ខ្សែភាពយន្តដែលត្រូវប្តូរជាឈាមស្រស់
កប.អនឡាញ - ខ្សែភាពយន្តឯកសារ "វៀតណាម-កម្ពុជា - ពេលវេលាបំភ្លេចមិនបានឡើយ" គឺជាខ្សែភាពយន្តឯកសារដែលផលិតដោយអង្គភាពភាពយន្តកងទ័ពប្រជាជនវៀតណាម ក្នុងឱកាសខួបលើកទី ៤០ នៃសង្គ្រាមការពារព្រំដែនភាគនិរតីវៀតណាម និងរួមជាមួយកងទ័ព និងប្រជាជនកម្ពុជាដណ្តើមយកជ័យជំនះលើរបបប្រល័យពូជសាសន៍ (៧ មករា ១៩៧៩ / ៧ មករា ២០១៩) ។
ខ្លឹមសារនៃខ្សែភាពយន្តឯកសារ "វៀតណាម - កម្ពុជា - ពេលវេលាបំភ្លេចមិនបានឡើយ" បង្ហាញពីបំណងប្រាថ្នាសន្តិភាពរបស់ប្រជាជនវៀតណាម និងប្រជាជនកម្ពុជា រួមជាមួយកិច្ចខិតខំប្រឹងប្រែងតាមរយៈការទូតរបស់បក្ស និងរដ្ឋវៀតណាម ដើម្បីរក្សាព្រំដែនប្រកបដោយសន្តិភាព និងមិត្តភាពរវាងប្រទេសទាំងពីរ។ តាមរយៈខ្សែភាពយន្តនេះ ជាថ្មីម្តងទៀតបានបញ្ជាក់ពីស្មារតីសាមគ្គីភាពអន្តរជាតិ និងការជួយគាំទ្រដ៏ថ្លៃថ្លា របស់កងទ័ព និងប្រជាជនវៀតណាម ដែលរួមជាមួយកងកម្លាំងស្នេហាជាតិរបស់កម្ពុជា វាយផ្តួលរំលំរបបប្រល័យពូជសាសន៍ ប៉ុល ពត ជួយអោយប្រទេសកម្ពុជារស់ឡើងវិញ។ ក្នុងដំណាក់កាលបដិវត្តនាពេលបច្ចុប្បន្ននេះ ទំនាក់ទំនងមិត្តភាពរវាងប្រទេសទាំងពីរត្រូវបានពង្រឹង និងពង្រីកឲ្យកាន់តែខ្លាំងក្លាថែមទៀត។
ចំពោះខ្សែភាពយន្តឯកសារដ៏មានតម្លៃដែលសិល្បករ សីល្បការិនី និងអ្នកយកព័ត៌មានកងទ័ពប្រជាជនវៀតណាមទាំងឡាយបានប្តូរជាឈាមស្រស់របស់ខ្លួន ខ្សែភាពយន្តឯកសារ "វៀតណាម - កម្ពុជា - ពេលវេលាបំភ្លេចមិនបានឡើយ" បានធ្វើឲ្យទស្សនិកជនមានការយល់ដឹងកាន់តែច្បាស់ថែមទៀត អំពីឧក្រិដ្ឋកម្មដ៏សាហាវរបស់ពួក ប៉ុល ពត និងថ្កោលទោសរបបប្រល័យពូជសាសន៍។ ទន្ទឹមនឹងនេះ ជាការកៀកស្មានឹងគ្នារវាងកងទ័ព និងប្រជាជន នៃប្រទេសទាំងពីរ វៀតណាម-កម្ពុជា ផ្តួលរំលំរបបប្រល័យពូជសាសន៍ ជួយប្រទេសកម្ពុជារស់ឡើងវិញ ព្រមទាំង ជាការបង្ហាញនូវទំនាក់ទំនងមិត្តភាព និងកិច្ចសហប្រតិបត្តិការរបស់ប្រទេសទាំងពីរនាពេលកន្លងមកផងដែរ។
|
|
ឈុតឆាកមួយក្នុងខ្សែភាពយន្តឯកសារ "វៀតណាម - កម្ពុជា - ពេលវេលាបំភ្លេចមិនបានឡើយ" |
ខ្សែភាពយន្តនេះ ត្រូវបានចាប់ផ្តើមពីបរិបទនៃប្រទេសកម្ពុជាកាលពីជាង ៤០ ឆ្នាំមុន នៅពេលដែលទាំងប្រជាជន ទាំងព្រះមហាក្សត្រ ទាំងកូនចៅនៃវង្សានុវង្ស បានក្លាយទៅជាជនរងគ្រោះនៃរបបប្រល័យពូជសាសន៍ ប៉ុល ពត។ ពួក ប៉ុល ពត បានអនុវត្តគោលនយោបាយប្រល័យពូជសាសន៍ និងការបោសសម្អាតផ្ទៃក្នុង ប្រែទីក្រុងភ្នំពេញក្លាយទៅជាកន្លែងមួយក្នុងចំណោម១០កន្លែងដែលគួរឱ្យខ្លាចបំផុតនៅលើពិភពលោក។ វាលពិឃាតកើតមានឡើងច្រើនឡើងៗ រណ្តៅកប់ខ្មោចមាននៅគ្រប់ទីកន្លែង។ ប្រជាជនខ្មែរជិត ៣ លាននាក់បានស្លាប់ដោយជំងឺ ដោយអត់ឃ្លាន និងការធ្វើទារុណកម្ម ការកាប់សម្លាប់យ៉ាងឃោឃៅព្រៃផ្សៃ។ ពួក ប៉ុល ពត បានជម្រុញជាតិសាសន៍ខ្លួនឯងធ្លាក់ទៅក្នុងការគំនុំគំគួន និងភាពឈឺចាប់ខ្លោចផ្សា នៃគ្រោះប្រល័យពូជសាសន៍។
ទន្ទឹមនឹងការអនុវត្តគោលនយោបាយគ្រប់គ្រងផ្ទៃក្នុងយ៉ាងឃោឃៅសាហាវ ដោយទទួលបានការជួយគាំទ្រពីសំណាក់ពួកប្រតិកិរិយាបរទេស អាជ្ញាធរខ្មែរក្រហមបានបំផ្លិចបំផ្លាញទំនាក់ទំនងវៀតណាម - កម្ពុជា ចាត់ទុកវៀតណាមជាសត្រូវលេខ១ ដែលត្រូវកម្ចាត់ចោល និងប្រកាសថា ជម្លោះរវាងប្រទេសទាំងពីរគឺជាជម្លោះដែលមិនអាចសម្រុះសម្រួលបាន ដោយចាំចាច់ត្រូវតែប្រើវិធានការយោធាជាមិនខាន។
នៅវៀតណាម នាថ្ងៃទី៣០ ខែមេសា ឆ្នាំ១៩៧៧ ខណៈពេលដែលប្រទេសវៀតណាមកំពុងប្រារព្ធទិវាឯកភាពប្រទេសជាតិ ពួក ប៉ុល ពត បានរំលោភបំពានលើអធិបតេយ្យភាពព្រំដែនវៀតណាម កាប់សម្លាប់មនុស្ស ប្លន់ទ្រព្យសម្បត្តិ បង្កការភ័យស្លន់ស្លោចំពោះប្រជាជននៅខេត្ត Tay Ninh និងខេត្ត An Giang ។ ប្រជាជនវៀតណាមរាប់ពាន់នាក់ត្រូវកាប់សម្លាប់។ កាលពីដើមខែឧសភា ឆ្នាំ១៩៧៥ នៅពេលដែលវៀតណាមទើបតែបានឯកភាពប្រទេសជាតិ កងទ័ព ប៉ុល ពត បានរំលោភបំពានលើកោះ Phu Quoc សម្លាប់ជនស៊ីវិលរាប់រយនាក់។
ប្រឈមមុខនឹងសភាពការណ៍នេះ កងទ័ពប្រជាជនវៀតណាម ក្រោមការដឹកនាំរបស់បក្ស បានសម្រេចចិត្តបញ្ជូនកងកម្លាំងស្រួចមួយផ្នែកទៅកាន់ព្រំដែនភាគនិរតី ដើម្បីការពារអធិបតេយ្យភាព ការពារប្រជាពលរដ្ឋ និងវាយកម្ទេចល្បិចកលរបស់ ប៉ុល ពត។ នាគ្រានោះដែរ ប្រធានកងវរសេនាធំ នៃកងទ័ពខ្មែរក្រហម លោក ហ៊ុន សែន បានជំទាស់នឹងរបបប្រល័យពូជសាសន៍ និងការក្បត់ចំណងសាមគ្គីភាពវៀតណាម - កម្ពុជារបស់អាជ្ញាធរដែលដឹកនាំដោយ ប៉ុល ពត។ លោក ហ៊ុន សែន រួមជាមួយមិត្តរួមអាវុធមួយចំនួនទៀតបានឆ្លងដែលទៅប្រទេសវៀតណាម អំពាវនាវជំនួយពីវៀតណាម ដើម្បីប្រឆាំងនឹងរបបប្រល័យពូជសាសន៍ ប៉ុល ពត។ កងលេខ ១២៥ ជាអង្គការដើម នៃកងកម្លាំងប្រដាប់អាវុធសាមគ្គីសង្គ្រោះជាតិកម្ពុជាដែលលោក ហ៊ុន សែន ជាមេបញ្ជាការ ត្រូវបានបង្កើតឡើងនៅ Long Giao ខេត្ត Dong Nai។ ហើយរណសិរ្សសាមគ្គីសង្គ្រោះជាតិកម្ពុជាត្រូវបានបង្កើតឡើង បានអំពាវនាវឱ្យបង្រួបបង្រួមប្រជាជនទាំងមូល ក្រោកឈរឡើងវាយផ្ដួលរំលំរបប ប៉ុល ពត លុបបំបាត់ចោលរបបដ៏សាហាវឃោឃៅនេះ។ ព្រមទាំង រណសិរ្សសាមគ្គីសង្គ្រោះជាតិកម្ពុជាក៏បានអំពាវនាវរដ្ឋាភិបាល និងកងទ័ពប្រជាជនវៀតណាម ជួយកម្ពុជាឱ្យរួចផុតពីរបបប្រល័យពូជសាសន៍។ ដើម្បីឆ្លើយតបទៅនឹងការអំពាវនាវជាបន្ទាន់នេះ ហើយវៀតណាមប្រកាន់គោលជំហរ ជួយមិត្តគឺជួយខ្លួនឯង កងទ័ពស្ម័គ្រចិត្តវៀតណាមបានអនុវត្តសិទ្ធិការពារខ្លួនឯងដ៏ត្រឹមត្រូវ ប្រឆាំងនឹងការវាយប្រហារឈ្លានពានរបស់ពួក ប៉ុល ពត កៀកស្មាជាមួយកងកម្លាំងប្រដាប់អាវុធកម្ពុជា បើកការវាយសម្រុកយ៉ាងឆាប់រហ័ស វាយបំបាក់កងកម្លាំងខ្មែរក្រហម។
នៅថ្ងៃទី៧ ខែមករា ឆ្នាំ១៩៧៩ រាជធានីភ្នំពេញត្រូវបានរំដោះទាំងស្រុង។ របបខ្មែរក្រហមបានដួលរលំ។ ទោះបីជាប្រទេសវៀតណាមនៅមានការលំបាកជាច្រើនក៏ដោយ ក៏ប៉ុន្តែក្នុងស្មារតីបរិសុទ្ធ ស្មោះត្រង់ កងទ័ព និងប្រជាជនវៀតណាម បានដឹកបញ្ជូនស្បៀងអាហារ និងឱសថរាប់រយតោន មកជួយប្រជាជនកម្ពុជា ជំនះការអត់ឃ្លាន និងជំងឺ។ វៀតណាមបានបន្តកៀកស្មាជាមួយកងកម្លាំងប្រដាប់អាវុធ និងប្រជាជនកម្ពុជាការពារភូមិ ស្រុក វាយឱ្យបរជ័យរាល់ការវាយបករបស់កងទ័ព ប៉ុល ពត ជួយប្រទេសមិត្តការពារបូរណភាពទឹកដីក្នុងរយៈពេល ១០ ឆ្នាំ បន្ទាប់ពីបានរំដោះ។
|
|
ឈុតឆាកមួយក្នុងខ្សែភាពយន្តឯកសារ "វៀតណាម - កម្ពុជា - បណ្តាឆ្នាំដែលបំភ្លេចមិនបានឡើយ" |
នៅថ្ងៃទី១៨ ខែកុម្ភៈ ឆ្នាំ១៩៧៩ វៀតណាម និងកម្ពុជា បានចុះហត្ថលេខាលើសន្ធិសញ្ញាសន្តិភាព មិត្តភាព និងកិច្ចសហប្រតិបត្តិការយូរអង្វែងរវាងប្រទេសទាំងពីរ ដែលជាការកត់សម្គាល់នៃការអភិវឌ្ឍដ៏សំខាន់ក្នុងទំនាក់ទំនងវៀតណាម - កម្ពុជា។ ក្នុងប៉ុន្មានទសវត្សរ៍កន្លងមក ទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការរវាងប្រទេសទាំងពីរ សម្រេចបានសមិទ្ធិផលជាច្រើនលើគ្រប់វិស័យ។ មកដល់ពេលនេះ វៀតណាមគឺជាវិនិយោគិនធំលំដាប់ទី៥ នៅក្នុងចំណោម ៥០ ប្រទេស និងតំបន់ដែនដី ដែលវិនិយោគទុននៅប្រទេសកម្ពុជា ដោយមានគម្រោងសេដ្ឋកិច្ចជិត២០០គម្រោង ។ និមិត្តរូប នៃទំនាក់ទំនងមិត្តភាពរវាងប្រទេសទាំងពីរគឺស្តូបមិត្តភាពវៀតណម-កម្ពុជា ចំនួន១៧ ត្រូវបានកសាងឡើងនៅទូទាំងប្រទេសកម្ពុជា ដែលបង្ហាញពីការដឹងគុណយ៉ាងជ្រាលជ្រៅរបស់ប្រជាជនកម្ពុជាចំពោះប្រជាជនវៀតណាម និងការដឹងគុណដល់យុទ្ធជនបានបំពេញភារកិច្ចអន្តរជាតិដ៏ឧត្តុង្គឧត្តម ដើម្បីជួយប្រជាជនកម្ពុជារស់រានមានជិវិតឡើងវិញ។
ខ្សែភាពយន្ត "វៀតណាម - កម្ពុជា - ពេលវេលាដែលមិនអាចបំភ្លេចឡើយ" បានបញ្ជាក់ម្ដងទៀតអំពីប្រៀបខ្លាំង របស់អង្គភាពភាពយន្តកងទ័ពប្រជាជនវៀតណាម ក្នុងវិស័យខ្សែភាពយន្តឯកសារស្តីពីសង្រ្គាម ដោយខ្សែភាពយន្តប្រវត្តិសាស្ត្រមួយចំនួនក្នុងខ្សែភាពយន្តនេះ ភាគច្រើនជាឯកសាររបស់អ្នកថត និងអ្នកដឹកនាំថតរឿង នៃអង្គភាពភាពយន្តកងទ័ពប្រជាជនវៀតណាម។ ជាពិសេស ក្នុងចំណោមអ្នកចូលរួមធ្វើខ្សែភាពយន្តនេះ មានអ្នកខ្លះដែលធ្លាប់ឆ្លងកាត់សង្គ្រាមការពារព្រំដែនភាគនិរតីវៀតណាម ហើយអ្នកខះបានមកប្រទេសកម្ពុជា ដើម្បីជួយប្រទេសមិត្ត វាយផ្តួលរំលំរបបប្រល័យពូជសាសន៍ដែរ។ ដោយមានបទពិសោធន៍ជាច្រើន បណ្តាអ្នកដឹកនាំថតរឿងបានបែងចែកការងារនឹងគ្នា អ្នកខ្លះធ្វើការនៅទីក្រុងហាណូយ អ្នកខ្លះធ្វើការនៅខាងត្បូងវៀតណាម ហើយអ្នកខ្លះប្រមូលឯកសារ។ ដោយមានការប្តេជ្ញាចិត្ត និងការខិតខំប្រឹងប្រែងរបស់កម្មាភិបាល និងបុគ្គលិកទាំងអស់ នៃអង្គភាពភាពយន្តកងទ័ពប្រជាជនវៀតណាម រួមជាមួយជំនួយពីសហការី នៃប្រទេសកម្ពុជា ខ្សែភាពយន្តឯកសារ "វៀតណាម - កម្ពុជា បណ្តាឆ្នាំដែលបំភ្លេចមិនបានឡើយ" ត្រូវបានសម្រេចក្នុងរយៈពេលជិត២ខែតែប៉ុណ្ណោះ។ ហើយមិនត្រឹមតែប្រើសម្រាប់រំលឹកខួបលើកទី៤០ នៃសង្គ្រាមការការពារព្រំដែនភាគនិរតីវៀតណាម និងរួមជាមួយកងទ័ព និងប្រជាជនកម្ពុជាដណ្ដើមយកជ័យជំនះលើរបបប្រល័យពូជសាសន៍តែប៉ុណ្តោះទេ ខ្សែភាពយន្តនេះជាថ្មីម្តងទៀតបានបញ្ជាក់អះអាងពីការអភិវឌ្ឍយ៉ាងល្អប្រសើរ នៃទំនាក់ទំនងមិត្តភាពរវាងវៀតណាម និងកម្ពុជាផងដែរ៕
បកប្រែដោយ Duy Hoan