រឹតបន្តឹងទំនាក់ទំនងជឿទុកចិត្ត និងមិត្តភាពពិសេសវៀតណាម និងគុយបាបន្ថែមទៀត

លោក Miguel Díaz-Canel បានកោតសរសើរចំពោះទំនាក់ទំនងមិត្តភាពដ៏ស្មោះត្រង់ ជាក់ស្តែង និងប្រកបដោយប្រសិទ្ធភាពរវាងប្រទេសទាំងពីរនាពេលថ្មីៗនេះ ជាពិសេសការផ្លាស់ប្តូរគណៈប្រតិភូជាន់ខ្ពស់ និងការសន្ទនាតាមទូរស័ព្ទ ការសន្ទនាផ្ទាល់រវាងមេដឹកនាំសំខាន់ៗនៃប្រទេសទាំងពីរ ហើយ​និង​ការផ្លាស់ប្តូរគណៈប្រតិភូនៃក្រសួង ស្ថាប័ន និងមូលដ្ឋាន នៃភាគីទាំងពីរ បាន​រួម​ចំណែក​រឹតចំណងទំនាក់ទំនងជឿទុកចិត្ត និងមិត្តភាពពិសេសរវាងគុយបា និងវៀតណាម។

លោក Miguel Díaz-Canel ទទួលជួប លោក Le Thanh Tung (រូបថត៖ vnanet.vn)

លោក Miguel Díaz-Canel បានថ្លែងអំណរគុណចំពោះបក្ស រដ្ឋ រដ្ឋាភិបាល និងប្រជាជនវៀតណាមដែលបានជួយដល់ផលិតកម្មស្បៀងអាហាររបស់គុយបា និងចំណងសាមគ្គីភាព និង​មនោសញ្ចេតនា​ដែល​​វៀតណាមជូន​ចំពោះ​គុយបា ជាពិសេសក្នុងដំណាក់កាលដ៏លំបាកនាពេលបច្ចុប្បន្ននៃ​បដិវត្តន៍គុយបា។ លោក Miguel Díaz-Canel ជឿជាក់ថា ទំនាក់ទំនងមិត្តភាពពិសេសរវាងគុយបា និងវៀតណាមនឹងបន្តអភិវឌ្ឍន៍ រួមចំណែកយ៉ាងសំខាន់ក្នុងបុព្វហេតុកសាង និងការពារមាតុភូមិនៃប្រទេសនីមួយៗ។

លោក Le Thanh Tung បានចែករំលែកចំពោះការវាយតម្លៃរបស់លោក Miguel Díaz-Canel អំពីទំនាក់ទំនងមិត្តភាពពិសេសរវាងប្រទេសទាំងពីរនាពេលថ្មីៗនេះ។ លោកបានថ្លែងអំណរគុណគុយបាដែលបានជួយវៀតណាមក្នុងរយៈពេល ៦៣ ឆ្នាំកន្លងមកនេះ។ លោក​ឯកអគ្គរដ្ឋទូតបានអះអាងសារជាថ្មីអំពីចំណងសាមគ្គីភាព និងការគាំទ្ររបស់បក្ស រដ្ឋ រដ្ឋាភិបាល និងប្រជាជនវៀតណាមជូន​ចំពោះ​គុយបា ហើយអះអាងឡើងវិញនូវ​ជំហរដ៏ខ្ជាប់ខ្ជួនរបស់វៀតណាមដែល​អំពាវនាវឱ្យអាមេរិកបញ្ចប់ការដាក់ទណ្ឌកម្មឯកតោភាគីប្រឆាំងនឹង​គុយបា ហើយ​និង​ស្នើឱ្យអាមេរិកដកគុយបាចេញពីបញ្ជីបញ្ជីប្រទេសដែលគាំទ្រភេរវកម្ម៕

បកប្រែដោយ Duy Hoan