ទីក្រុងហាណូយកែលម្អបរិយាកាសវិនិយោគយ៉ាងសកម្ម ដើម្បីស្វាគមន៍អង្គភាពអាជីវកម្មរបស់សហភាពអឺរ៉ុប
កប.អនឡាញ - នាថ្ងៃទី ២៣ ខែកញ្ញា នៅទីក្រុងហាណូយ លោក Vuong Dinh Hue លេខាគណៈកម្មាធិការបក្សទីក្រុងហាណូយ បានទទួលជួបពិភាក្សាការងារជាមួយលោក Pier Giorgio Aliberti ឯកអគ្គរដ្ឋទូត និងជាប្រធានស្ថានបេសកកម្មសហភាពអឺរ៉ុប (EU) ប្រចាំនៅវៀតណាម។
នៅកិច្ចពិភាក្សា លេខាគណៈកម្មាធិការបក្សទីក្រុងហាណូយលោក Vuong Dinh Hue បានមានប្រសាសន៍ថា EU គឺជាដៃគូសេដ្ឋកិច្ច និងពាណិជ្ជកម្មដ៏សំខាន់ សម្រាប់ប្រទេសវៀតណាម រួមទាំងទីក្រុងហាណូយ។ លោកបានវាយតម្លៃខ្ពស់ចំពោះសារៈសំខាន់នៃកិច្ចព្រមព្រៀងដែលបានចុះហត្ថលេខារវាងវៀតណាម និង EU ក្នុងរយៈពេលកន្លងមក ជាពិសេសកិច្ចព្រមព្រៀងពាណិជ្ជកម្មសេរីរវាងវៀតណាម និង EU (EVFTA) ដែលទើបតែបានអនុម័តដោយភាគីទាំងពីរនាពេលថ្មីៗនេះ។
|
|
លោក Vuong Dinh Hue លេខាគណៈកម្មាធិការបក្សទីក្រុងហាណូយ ទទួលជួបពិភាក្សាការងារជាមួយលោក Pier Giorgio Aliberti ឯកអគ្គរដ្ឋទូត និងជាប្រធានស្ថានបេសកកម្មសហភាពអឺរ៉ុបប្រចាំនៅវៀតណាម (រូបថត៖ vnanet.vn) |
លោក Vuong Dinh Hue បានបញ្ជាក់ថា ទីក្រុងហាណូយជានិច្ចកាលកែលម្អបរិយាកាសវិនិយោគ ធ្វើអាជីវកម្ម ដើម្បីស្វាគមន៍អង្គភាពអាជីវកម្មទាំងឡាយចូលមកវិនិយោគ រួមទាំងអ្នកវិនិយោគមកពី EU។ លោកក៏បានអះអាងថា ទីក្រុងហាណូយត្រៀមជាស្រេចផ្លាស់ប្តូរ និងស្វែងរកកិច្ចសហប្រតិបត្តិការជាមួយ EU។ ក្រៅពីនេះ ទីក្រុងហាណូយកំពុងរៀបចំផែនការមេយុទ្ធសាស្រ្តអភិវឌ្ឍន៍សេដ្ឋកិច្ច - សង្គមសម្រាប់រយៈពេលពី៥ ដល់ ១០ ឆ្នាំខាងមុខ និងមានចក្ខុវិស័យវែងឆ្ងាយទៅទៀត។ លោក Vuong Dinh Hue រំពឹងថា ដោយមានកិច្ចសហប្រតិបត្តិការនិងការគាំទ្រពី EU និងមូលដ្ឋានគ្រឹះនៃកិច្ចព្រមព្រៀងដែលបានចុះហត្ថលេខាដោយភាគីទាំងពីរនោះ ទីក្រុងហាណូយនឹងសម្រេចបានគោលដៅអភិវឌ្ឍន៍សេដ្ឋកិច្ចសង្គមសំខាន់ៗ នាពេលឆាប់ៗនេះ ប្រកបដោយចីរភាព។
លោក Pier Giorgio Aliberti ឯកអគ្គរដ្ឋទូត និងជាប្រធានស្ថានបេសកកម្ម EU ប្រចាំនៅវៀតណាម បានមានប្រសាសន៍ថា ក្នុងរយៈពេលប៉ុន្មានឆ្នាំកន្លងចុងក្រោយនេះ EU បានងាកមកអាស៊ី មានការយកចិត្តទុកដាក់ជាបណ្តើរៗ ទៅលើអាស៊ី ដែលក្នុងនោះវៀតណាមត្រូវបានគេចាត់ទុកថាជាដៃគូពិសេសដ៏សំខាន់មួយ។ នាពេលខាងមុខ លោក Pier Giorgio Aliberti មានគោលបំណងចង់ឲ្យមានកិច្ចពិភាក្សាបន្ថែមទៀតស្តីពីកិច្ចសហប្រតិបត្តិការជាក់ស្តែងរវាងភាគីទាំងពីរ ជាពិសេសលើខ្លឹមសារដែល EU មានប្រៀបខ្លាំងដូចជាការការពារបរិស្ថាន កែលម្អគុណភាពអាកាស និងគុណភាពទឹកជាដើម៕
បកប្រែដោយ Huyen Trang