លោកនាយករដ្ឋមន្រ្តី Nguyen Xuan Phuc អញ្ជើញជាអធិបតីក្នុងកិច្ចប្រជុំស្តីពីការអភិវឌ្ឍតំបន់សេដ្ឋកិច្ចសំខាន់ៗ
កប.អនឡាញ - នាថ្ងៃទី ២៦ ឧសភា លោកនាយករដ្ឋមន្ត្រី Nguyen Xuan Phuc បានអញ្ជើញជាអធិបតីក្នុងកិច្ចប្រជុំរបស់គណៈកម្មាធិការអចិន្រ្តៃយ៍នៃរដ្ឋាភិបាលស្តីពីការអភិវឌ្ឍតំបន់សេដ្ឋកិច្ចសំខាន់ៗ។
លោកនាយករដ្ឋមន្រ្តី Nguyen Xuan Phuc បានបញ្ជាក់ថា តំបន់សេដ្ឋកិច្ចសំខាន់ៗគឺជាសរសរស្តម្ភកំណើនដ៏សំខាន់របស់ប្រទេស។ ចំពោះតំបន់សេដ្ឋកិច្ចសំខាន់ៗនៅភាគខាងជើងវៀតណាមដោយមានតំបន់ត្រីកោណអភិវឌ្ឍន៍ រួមមានទីក្រុងហាណូយ ទីក្រុង Hai Phong និងខេត្ត Quang Ninh លោកនាយករដ្ឋមន្រ្តីបានលើកឡើងថា នេះជាតំបន់មួយដែលមានលក្ខខណ្ឌអំណោយផលជាច្រើនដើម្បីទាក់ទាញការវិនិយោគលើវិស័យបច្ចេកវិទ្យាខ្ពស់ អេឡិចត្រូនិច សេវាកម្ម ធនាគារ ហិរញ្ញវត្ថុ Logistics និងកសិកម្មដែលមានបច្ចេកវិទ្យាខ្ពស់ ព្រមទាំងវាក៏ជាតំបន់មានឧត្តភាពខាងធនធានមនុស្ស និងអាចបង្កើតជាមជ្ឈមណ្ឌលស្រាវជ្រាវដែលអនុវត្តបច្ចេកវិទ្យាខ្ពស់ផងដែរ។
    |
 |
|
លោកនាយករដ្ឋមន្រ្តី Nguyen Xuan Phuc អញ្ជើញជាអធិបតីក្នុងកិច្ចប្រជុំនេះ (រូបថត vov.vn) |
ឯតំបន់សេដ្ឋកិច្ចសំខាន់ៗនៃភូមិភាគកណ្តាលវៀតណាមត្រូវផ្តោតសំខាន់ទៅលើការអភិវឌ្ឍសេដ្ឋកិច្ចសមុទ្រ ការអភិវឌ្ឍប្រព័ន្ធអេកូឡូស៊ីសម្រាប់រថយន្ត សេវាដឹកជញ្ជូន ជាពិសេសគឺវិស័យទេសចរណ៍។ ព្រមទាំងគួរតែមានគម្រោងអភិវឌ្ឍវិស័យទេសចរណ៍នៅតំបន់ភូមិភាគកណ្តាលវៀតណាម ដោយរួមផ្សំជាមួយតំបន់ខ្ពង់រាបដើម្បីក្លាយទៅជាតំបន់សំខាន់មួយជាលក្ខណៈពិភពលោក។
ចំណែកតំបន់សេដ្ឋកិច្ចសំខាន់នៅភាគខាងត្បូងវៀតណាមត្រូវតែផ្តោតលើការទាក់ទាញការវិនិយោគដែលមានទ្រង់ទ្រាយធំ មានបច្ចេកវិទ្យាខ្ពស់ និងនាំមុខគេនៅក្នុងខ្សែសង្វាក់តម្លៃនានា ព្រមទាំងត្រូវលើកកម្ពស់តួនាទីជាក្បាលម៉ាស៊ីនរបស់ទីក្រុងហូជីមិញដើម្បីធ្វើឱ្យតំបន់នេះក្លាយជាកម្លាំងចលករសម្រាប់កំណើននៅក្នុងឆ្នាំ២០២០នេះតែម្តង។ ហើយតំបន់សេដ្ឋកិច្ចសំខាន់នៃតំបន់ដីសណ្តទន្លេមេគង្គត្រូវផ្តោតលើការអភិវឌ្ឍវិស័យកសិកម្មដែលមានបច្ចេកវិទ្យាខ្ពស់ ជាពិសេសផលិតផលកសិកម្មសំខាន់ៗដូចជា បង្កង បង្គា ត្រីប្រា និងផ្លែឈើជាដើម៕
បកប្រែដោយ Duy Hoan