ជំរុញទំនាក់ទំនងភាពជាដៃគូសហប្រតិបត្តិការយុទ្ធសាស្ត្រ វៀតណាម - កូរ៉េខាងត្បូង
កប.អនឡាញ - ក្នុងក្របខ័ណ្ឌនៃដំណើរទស្សនកិច្ចផ្លូវការនៅវៀតណាម តាមការអញ្ជើញរបស់ប្រធានរដ្ឋសភាវៀតណាម លោកស្រី Nguyen Thi Kim Ngan នាថ្ងៃទី ៣ ខែវិច្ឆិកា នៅទីក្រុងហាណូយ លោក Park Byeong Seug ប្រធានរដ្ឋសភាកូរ៉េខាងត្បូង បានទទួលជួបលោក Tran Van Tuy ប្រធានក្រុមសមាជិកសភាមិត្តភាពវៀតណាម - កូរ៉េខាងត្បូង។
នៅក្នុងជំនួបនេះ លោក Park Byeong Seug ប្រធានរដ្ឋសភាកូរ៉េខាងត្បូង បានអះអាងថា កូរ៉េខាងត្បូងតែងតែយកចិត្តទុកដាក់យ៉ាងខ្លាំងចំពោះទំនាក់ទំនងភាពជាដៃគូសហប្រតិបត្តិការយុទ្ធសាស្ត្រជាមួយវៀតណាម។ កូរ៉េខាងត្បូងគាំទ្រជានិច្ចចំពោះការអភិវឌ្ឍរបស់វៀតណាម ព្រមទាំងមានគោលបំណងចង់ជំរុញទំនាក់ទំនងរវាងប្រទេសទាំងពីរឲ្យកាន់តែអភិវឌ្ឍប្រកបដោយស៊ីជម្រៅ និងមានប្រសិទ្ធភាពលើគ្រប់វិស័យ។
    |
 |
|
ទិដ្ឋភាពនៃជំនួប (រូបថត៖ daibieunhandan.vn) |
ប្រធានរដ្ឋសភាកូរ៉េខាងត្បូង បានវាយតំលៃខ្ពស់ចំពោះសកម្មភាព និងកិច្ចសហប្រតិបត្តិការរបស់ក្រុមសមាជិកសភាមិត្តភាពនៃប្រទេសទាំងពីរ វៀតណាម-កូរ៉េខាងត្បូង នាពេលកន្លងមក។ លោកមានសេចក្តីសង្ឃឹមថា នាពេលខាងមុខ សមាជិកសភានៃក្រុមទាំងពីរនឹងបន្តពង្រឹងទំនាក់ទំនងយ៉ាងជិតស្និទ្ធ និងរួមគ្នាខិតខំប្រឹងប្រែងដើម្បីចូលរួមចំណែកជំរុញទំនាក់ទំនងរវាងប្រទេសទាំងពីរឡើងកំរិតកម្ពស់ថ្មីមួយ។
លោក Tran Van Tuy ប្រធានក្រុមសមាជិកសភាមិត្តភាព វៀតណាម - កូរ៉េខាងត្បូង បានមានប្រសាសន៍ថា ក្រុមសមាជិកសភាមិត្តភាពនៃប្រទេសទាំងពីរ នឹងបន្តយកចិត្តទុកដាក់ដល់កិច្ចសហប្រតិបត្តិការរវាងប្រទេសទាំងពីរឲ្យកាន់តែអភិវឌ្ឍថែមទៀត។ លោក Tran Van Tuy ក៏បានស្នើឲ្យភាគីកូរ៉េខាងត្បូងបន្តគាំទ្រសហគមន៍អាណិកជនវៀតណាម និងកូនក្រមុំវៀតណាមមានឋានៈស្របច្បាប់៕
បកប្រែដោយ Huyen Trang