វៀតណាម-កូរ៉េខាងត្បូង ខិតខំប្រឹងប្រែងដំឡើងទំនាក់ទំនងទៅជាទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ
កប.អនឡាញ - នារសៀលថ្ងៃទី២ វិច្ឆិកា នៅទីស្នាក់ការរដ្ឋាភិបាល អញ្ជើញថ្លែងមតិនៅជំនួបជាមួយប្រធានរដ្ឋសភាកូរ៉េខាងត្បូង លោក Park Byeong-Seug នាយករដ្ឋមន្រ្តីវៀតណាម លោក Nguyen Xuan Phuc បានលើកច្បាស់ថា វៀតណាមយកចិត្តទុកដាក់យ៉ាងខ្លាំងចំពោះទំនាក់ទំនងភាពជាដៃគូសហប្រតិបត្តិការយុទ្ធសាស្ត្រជាមួយកូរ៉េខាងត្បូង។ វៀតណាមប្រកាន់ខ្ជាប់នូវគោលនយោបាយការបរទេសឯករាជ្យភាព ស្វ័យភាព ពហុភាគី ធ្វើពិពិធកម្ម និងធ្វើសមាហរណកម្មអន្តរជាតិយ៉ាងស៊ីជម្រៅ វៀតណាមជានិច្ចកាលយកចិត្តទុកដាក់ និងមានបំណងចង់បន្តអភិវឌ្ឍឲ្យស៊ីជម្រៅថែមទៀតនូវទំនាក់ទំនងនងភាពជាដៃគូសហប្រតិបត្តិការយុទ្ធសាស្ត្រជាមួយកូរ៉េខាងត្បូង។
ប្រធានរដ្ឋសភាកូរ៉េខាងត្បូង លោក Park Byeong-Seug បានសង្កត់ធ្ងន់ថា កូរ៉េខាងត្បូងមានបំណងចង់បង្កើតទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយជាមួយវៀតណាមនាពេលខាងមុខ។ ការដំឡើងទំនាក់ទំនងនេះក្នុងបំណងរឹតបន្តឹងកិច្ចសហប្រតិបត្តិការក្នុងស្ថានភាពនៃការរីករាលដាលជម្ងឺកាន់តែខ្លាំងឡើងៗ។
|
|
នាយករដ្ឋមន្រ្តីវៀតណាម លោក Nguyen Xuan Phuc និងប្រធានរដ្ឋសភាកូរ៉េខាងត្បូង លោក Park Byeong-Seug (រូបថត៖ vnanet.vn) |
លោកនាយករដ្ឋមន្រ្តី Nguyen Xuan Phuc រំពឹងថា ប្រធានរដ្ឋសភាកូរ៉េខាងត្បូង លោក Park Byeong-Seug និងរដ្ឋសភាកូរ៉េខាងត្បួងនឹងបន្តយកចិត្តទុកដាក់ និងជម្រុញកិច្ចសហប្រតិបត្តិការរវាងភាគីទាំងពីរ រួមមានការបន្តរក្សា និងជំរុញការផ្លាស់ប្តូរគណៈប្រតិភូគ្រប់លំដាប់ថ្នាក់ បង្កើនការជឿទុកចិត្តខាងនយោបាយ ធ្វើឱ្យទំនាក់ទំនងរវាងប្រទេសទាំងពីរកាន់តែស៊ីជម្រៅថែមទៀត។
លោកនាយករដ្ឋមន្រ្តី Nguyen Xuan Phuc សង្ឃឹមថា លោកប្រធានរដ្ឋសភា និងសមាជិកសភាកូរ៉េខាងត្បូងបន្តលើកទឹកចិត្តឲ្យសហគ្រាសកូរ៉េខាងត្បូងបង្កើនការវិនិយោគចូលមកវៀតណាម។ រដ្ឋាភិបាលវៀតណាមត្រៀមខ្លួនជាស្រេចរួមដំណើរ ហើយបង្កលក្ខណៈងាយស្រួលសម្រាប់សហគ្រាសកូរ៉េខាងត្បូងក្នុងការពង្រីកការធ្វើអាជីវកម្ម ក៏ដូចជាជួយគាំទ្រដល់សហគ្រាសវៀតណាមទទួលការផ្ទេរបច្ចេកវិទ្យា និងចូលរួមក្នុងខ្សែសង្វាក់ផលិត-ផ្គត់ផ្គង់សកលរបស់បណ្ដាសម្ព័ន្ធក្រុមហ៊ុនកូរ៉េខាងត្បូង។ លោកនាយករដ្ឋមន្រ្តី Nguyen Xuan Phuc ក៏បានស្នើឲ្យកូរ៉េខាងត្បូងបន្តជំរុញឲ្យខ្លាំងក្លាថែមទៀតនូវកិច្ចសហប្រតិបត្តិការអភិវឌ្ឍដើមទុន ODA ព្រមទាំងបង្កើនកិច្ចសហប្រតិបត្តិការលើវិស័យពលកម្ម និងការជួបប្រាស្រ័យរវាងប្រជាជនជាមួយប្រជាជនផងដែរ។
លោកនាយករដ្ឋមន្រ្តី Nguyen Xuan Phuc ក៏បានស្នើឱ្យភាគីទាំងពីរបន្តពង្រឹងកិច្ចសហប្រតិបត្តិការនៅវេទិកាពហុភាគី ព្រមទាំងស្នើឱ្យកូរ៉េខាងត្បូងគាំទ្រវៀតណាមក្នុងការបំពេញតួនាទីជាប្រធានអាស៊ាននៅឆ្នាំ២០២០ និងជាប្រទេសសម្របសម្រួលសម្រាប់ទំនាក់ទំនងអាស៊ាន - កូរ៉េខាងត្បូងក្នុងដំណាក់កាល ២០២១-២០២៤ ក៏ដូចជាបន្តគាំទ្រជំហររបស់វៀតណាម និងអាស៊ានលើបញ្ហាសមុទ្រខាងកើតផងដែរ៕
បកប្រែដោយ Duy Hoan