អតីតអគ្គលេខាបក្សកុម្មុយនិស្តវៀតណាម លោក Le Kha Phieu ទទួលមរណភាព
កប.អនឡាញ - យោងតាមព័ត៌មានពីគណៈការពារ និងថែទាំសុខភាពកម្មាភិបាលមជ្ឈិម បានឲ្យដឹងថា អតីតអគ្គលេខាបក្ស នៃគណៈកម្មាធិការមជ្ឈិមបក្សកុម្មុយនិស្តវៀតណាម លោក Le Kha Phieu បានទទួលមរណភាពនៅវេលាម៉ោង២ និង៥២នាទី ថ្ងៃទី៧ ខែសីហា ឆ្នាំ២០២០ ក្នុងជន្មាយុ ៨៩ ឆ្នាំ ដោយជរាពាធ។
ពិធីបុណ្យសពរបស់លោក Le Kha Phieu នឹងប្រកាសនៅពេលក្រោយ។
លោកឧត្តមសេនីយឯក Le Kha Phieu កើតនៅថ្ងៃទី ២៧ ខែធ្នូ ឆ្នាំ១៩៣១ នៅឃុំ Dong Khe ស្រុក Dong Son ខេត្ត Thanh Hoa។
លោកធ្លាប់កាន់មុខតំណែងជាច្រើនក្នុងជួរកងទ័ព ជាប្រធានអគ្គស្នងការនយោបាយនៃកងទ័ពប្រជាជនវៀតណាម។ លោកបានជាប់ឆ្នោតជាអគ្គលេខានៃគណៈកម្មាធិការមជ្ឈិមបក្សកុម្មុយនិស្តវៀតណាមនៅក្នុងសន្និបាតមជ្ឈិមបក្សលើកទី ៤ (នីតិកាលទី ៨) លោកជាសមាជិករដ្ឋសភា នីតិកាលទី ១០ ។
ក្នុងឋានៈជាអគ្គលេខានៃគណៈកម្មាធិការមជ្ឈិមបក្សកុម្មុយនិស្តវៀតណាម (ខែធ្នូ ឆ្នាំ១៩៩៧ ដល់ ខែមេសា ឆ្នាំ២០០១) លោកនឹងសមាជិកនៃគណៈកម្មាធិការមជ្ឈិមបក្ស ការិយាល័យនយោបាយ និងគណៈលេខាមជ្ឈិមបក្ស បានដឹកនាំបក្សទាំងមូល ប្រជាជនទាំងមូល និងកងទ័ពទាំងមូលសំរេចបាននូវសមិទ្ធិផលជាច្រើនក្នុងបុព្វហេតុផ្លាស់ថ្មី ការធ្វើឧស្សាហូបនីយកម្ម ទំនើបកម្ម កសាង និងការពារមាតុភូមិ៕
បកប្រែដោយ Duy Hoan