ប៉ាគីស្ថានរឹតបន្តឹងសន្តិសុខនៅមុនកិច្ចប្រជុំកំពូលរបស់អង្គការសហប្រតិបត្តិការសៀងហៃ
ប្រទេសប៉ាគីស្ថានបានដាក់ពង្រាយវិធានការសន្តិសុខយ៉ាងតឹងរ៉ឹងជាបន្តបន្ទាប់នៅមុនពេលកិច្ចប្រជុំកំពូលរបស់អង្គការសហប្រតិបត្តិការសៀងហៃ (SCO) ដែលប្រព្រឹត្តិទៅនៅសប្តាហ៍នេះ (១៥-១៦ តុលា)។
តាមនោះ អាជ្ញាធរប៉ាគីស្ថានបានបិទការិយាល័យរបស់ក្រុមហ៊ុនអាកាសចរណ៍អន្តរជាតិប៉ាគីស្ថាន (PIA) នៅក្នុងរដ្ឋធានីអ៊ីស្លាម៉ាបាដ ចាប់ពីថ្ងៃទី ១៤ ដល់ថ្ងៃទី ១៦ ខែតុលា។
លើសពីនេះ ការចូលទៅកាន់តំបន់ក្រហមក្នុងទីក្រុងអ៊ីស្លាម៉ាបាដ ក៏ត្រូវបានរឹតត្បិតចំពោះសាធារណជន ដើម្បីធានាសន្តិសុខក្នុងអំឡុងពេលប្រព្រឹត្តិទៅកិច្ចប្រជុំនេះផងដែរ។
វិធានការសន្តិសុខដ៏តឹងរ៉ឹងជាច្រើនទៀតក៏ត្រូវបានអនុវត្តដោយរដ្ឋាភិបាលប៉ាគីស្ថានផងដែរ រួមមាន៖ ការរឹតបន្តឹងសន្តិសុខនៅពន្ធនាគារ Adiala ជាកន្លែងដែលអតីតនាយករដ្ឋមន្ត្រី Imran Khan ត្រូវបានឃុំខ្លួន; ការអនុវត្តមាត្រា ១៤៤ (ដូចជាការហាមឃាត់ការជួបជុំ បាតុកម្ម ការប្រើប្រាស់យន្តហោះដ្រូន...) នៅទីក្រុងជាច្រើនដូចជា Karachi និង Rawalpindi; ការដាក់ពង្រាយកងទ័ពនៅក្នុងរដ្ឋធានីអ៊ីស្លាម៉ាបាដ ចាប់ពីថ្ងៃទី ៥-១៧ ខែតុលា ដើម្បីធានាសន្តិសុខនិងសណ្តាប់ធ្នាប់។
កិច្ចប្រជុំកំពូលរបស់អង្គការសហប្រតិបត្តិការសៀងហៃបានប្រព្រឹត្តិទៅនៅថ្ងៃទី ១៥ និងទី ១៦ ខែតុលានៅក្នុងរដ្ឋធានី អ៊ីស្លាម៉ាបាដ ប្រទេសប៉ាគីស្ថាន។ ព្រឹត្តិការណ៍នេះមានការចូលរួមពីប្រមុខរដ្ឋនៃប្រទេសសមាជិកចំនួន៩ តំណាងប្រទេសសង្កេតការណ៍ចំនួន៣ និងដៃគូសន្ទនាចំនួន៦៕
តាម vovworld.vn