លោក Tran Thanh Man ប្រធានរដ្ឋសភា ជួបពិភាក្សាជាមួយលោក Gerry Brownlee ប្រធានរដ្ឋសភានូវែលហ្សេឡង់

នាព្រឹកថ្ងៃទី២៨ ខែសីហា នៅវិមានរដ្ឋសភា លោក Tran Thanh Man ប្រធានរដ្ឋសភា បានអញ្ជើញជាអធិបតីក្នុងពិធីទទួលបដិសណ្ឋារកិច្ចយ៉ាងអធិកអធមជូនចំពោះប្រធានរដ្ឋសភានូវែលហ្សេឡង់។ បន្ទាប់ពីពិធីទទួលបដិសណ្ឋារកិច្ច ប្រធានរដ្ឋសភាទាំងពីររូបបានជួបពិភាក្សាជាមួយគ្នា។

លោក Tran Thanh Man ប្រធានរដ្ឋសភាវៀតណាម និងលោក Gerry Brownlee ប្រធានរដ្ឋសភានូវែលហ្សេឡង់

នៅក្នុងកិច្ចពិភាក្សា លោក Tran Thanh Man ប្រធានរដ្ឋសភា បានស្នើឲ្យភាគីទាំងពីរបន្តពង្រឹង និងរឹតបន្តឹងទំនាក់ទំនងនយោបាយ តាមរយៈដំណើរទស្សនកិច្ចថ្នាក់ខ្ពស់   ការផ្លាស់ប្តូរគណៈប្រតិភូ ដើម្បីស្វែងយល់ពីបទពិសោធន៍រវាងក្រសួង ស្ថាប័ន និងមូលដ្ឋាននានានៃប្រទេសទាំងពីរ បង្កើនការជួបប្រាស្រ័យរវាងគណៈកម្មាធិការ ក្រុមសមាជិកសភាមិត្តភាព និងក្រុមសមាជិកសភាវ័យក្មេងនៃប្រទេសទាំងពីរ ព្រមទាំងស្នើឱ្យក្រសួងការបរទេសនៃប្រទេសទាំងពីរបង្ហើយយ៉ាងឆាប់ៗ នូវកម្មវិធីសកម្មភាពដើម្បីអនុវត្តទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ។ លោក Tran Thanh Man ប្រធានរដ្ឋសភា បានស្នើឲ្យនូវែលហ្សេឡង់ឧបត្ថម្ភការបណ្តុះបណ្តាល និងការកសាងសមត្ថភាពសម្រាប់វៀតណាមក្នុងការចូលរួមក្នុងសកម្មភាពរក្សាសន្តិភាពរបស់អង្គការសហប្រជាជាតិ។

លោក Tran Thanh Man ប្រធានរដ្ឋសភាវៀតណាម មានប្រសាសន៍នៅក្នុងកិច្ចពិភាក្សា

លោក Tran Thanh Man ប្រធានរដ្ឋសភាវៀតណាម ក៏បានស្នើឲ្យភាគីទាំងពីរ មានវិធានការទម្លុះទម្លាយភាពទាល់ច្រកសំដៅនាំឱ្យទំហំពាណិជ្ជកម្មឡើងដល់ ៣ ពាន់លានដុល្លារអាមេរិកនៅឆ្នាំ ២០២៦ ជាពិសេសជំរុញការបំពេញបន្ថែមលើទំនិញនៃប្រទេសទាំងពីរ សំដៅជំរុញការនាំចេញផលិតផលនៃប្រទេសនីមួយៗ។ ទន្ទឹមនឹងនោះ ទាញយកផលប្រយោជន៍ភាគច្រើននៃកិច្ចព្រមព្រៀងពាណិជ្ជកម្មសេរី (FTA) ដែលប្រទេសទាំងពីរជាសមាជិក។

លោក Tran Thanh Man ប្រធានរដ្ឋសភា បានសង្កត់ធ្ងន់ថា កិច្ចសហប្រតិបត្តិការលើវិស័យថ្មីៗដូចជា៖ សេដ្ឋកិច្ចបៃតង សេដ្ឋកិច្ចឌីជីថល និងការធ្វើបរិវត្តកម្មថាមពល គឺជាប្រៀបខ្លាំងរបស់ប្រទេសនូវែលហ្សេឡង់។ លោក Tran Thanh Man ប្រធានរដ្ឋសភា បង្ហាញពីបំណងចង់សិក្សាបទពិសោធន៍របស់ប្រទេសនូវែលហ្សេឡង់ក្នុងការអភិវឌ្ឍកសិកម្មស្អាត និងបច្ចេកវិទ្យាខ្ពស់ ព្រមទាំងស្នើឱ្យភាគីទាំងពីរពង្រីកកិច្ចសហប្រតិបត្តិការលើវិស័យអប់រំ និងបណ្តុះបណ្តាល កម្លាំងពលកម្ម ទេសចរណ៍ និងបើកការហោះហើរត្រង់ ដើម្បីរួមចំណែកលើកកម្ពស់ការជួបប្រាស្រ័យរវាងប្រជាជននិងប្រជាជន។

លោក Gerry Brownlee ប្រធានរដ្ឋសភានូវែលហ្សេឡង់ មានប្រសាសន៍នៅក្នុងកិច្ចពិភាក្សា

ដោយយល់ស្របនឹងសំណើរបស់លោក Tran Thanh Man ប្រធានរដ្ឋសភា លោក Gerry Brownlee ប្រធានរដ្ឋសភានូវែលហ្សេឡង់ បានឲ្យដឹងថា ក្នុងបរិបទដែលតំបន់ និងពិភពលោកជួបបញ្ហាប្រឈមសន្តិសុខជាច្រើនប្រទេសទាំងពីរចាំបាច់ត្រូវពង្រឹងទំនាក់ទំនងទ្វេភាគីឱ្យកាន់តែស៊ីជម្រៅថែមទៀត។ លោក Gerry Brownlee បានអះអាងថា នូវែលហ្សេឡង់ត្រៀមខ្លួនជាស្រេចបង្កើនការនាំចូលផលិតផលជាប្រៀបខ្លាំងរបស់វៀតណាម  រួមចំណែកសម្រេចគោលដៅទំហំពាណិជ្ជកម្ម ៣ ពាន់លានដុល្លារអាមេរិក នាពេលឆាប់ៗនេះ។ ថ្នាក់ដឹកនាំរដ្ឋសភាទាំងពីរក៏បានឯកភាពថា ភាគីទាំងពីរត្រូវបន្តសម្របសម្រួល និងគាំទ្រគ្នាទៅវិញទៅមកនៅវេទិកាតំបន់ និងអន្តរជាតិ ជាពិសេសនៅវេទិកាអង្គការសហប្រជាជាតិ អាស៊ាន និងបណ្តាវេទិកាដឹកនាំដោយអាស៊ាន៕

បកប្រែដោយ Thanh Cong