការរដ្ឋាភិបាល លោក Pham Minh Chinh នាយករដ្ឋមន្ត្រី  បានស្នើឱ្យភាគីទាំងពីរបន្តពង្រឹងទំនុកចិត្តនយោបាយ បង្កើនសាមគ្គីភាព កិច្ចសហប្រតិបត្តិការ និងការសន្ទនារវាងប្រទេសទាំងពីរ ក៏ដូចជារួមចំណែកដល់ការលើកកម្ពស់សាមគ្គីភាព និងកិច្ចសហប្រតិបត្តិការនៅក្នុងសមាគមប្រជាជាតិអាស៊ីអាគ្នេយ៍ (អាស៊ាន) និងអនុវត្តកិច្ចព្រមព្រៀង និងយន្តការសហប្រតិបត្តិការដែលមានស្រាប់ប្រកបដោយប្រសិទ្ធភាព។

លោក Pham Minh Chinh នាយករដ្ឋមន្ត្រី ទទួលជួប លោក Adam Mulawarman Tugio ឯកអគ្គរដ្ឋទូតឥណ្ឌូនេស៊ីប្រចាំប្រទេសវៀតណាម នៅទីស្នាក់ការរដ្ឋាភិបាល (រូបថត៖ VOV)

លោកនាយករដ្ឋមន្ត្រីបានស្នើឱ្យប្រទេសឥណ្ឌូនេស៊ីបង្កើតលក្ខខណ្ឌអំណោយផលសម្រាប់ទំនិញវៀតណាមក្នុងការចូលទៅកាន់ទីផ្សារឥណ្ឌូនេស៊ី និងភាគីទាំងពីរលើកកម្ពស់កិច្ចសហប្រតិបត្តិការក្នុងឧស្សាហកម្មហាឡាល។ អនុវត្តកិច្ចសហប្រតិបត្តិការប្រកបដោយប្រសិទ្ធភាពក្នុងការនេសាទ សម្របសម្រួល និងគាំទ្រប្រទេសវៀតណាមក្នុងការទប់ស្កាត់ ការនេសាទខុសច្បាប់ ដោយពុំមានការរាយការណ៍ និងមិនមានបទប្បញ្ញត្តិត្រឹមត្រូវ (IUU)។ លើកកម្ពស់កិច្ចសហប្រតិបត្តិការនៅថ្នាក់មូលដ្ឋាន ក្នុងវិស័យអប់រំ បណ្តុះបណ្តាល ទេសចរណ៍ ការផ្លាស់ប្ដូរវប្បធម៌ និងការផ្លាស់ប្ដូររវាងប្រជាជន និងប្រជាជន។

ទិដ្ឋភាពនៃជំនួប (រូបថត៖ VOV)

ដោយសង្កត់ធ្ងន់លើសារៈសំខាន់នៃការរក្សាសន្តិភាព សន្តិសុខ ស្ថិរភាព សុវត្ថិភាព និងសេរីភាពក្នុងការធ្វើនាវាចរណ៍ និងអាកាសចរណ៍នៅសមុទ្រខាងកើត លោកនាយករដ្ឋមន្ត្រីបានស្នើឱ្យប្រទេសទាំងពីរ រួមជាមួយប្រទេសដទៃទៀត អនុវត្តយ៉ាងពេញលេញនូវសេចក្តីប្រកាសស្តីពីការប្រតិបត្តិរបស់ភាគីនានាក្នុងសមុទ្រខាងកើត (DOC) និងជម្រុញការចរចាលើក្រមប្រតិបត្តិក្នុងសមុទ្រខាងកើត (COC) ដែលមានប្រសិទ្ធភាព និងស្របតាមច្បាប់អន្តរជាតិ។ លោកនាយករដ្ឋមន្ត្រីបានស្នើឱ្យភាគីទាំងពីរពង្រឹងការតភ្ជាប់រវាងប្រជាជន និងប្រជាជន ការតភ្ជាប់រវាងសេដ្ឋកិច្ចទាំងពីរ ជាមួយនឹងការតភ្ជាប់បៃតង និងឌីជីថល និងកសាងមូលដ្ឋានទិន្នន័យរួមគ្នា។ ជាពិសេសការតភ្ជាប់ និងគាំទ្រគ្នាទៅវិញទៅមក ដើម្បីធានាសន្តិសុខថាមពល រួមទាំងបណ្តាញអគ្គិសនីអាស៊ាន ដើម្បីជៀសវាងការរំខាននៅក្នុងខ្សែសង្វាក់ផ្គត់ផ្គង់ថាមពល។

លោក Adam Mula warman Tugio ឯកអគ្គរដ្ឋទូតឥណ្ឌូនេស៊ីប្រចាំប្រទេសវៀតណាម ចង់ឲ្យ​ភាគីទាំងពីរជំរុញពាណិជ្ជកម្មឱ្យឈានដល់ ១៨ ពាន់លានដុល្លារអាមេរិកក្នុងពេលឆាប់ៗនេះ។ ពង្រឹងកិច្ចសហប្រតិបត្តិការក្នុងការផ្លាស់ប្តូរថាមពលបៃតង និងលើកទឹកចិត្តអាជីវកម្មវៀតណាមឱ្យវិនិយោគលើឧស្សាហកម្មរ៉ែនៅក្នុងប្រទេសឥណ្ឌូនេស៊ី៕

បកប្រែដោយ Duy Hoan