សាមគ្គីភាព កិច្ចសហប្រតិបត្តិការ និងពង្រឹងពហុភាគីនិយមដែលប្រកាន់យកអង្គការសហប្រជាជាតិជាមជ្ឈភាព
កប.អនឡាញ - លោក Nguyen Xuan Phuc នាយករដ្ឋមន្រ្តីវៀតណាមផ្ញើសារដល់សម័យប្រជុំជាន់ខ្ពស់ នៃមហាសន្និបាតអង្គការសហប្រជាជាតិក្នុងឱកាសរំលឹកខួបលើកទី៧៥ នៃទិវាបង្កើតអង្គការសហប្រជាជាតិ។
អស់លោក លោកស្រីជាទីមេត្រី!
យើងប្រព្រឹត្តទៅពិធីអបអរសាទរខួបលើកទី ៧៥ ទិវានៃការបង្កើតអង្គការសហប្រជាជាតិក្នុងពេលវេលាដ៏ពិសេសមួយខណៈដែលមោទនភាពអំពីការរីកចម្រើនធំធាត់របស់អង្គការសហប្រជាជាតិលាយឡំនឹងការព្រួយបារម្ភអំពីអស្ថិរភាព និងរោគរាតត្បាតដែលរីករាលដាលពាសពេញពិភពលោក។
|
|
លោក Nguyen Xuan Phuc នាយករដ្ឋមន្រ្តីវៀតណាម ផ្ញើសារដល់សម័យប្រជុំជាន់ខ្ពស់នៃមហាសន្និបាតអង្គការសហប្រជាជាតិ ក្នុងឱកាសរំលឹកខួបលើកទី ៧៥ នៃទិវាបង្កើតអង្គការសហប្រជាជាតិ (រូបថត៖ vnanet.vn) |
ពីគំនរផេះផង់នៃសង្រ្គាមរយៈពេល ៧៥ ឆ្នាំកន្លងមកហើយ ពិភពលោកមិនមានសង្គ្រាមពិភពលោកថ្មីមួយទៀតឡើយ។ សន្តិភាព និងកិច្ចសហប្រតិបត្ដិការមិត្តភាពត្រូវបានពូនជ្រំ ភាពក្រីក្រ និងជំងឺត្រូវបានច្រានថយក្រោយ ហើយជីវភាពរស់នៅរបស់មនុស្សជាតិត្រូវបានផ្លាស់ថ្មី។
សមិទ្ធផលដ៏ធំធេងនោះ មិនអាចទៅរួចទេប្រសិនបើគ្មានគោលការណ៍ជាមូលដ្ឋានគ្រឹះនៃធម្មនុញ្ញអង្គការសហប្រជាជាតិ ហើយមិនអាចសម្រេចបានឡើយប្រសិនបើគ្មានអង្គការសហប្រជាជាតិដែលជាមជ្ឈមណ្ឌលសម្របសម្រួលសកម្មភាពរួមរបស់បណ្ដាប្រទេស។
ពិភពលោកកំពុងប្រឈមមុខនឹងបញ្ហាប្រឈមនានាដែលមិនធ្លាប់មានពីមុនមក។ រោគរាតត្បាត Covid-19 រួមជាមួយអស្ថិរភាព ជម្លោះ ការប្រកួតប្រជែងរវាងបណ្ដាប្រទេសមហាអំណាច នយោបាយគំរាមប្រើកំសាំង ការប្រែប្រួលអាកាសធាតុដែលកំពុងគំរាមកំហែងដល់សន្តិភាព និងការអភិវឌ្ឍប្រកបដោយចីរភាពរបស់ប្រជាជាតិទាំងអស់។
នៅប្រទេសវៀតណាមមានសុភាសិតមួយដែលថា “អគ្គីភ័យបង្ហាញពីមាស ភាពមិនអនុគ្រោះបង្ហាញពីសមត្ថភាព” ដើម្បីឆ្លងកាត់ការលំបាក និងបញ្ហាប្រឈមគឺយើងចាំបាច់ត្រូវរួបរួមគ្នា សហប្រតិបត្តិការ និងពង្រឹងពហុភាគីនិយមដែលប្រកាន់យកអង្គការសហប្រជាជាតិជាមជ្ឈភាព គោរពយ៉ាងខ្ជាប់ខ្ជួននូវធម្មនុញ្ញ និងច្បាប់អន្តរជាតិ គោរពឯករាជ្យ អធិបតេយ្យ និងបូរណភាពទឹកដីរបស់ប្រជាជាតិនីមួយៗ ប្រកាន់យកមនុស្សជាស្នូលក្នុងរាល់កិច្ចខិតខំដើម្បីអភិវឌ្ឍ និងកុំទុកឲ្យមាននរណាម្នាក់នៅពីក្រោយឡើយ។
អស់លោក លោកស្រីជាទីមេត្រី
អស់រយៈពេលជាច្រើនទសវត្សរ៍ “គ្មានអ្វីមានតម្លៃជាងឯករាជ្យ និងសេរីភាពទេ” និង ៣៥ ឆ្នាំនៃការផ្លាស់ថ្មី និងប្រកាន់យកប្រជាជនជាស្នូល បច្ចុប្បន្ននេះ វៀតណាមកំពុងមានការអភិវឌ្ឍយ៉ាងស្វាហាប់ រៀបចំរចនាសម្ព័ន្ធសេដ្ឋកិច្ចឡើងវិញ បុរេសកម្មក្នុងការធ្វើសមាហរណកម្ម ចូលរួមដោយមានទំនួលខុសត្រូវនៅវេទិកាពហុភាគីជាច្រើន ជាពិសេសអង្គការសហប្រជាជាតិ ហើយតស៊ូដើម្បីគោលដៅប្រជាជនសម្បូរធូធារ ប្រទេសរីកចម្រើន យុត្តិធម៌ ប្រជាធិបតេយ្យ និងអរិយធម៌។
ជាមួយនឹងកិច្ចខិតខំប្រឹងប្រែងរបស់ខ្លួន និងកិច្ចសហប្រតិបត្តិការជាមួយបណ្តាប្រទេស និងអង្គការអន្តរជាតិជាច្រើន មកដល់ពេលនេះយើងខ្ញុំបានគ្រប់គ្រងរោគរាតត្បាត Covid-19 ស្ទើរតែទាំងស្រុង និងស្តារសេដ្ឋកិច្ចឡើងវិញជាបណ្តើរៗ។
យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះបណ្តាប្រទេសដែលបានបោះឆ្នោតជ្រើសតាំងប្រទេសវៀតណាមជាសមាជិកមិនអចិន្រ្តៃយ៍នៃក្រុមប្រឹក្សាសន្តិសុខអង្គការសហប្រជាជាតិ ហើយវៀតណាមកំពុងខិតខំអស់ពីសមត្ថភាពដើម្បីបំពេញល្អនូវភារកិច្ចនេះ។ ស្របពេលជាមួយគ្នានេះក្នុងនាមជាប្រធានអាស៊ាននៅឆ្នាំ ២០២០ ប្រទេសវៀតណាម និងសមាជិកទាំងឡាយបានខិតខំកសាងសហគមន៍អាស៊ានមួយប្រកបដោយសាមគ្គីភាព ខ្លួនទីពឹងខ្លួន និងវិបុលភាព។
ប្រជាជនវៀតណាមបានប្តេជ្ញាចិត្តជាមួយប្រជាជាតិទាំងអស់នៅលើពិភពលោកដើម្បីថែរក្សាសន្តិភាព អនុវត្តប្រកបដោយជោគជ័យនូវគោលដៅអភិវឌ្ឍន៍ប្រកបដោយចីរភាព SDG ២០៣០ ហើយទង់ជាតិវៀតណាមនឹងបក់រវិកៗនៅស្ថានបេសកកម្មរក្សាសន្ដិភាពបន្ថែមទៀតនៃអង្គការសហប្រជាជាតិ។ ខ្ញុំជឿជាក់ថា ជាមួយនឹងការប្តេជ្ញាចិត្តខ្ពស់ និងការខិតខំប្រឹងប្រែងរួមគ្នាយើងនឹងកសាងពិភពលោកប្រកបដោយសន្តិភាព និងអនាគតភ្លឺស្វាងសម្រាប់ថ្ងៃនេះ និងថ្ងៃក្រោយ៕
សូមអរគុណ!
បកប្រែដោយ Pham Diep