ជំរុញទំនាក់ទំនង វៀតណាម-នូវែលហ្សេឡង់ អភិវឌ្ឍយ៉ាងរឹងមាំ

នៅក្នុងជំនួប លោក To Lam អគ្គលេខាបក្ស បានស្នើឲ្យភាគីទាំងពីរបង្កើនការផ្លាស់ប្តូរគណៈប្រតិភូគ្រប់លំដាប់ថ្នាក់ និងតាមរយៈបណ្តាបក្ស រដ្ឋាភិបាល រដ្ឋសភា ប្រជាជន និងធុរកិច្ច ដើម្បីបង្កើនការយល់ដឹងគ្នាទៅវិញទៅមក។ លោក To Lam អគ្គលេខាបក្ស បានសង្កត់ធ្ងន់ថា សេដ្ឋកិច្ចរបស់វៀតណាម និងនូវែលហ្សេឡង់គឺជួយបំពេញបន្ថែមគ្នាទៅវិញទៅមក ហើយសក្តានុពលសម្រាប់កិច្ចសហប្រតិបត្តិការរវាងប្រទេសទាំងពីរនៅតែមានជាច្រើនណាស់។ ដូច្នេះក្នុងបរិបទសេដ្ឋកិច្ច និងពាណិជ្ជកម្មពិភពលោកមានការវិវឌ្ឍជាច្រើនប្រទេសទាំងពីរគប្បីតែជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ បង្កើតលក្ខខណ្ឌអំណោយផលសម្រាប់ផលិតផលដែលជាប្រៀបខ្លាំងរបស់ប្រទេសទាំងពីរអាចជ្រាបចូលទីផ្សារគ្នាបាន សំដៅសម្រេចបានគោលដៅទំហំពាណិជ្ជកម្មទ្វេភាគីគឺកម្រិត ៣ ពាន់លានដុល្លារអាមេរិក។

លោក To Lam អគ្គលេខាបក្ស និងលោក Gerry Brownlee ប្រធានរដ្ឋសភានូវែលហ្សេឡង់

លោក To Lam អគ្គលេខាបក្ស ក៏បានស្នើឱ្យនូវែលហ្សេឡង់ បន្តបង្កើតលក្ខខណ្ឌអំណោយផលសម្រាប់សហគមន៍អាណិកជនវៀតណាមក្នុងការរស់នៅ សិក្សា និងធ្វើការនៅនូវែលហ្សេឡង់ ព្រមទាំងជំរុញការរួមចំណែករបស់សហគមន៍ក្នុងការអភិវឌ្ឍសេដ្ឋកិច្ចសង្គមរបស់នូវែលហ្សេឡង់ ក៏ដូចជាទំនាក់ទំនង វៀតណាម-នូវែលហ្សេឡង់ និយាយរួម។

លោក To Lam អគ្គលេខាបក្ស ទទួលជួបលោក Gerry Brownlee ប្រធានរដ្ឋសភានូវែលហ្សេឡង់

រីឯលោក Gerry Brownlee ប្រធានរដ្ឋសភានូវែលហ្សេឡង់ បានអះអាងថា នូវែលហ្សេឡង់យកចិត្តទុកដាក់យ៉ាងខ្លាំងចំពោះតួនាទីសំខាន់របស់វៀតណាមនៅអាស៊ីអាគ្នេយ៍ ដោយចាត់ទុកវៀតណាមជាដៃគូសំខាន់ និងជិតស្និទ្ធក្នុងតំបន់។ លោក Gerry Brownlee បានសាទរភាពស្រដៀងគ្នាជាច្រើន រវាងប្រទេសទាំងពីរជាពិសេសទស្សនៈលើការអភិវឌ្ឍដែលរួមផ្សំកំណើនសេដ្ឋកិច្ច ជាមួយនឹងការអភិវឌ្ឍសង្គម និងមនុស្ស។ លោក Gerry Brownlee បានអះអាងថា រដ្ឋសភានូវែលហ្សេឡង់នឹងរួមចំណែកយ៉ាងសកម្មក្នុងការពង្រឹងទំនាក់ទំនងមិត្តភាពរវាងប្រជាជននៃប្រទេសទាំងពីរ និងពង្រឹងវិស័យសហប្រតិបត្តិការឱ្យកាន់តែស៊ីជម្រៅថែមទៀត។

នារសៀលថ្ងៃដដែល នៅទីស្នាក់ការរដ្ឋាភិបាល លោក Pham Minh Chinh នាយករដ្ឋមន្ត្រីវៀតណាម បានទទួលជួបលោក Gerry Brownlee ប្រធានរដ្ឋសភានូវែលហ្សេឡង់ ដែលកំពុងបំពេញទស្សនកិច្ចជាផ្លូវការនៅវៀតណាម។

លោក Pham Minh Chinh នាយករដ្ឋមន្ត្រី បានវាយតំលៃខ្ពស់ចំពោះការអភិវឌ្ឍដ៏ល្អ ជាក់ស្តែង និងទូលំទូលាយនៃទំនាក់ទំនងសហប្រតិបត្តិការទ្វេភាគី ចាប់តាំងពីប្រទេសទាំងពីរបានតម្លើងទំនាក់ទំនងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយក្នុងដំណើរទស្សនកិច្ចជាផ្លូវការនៅវៀតណាមរបស់លោក Christopher Luxon នាយករដ្ឋមន្ត្រីនូវែលហ្សេឡង់ នៅខែកុម្ភៈ ឆ្នាំ ២០២៥។

លោក Gerry Brownlee ប្រធានរដ្ឋសភានូវែលហ្សេឡង់បានអះអាងថា វៀតណាមជាដៃគូសំខាន់ ហើយរដ្ឋាភិបាល និងរដ្ឋសភានូវែលហ្សេឡង់ ផ្តល់អាទិភាពក្នុងការពង្រឹងទំនាក់ទំនងជាមួយវៀតណាមក្នុងគោលនយោបាយការបរទេសទាំងមូលរបស់នូវែលសេឡង់ក្នុងតំបន់។ លោក Gerry Brownlee បានបញ្ជាក់ថា រដ្ឋសភានូវែលហ្សេឡង់សន្យាយ៉ាងមុតមាំក្នុងការគាំទ្រជំរុញកិច្ចសហប្រតិបត្តិការជាមួយវៀតណាមលើគ្រប់វិស័យ។

លោក Pham Minh Chinh នាយករដ្ឋមន្ត្រី ទទួលជួបលោក Gerry Brownlee ប្រធានរដ្ឋសភានូវែលហ្សេឡង់

លោក Pham Minh Chinh នាយករដ្ឋមន្ត្រី បានថ្លែងអំណរគុណចំពោះនូវែលហ្សេឡង់ដែលបានជួយឧបត្ថម្ភវៀតណាមយ៉ាងសកម្មក្នុងដំណើរការអភិវឌ្ឍរបស់ខ្លួន។ លោក Pham Minh Chinh នាយករដ្ឋមន្ត្រី បានសង្កត់ធ្ងន់ថា ការតម្លើងទំនាក់ទំនងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ គឺជាលទ្ធផលនៃកិច្ចខិតខំប្រឹងប្រែងរបស់ភាគីទាំងពីរក្នុងរយៈពេលជាង ៥០ ឆ្នាំនៃការអភិវឌ្ឍទំនាក់ទំនងការទូត បើកទំព័រថ្មីក្នុងទំនាក់ទំនងរវាងប្រទេសទាំងពីរ។ លោក Pham Minh Chinh នាយករដ្ឋមន្ត្រីស្នើឲ្យភាគីទាំងពីរសម្របសម្រួលយ៉ាងសកម្ម ដើម្បីអនុវត្តកិច្ចព្រមព្រៀងកម្រិតខ្ពស់ដែលសម្រេចបាន បន្តជំរុញកិច្ចសហប្រតិបត្តិការឱ្យកាន់តែស៊ីជម្រៅថែមទៀត សមស្របនឹងក្របខ័ណ្ឌនៃទំនាក់ទំនងក្នុងកម្ពស់ថ្មីមួយ។

លោក Gerry Brownlee ប្រធានរដ្ឋសភា បានឯកភាពជាមួយសំណើរបស់លោក Pham Minh Chinh នាយករដ្ឋមន្ត្រី លើ “ចំណុច ៥” ដើម្បីពង្រឹងថែមទៀតនូវទំនាក់ទំនងសហប្រតិបត្តិការ វៀតណាម-នូវែលហ្សេឡង់ លើគ្រប់វិស័យ រួមទាំងការជំរុញទំនាក់ទំនងនយោបាយ និងការបរទេស ឲ្យកាន់តែស៊ីជម្រៅថែមទៀត បង្កើនការផ្លាស់ប្តូរគណៈប្រតិភូ និងការជួបជុំថ្នាក់ជាន់ខ្ពស់ រក្សាយន្តការសហប្រតិបត្តិការទ្វេភាគី អនុវត្តប្រកបដោយប្រសិទ្ធភាពនូវឯកសារដែលបានចុះហត្ថលេខា លើកឡើងយុទ្ធសាស្ត្រតភ្ជាប់សេដ្ឋកិច្ចទាំងពីរ ជំរុញការចុះហត្ថលេខាលើកិច្ចព្រមព្រៀងសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ បង្កើតលក្ខខណ្ឌអំណោយផលសម្រាប់ការបើកទីផ្សារសម្រាប់កសិផលរបស់គ្នាទៅវិញទៅមក សំដៅធ្វើពិពិធកម្មខ្សែសង្វាក់ផ្គត់ផ្គង់ ខិតខំសម្រេចបាននូវគោលដៅទំហំពាណិជ្ជកម្មទ្វេភាគីចំនួន ៣ ពាន់លានដុល្លារនៅឆ្នាំ ២០២៦ ការដាក់ពង្រាយផ្នែកថ្មីដែលប្រទេសទាំងពីរមានសក្តានុពល ដូចជាសេដ្ឋកិច្ចបៃតង សេដ្ឋកិច្ចឌីជីថល កិច្ចសហប្រតិបត្តិការលើការធ្វើបរិវត្តកម្មឌីជីថល វិទ្យាសាស្ត្រ បច្ចេកវិទ្យា និងនវានុវត្តន៍ ការឆ្លើយតបទៅនឹងការប្រែប្រួលអាកាសធាតុ បន្តជំរុញកិច្ចសហប្រតិបត្តិការការពារជាតិ និងសន្តិសុខជាក់ស្តែង និងក្នុងប្រតិបត្តិការរក្សាសន្តិភាពរបស់អង្គការសហប្រជាជាតិ។

ថ្នាក់ដឹកនាំទាំងពីរក៏បានឯកភាពពង្រឹងកិច្ចសហប្រតិបត្តិការលើវិស័យអប់រំ និងបណ្តុះបណ្តាល ការផ្លាស់ប្តូរនិស្សិត អ្នកវិទ្យាសាស្ត្រ និងអ្នកស្រាវជ្រាវ ពិចារណាលើការបើកជើងហោះហើរត្រង់តភ្ជាប់ប្រទេសទាំងពីរនាពេលឆាប់ៗ ដើម្បីជំរុញការជួបប្រាស្រ័យរវាងប្រជាជន និងប្រជាជន និងកិច្ចសហប្រតិបត្តិការសេដ្ឋកិច្ច និងពាណិជ្ជកម្ម ព្រមទាំងកិច្ចសហប្រតិបត្តិការរវាងមូលដ្ឋាននានា បង្កើតលក្ខខណ្ឌអំណោយផលសម្រាប់ធុរកិច្ចនៃប្រទេសទាំងពីរ ស្វែងរកឱកាសធ្វើអាជីវកម្ម និងវិនិយោគ។

លោក Gerry Brownlee ប្រធានរដ្ឋសភា បានទទួលស្គាល់មតិរបស់លោក Pham Minh Chinh នាយករដ្ឋមន្ត្រី អំពីវិធានការជំរុញទំនាក់ទំនងទ្វេភាគី ព្រមទាំងសង្កត់ធ្ងន់ថា វៀតណាម និងនូវែលហ្សេឡង់ចែករំលែកផលប្រយោជន៍រួមក្នុងការធានាប្រព័ន្ធពាណិជ្ជកម្មអន្តរជាតិពហុភាគី និងខ្សែសង្វាក់ផ្គត់ផ្គង់គ្មានការរំខាន ធានានូវកំណើនស្ថិរភាព និងវិបុលភាពនៃប្រទេសនីមួយៗក៏ដូចជាសកលលោក។ លោក Gerry Brownlee អះអាងថា នូវែលហ្សេឡង់វាយតំលៃខ្ពស់ចំពោះការរួមចំណែករបស់សហគមន៍អាណិកជនវៀតណាមចំពោះប្រទេសសាមី។

ថ្នាក់ដឹកនាំទាំងពីរបានបញ្ជាក់ថា ក្នុងបរិបទតំបន់ និងអន្តរជាតិមានការវិវឌ្ឍដ៏ស្មុគស្មាញ និងមិនអាចទាយទុកជាមុនបាន ជាមួយនឹងបញ្ហាប្រឈមផ្នែកសន្តិសុខ និងយុទ្ធសាស្ត្រថ្មីៗជាច្រើនកើតឡើង ប៉ះពាល់ដល់បរិយាកាសសន្តិសុខ និងការអភិវឌ្ឍនៃបណ្តាប្រទេសក្នុងតំបន់ វៀតណាម និងនូវែលហ្សេឡង់គប្បីពង្រឹងការពិគ្រោះយោបល់ ការចែករំលែកព័ត៌មាន ការវាយតម្លៃ និងការសម្របសម្រួលគោលនយោបាយ ព្រមទាំងសហប្រតិបត្តិការយ៉ាងជិតស្និទ្ធនៅវេទិកាតំបន់ និងអន្តរជាតិ រួមចំណែកយ៉ាងសកម្មដល់ការបង្កើតតំបន់អាស៊ីប៉ាស៊ីហ្វិកប្រកបដោយសន្តិភាព ស្ថិរភាព កិច្ចសហប្រតិបត្តិការ និងវិបុលភាព។ ថ្នាក់ដឹកនាំទាំងពីរបានគាំទ្រនូវែលសេឡង់ក្នុងការពង្រឹងទំនាក់ទំនងរបស់ខ្លួនជាមួយអាស៊ាន៕

បកប្រែដោយ Huyen Trang