សហគ្រាសជប៉ុនយកចិត្តទុកដាក់ និងវាយតម្លៃខ្ពស់ចំពោះបរិយាកាសវិនិយោគនៅវៀតណាម
កប.អនឡាញ - នាថ្ងៃទី ១៨ ខែវិច្ឆិកា ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេសវៀតណាម លោក Pham Binh Minh បានជួបសន្ទនាតាមទូរស័ព្ទជាមួយលោក Yamamoto Ichita អភិបាលខេត្ត Gunma ប្រទេសជប៉ុន ដើម្បីពិភាក្សាអំពីវិធានការនានាសម្រាប់ជួយគាំទ្រដល់ពលរដ្ឋវៀតណាម និងជំរុញកិច្ចសហប្រតិបត្តិការរវាងភាគីទាំងពីរ។
លោកឧបនាយករដ្ឋមន្ត្រី Pham Binh Minh បានថ្លែងអំណរគុណចំពោះរដ្ឋបាលខេត្ត Gunma ដែលបានចាត់វិធានការជាច្រើនដើម្បីជួយគាំទ្រសហគមន៍វៀតណាម ដូចជាការផ្តល់ប្រឹក្សាតាមរយៈខ្សែទូរស័ព្ទ HOTLINE ជាភាសាវៀតណាមអំពី Covid-19 ។ លោកឧបនាយករដ្ឋមន្រ្តីបានឲ្យដឹងថា រដ្ឋាភិបាលវៀតណាមកំពុងចាត់វិធានការដើម្បីការពារពលរដ្ឋវៀតណាមនៅប្រទេសជប៉ុន ហើយបានស្នើឱ្យរដ្ឋបាលខេត្ត Gunma បន្តជួយគាំទ្រសហគមន៍វៀតណាមក្នុងការទប់ទល់នឹងការរីករាលដាលនៃជំងឺកូវីដ១៩ ។
    |
 |
|
ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេស លោក Pham Binh Minh ជួបសន្ទនាតាមទូរស័ព្ទជាមួយអភិបាលខេត្ត Gunma ប្រទេសជប៉ុន (រូបថត៖ baochinhphu.vn) |
លោកឧបនាយករដ្ឋមន្រ្តី Pham Binh Minh បានវាយតម្លៃខ្ពស់ចំពោះការដែលខេត្ត Gunma បានជម្រុញការជួបប្រាស្រ័យផ្លាស់ប្តូរជាមួយវៀតណាម។ លោកឧបនាយករដ្ឋមន្រ្តីបានស្នើឱ្យអភិបាលខេត្ត Gunma លោក Yamamoto Ichita បន្តសហការជំរុញការទទួលកម្មករ និងសិក្ខាកាមវៀតណាមកផ្លាស់ប្តូរវប្បធម៌ និងជួយគាំទ្រសហគ្រាសខេត្តឲ្យបង្កើនការវិនិយោគចូលមកវៀតណាម។
លោកអភិបាល Yamamoto Ichita បានអះអាងថានឹងធ្វើការយ៉ាងជិតស្និទ្ធជាមួយស្ថានទូតវៀតណាមប្រចាំជប៉ុនដើម្បីជួយគាំទ្រយ៉ាងសកម្មដល់ពលរដ្ឋវៀតណាមឲ្យមានស្ថិរភាពក្នុងជីវភាពរស់នៅប្រចាំថ្ងៃ និងអនុវត្តវិធានការបង្ការនិងទប់ស្កាត់ជំងឺរាតត្បាត។
លោកអភិបាល Yamamoto Ichita បានមានប្រសាសន៍ថា សហគ្រាសជប៉ុន រួមទាំងខេត្ត Gunma មានចំណាប់អារម្មណ៍ និងវាយតំលៃខ្ពស់ចំពោះបរិយាកាសវិនិយោគរបស់វៀតណាម។ លោកអះអាងថារដ្ឋបាលខេត្តនឹងបន្តគាំទ្រ និងលើកទឹកចិត្តសហគ្រាសនានារបស់ខេត្តឲ្យចូលមកវិនិយោគនៅប្រទេសវៀតណាម។ លោកអភិបាល Yamamoto Ichita ស្នើឱ្យភាគីទាំងពីរបន្តពង្រឹងកិច្ចសហប្រតិបត្តិការ និងការផ្លាស់ប្តូរជាប្រចាំ ដើម្បីបង្កើតបរិយាកាសក្នុងការងារ និងការរស់សមរម្យសម្រាប់សិក្ខាកាមវៀតណាមនៅក្នុងខេត្ត ព្រមទាំងជម្រុញការផ្លាស់ប្តូររវាងសាកលវិទ្យាល័យនារីខេត្ត Gunma និងសាកលវិទ្យាល័យដទៃទៀតនៅប្រទេសវៀតណាម៕
បកប្រែដោយ Duy Hoan