វៀតណាមប្តេជ្ញារួមវិភាគទានអស់ពីសមត្ថភាព ដើម្បីសន្តិភាព ការអភិវឌ្ឍ និងវិបុលភាព

លោក Tran Luu Quang ឧបនាយករដ្ឋមន្ត្រី បានវាយតំលៃខ្ពស់ចំពោះប្រធានបទ “ការលើកដំកើងឥទ្ធិពលរបស់អាស៊ីក្នុងការដោះស្រាយបញ្ហាប្រឈមជាសាកល” ពោលគឺប្រធានបទនេះ វាមិនត្រឹមតែសមស្របប៉ុណ្ណោះទេ ថែមទាំងបង្ហាញពីទំនួលខុសត្រូវដ៏ធំធេងដែលដាក់លើស្មារបស់បណ្តាប្រទេសអាស៊ី ដើម្បីសន្តិភាព ស្ថិរភាព និងភាពរុងរឿងក្នុងតំបន់ និងនៅលើពិភពលោក។ លោក Tran Luu Quang បានសង្កត់ធ្ងន់ថា ពិភពលោក និងអាស៊ីកំពុងមើលឃើញពីការផ្លាស់ប្តូរយ៉ាងស៊ីជម្រៅ ជាមួយនឹងការផ្លាស់ប្តូរសំខាន់ៗជាច្រើន ជាមួយនឹងឱកាស និងបញ្ហាប្រឈមជាច្រើនដែលប្រទាក់ប្រឡាគ្នា។ នៅក្នុងបរិបទនោះ អាស៊ីចាំបាច់ត្រូវមានទំនួលខុសត្រូវ និងដើរតួនាទីយ៉ាងសំខាន់ក្នុងដំណើរការនៃការទាញយកឱកាសប្រកបដោយប្រសិទ្ធភាព និងការដោះស្រាយរាល់ការលំបាក និងបញ្ហាប្រឈមនានានៃសម័យកាល។

លោក Tran Luu Quang ឧបនាយករដ្ឋមន្ត្រី អញ្ជើញចូលរួម និងថ្លែងសុន្ទរកថា ដ៏សំខាន់មួយនៅកិច្ចប្រជុំ អនាគតអាស៊ីលើកទី ២៨ (រូបថត៖ vnanet.vn)

លោក Tran Luu Quang ក៏បានស្នើឱ្យភាគីពាក់ព័ន្ធគប្បីតែអនុវត្តយ៉ាងម៉ឺងម៉ាត់នូវសេចក្តីថ្លែងការណ៍ស្តីពីការប្រតិបត្តិរបស់ភាគីនានានៅសមុទ្រខាងកើត (DOC) ឆ្ពោះទៅសម្រេចបាននូវក្រមប្រតិបត្តិសំខាន់ៗនៅសមុទ្រខាងកើត (COC) ប្រកបដោយប្រសិទ្ធភាព ស្របតាមច្បាប់អន្តរជាតិ ជាពិសេសអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ១៩៨២។ ទន្ទឹមនឹងនោះ ចៀសវាងសកម្មភាពដែលធ្វើអោយស្ថានការណ៍ស្មុគស្មាញ និងរំលោភលើអធិបតេយ្យភាព សិទ្ធិអធិបតេយ្យភាព និងយុត្តាធិការនៃប្រទេសពាក់ព័ន្ធ ដែលត្រូវបានកំណត់ដោយ UNCLOS 1982។ នៅក្នុងឱកាសនេះផងដែរ លោក Tran Luu Quang បានចែករំលែកនូវគោលដៅអភិវឌ្ឍន៍ ទិសដៅ ទស្សនៈ និងអាទិភាពរបស់វៀតណាម។ លោកបានសង្កត់ធ្ងន់ថា វៀតណាមបន្តអនុវត្តគោលនយោបាយការបរទេសឯករាជ្យ ភាពខ្លួនទីពឹងខ្លួន ពហុភាគីភាវូបនីយកម្ម និងពិពិធកម្ម ធ្វើជាមិត្តល្អ ជាដៃគូដែលអាចទុកចិត្តបាន និងជាសមាជិកសកម្ម និងមានការទទួលខុសត្រូវរបស់សហគមន៍អន្តរជាតិ។  វៀតណាមប្ដេជ្ញាចិត្តក្នុងការរួមចំណែកដ៏ល្អបំផុតរបស់ខ្លួនចំពោះសន្តិភាព កិច្ចសហប្រតិបត្តិការ ស្ថិរភាព និងវិបុលភាពនៅអាស៊ី និងពិភពលោក។

បកប្រែដោយ Minh Trung