វៀតណាមនិងអូស្ត្រាលីឯកភាពលើកកំពស់ទំនាក់ទំនងទៅជាដៃគូយុទ្ធសាស្ត្រគ្រប់ជ្រុងជ្រោយ

នៅក្នុងជំនួបពិភាក្សាបន្ទាប់ពីពិធីទទួលបដិសណ្ឋារកិច្ច លោក Vo Van Thuong ប្រធានរដ្ឋ និងលោក David Hurley អគ្គទេសាភិបាល បានពិភាក្សាយ៉ាងទូលំទូលាយអំពីទិសដៅសំខាន់ៗ ដើម្បីពង្រឹងទំនាក់ទំនងវៀតណាម-អូស្ត្រាលីលើវិស័យនានា; ឯកភាពលើការលើកកំពស់ទំនាក់ទំនងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយនៅពេលវេលាសមស្រប។

លោក Vo Van Thuong ប្រធានរដ្ឋវៀតណាម ទទួលលោក David Hurley អគ្គទេសាភិបាលអូស្ត្រាលី (រូបថត៖ VOV)

លោក Vo Van Thuong ប្រធានរដ្ឋ បានស្នើថា តាមស្មារតីនៃឯកសារយុទ្ធសាស្ត្រស្តីពីការបង្កើនកិច្ចសហប្រតិបត្តិការសេដ្ឋកិច្ចរវាងវៀតណាម និងអូស្ត្រាលី (EEES) ភាគីទាំងពីរគួរតែបង្កើនកិច្ចសហប្រតិបត្តិការពាណិជ្ជកម្ម និងវិនិយោគទ្វេភាគី; បង្កើតលក្ខខណ្ឌអំណោយផលសម្រាប់ទំនិញនាំចេញជាប្រៀបខ្លាំងរបស់គ្នាទៅវិញទៅមក; មានគោលនយោបាយលើកទឹកចិត្ត និងជួយសម្រួលសម្រាប់សហគ្រាសនៃប្រទេសទាំងពីរបង្កើនការវិនិយោគទៅវិញទៅមក; តាមនោះ លើកទឹកចិត្តឱ្យសហគ្រាសអូស្ត្រាលីមកបណ្តាក់ទុននៅវៀតណាមលើវិស័យថាមពល ហេដ្ឋារចនាសម្ព័ន្ធ រ៉ែ ទូរគមនាគមន៍ ហិរញ្ញវត្ថុ-ធនាគារ កសិកម្មបច្ចេកវិទ្យាខ្ពស់ អប់រំ។ល។

ទិដ្ឋភាពនៅជំនួបពិភាក្សាការងាររវាងភាគីទាំងពីរ (រូបថត៖ VOV)

រីឯខ្លួនវិញ លោក David Hurley អគ្គទេសាភិបាលអូស្ត្រាលី បានឯកភាពថាភាគីទាំងពីរគួរតែយកចិត្តទុកដាក់បន្ថែមទៀតដល់សកម្មភាពវប្បធម៌ កីឡា និងការជួបប្រាស្រ័យរវាងប្រជាជននិងប្រជាជន; ឆាប់អនុវត្តន៍អនុស្សរណៈយោគយល់គ្នាស្ដីពីកម្មវិធី ទិដ្ឋាការកសិកម្មអូស្ត្រាលី ដើម្បីឲ្យពលរដ្ឋវៀតណាមអាចទៅធ្វើការនៅអូស្ត្រាលីក្នុងវិស័យកសិកម្ម; បង្កើតលក្ខខណ្ឌអំណោយផលសម្រាប់និស្សិតវៀតណាមទៅសិក្សានៅអូស្ត្រាលី ព្រមទាំងលើកទឹកចិត្តឲ្យពលរដ្ឋអូស្ត្រាលីកាន់តែច្រើន ធ្វើដំណើរទេសចរណ៍ និងមកសិក្សានៅវៀតណាម; ជំរុញការអនុវត្តសកម្មភាពផ្សព្វផ្សាយទេសចរណ៍ និងបង្កើនការតភ្ជាប់មូលដ្ឋាននៃភាគីទាំងពីរផងដែរ។

មេដឹកនាំទាំងពីរបានឯកភាពបន្តបង្កើនការពិគ្រោះយោបល់ និងការសម្របសម្រួលគ្នាយ៉ាងជិតស្និទ្ធនៅវេទិកាតំបន់ និងអន្តរជាតិនានា; អះអាងសារជាថ្មីអំពីសារៈសំខាន់នៃសន្តិភាព ស្ថិរភាព សុវត្ថិភាព សន្តិសុខ និងសេរីភាពខាងនាវាចរណ៍នៅ សមុទ្រខាងកើត; សហការជាមួយប្រទេសដទៃទៀតដើម្បីកសាងតំបន់ស្ថិរភាពនិងវិបុលភាព គោរពអធិបតេយ្យភាពជាតិ និងធានាគោលការណ៍គោរពច្បាប់។

នាព្រឹកថ្ងៃដដែល លោក David Hurley អគ្គទេសាភិបាលអូស្ត្រាលី និងគណៈប្រតិភូជាន់ខ្ពស់អូស្ត្រាលី បានមកដាក់កម្រងផ្កា និងចូលប្រាង្គតម្កល់សពគោរពវិញ្ញាណក្ខន្ធលោកប្រធានហូជីមិញ; ដាក់កម្រងផ្កានៅវិមានរំលឹកវិញ្ញាណក្ខ័ន្ធវីរជនជាយុទ្ធជនពលី៕

តាម vovworld.vn