កម្លាំងចលករជួយប្រជាជនខ្មែរឈោងឈានឡើង

បន្ទាប់ពីរយៈពេលជិត ៣ ឆ្នាំនៃការអនុវត្តកម្មវិធីគោលដៅជាតិសម្រាប់ការអភិវឌ្ឍសេដ្ឋកិច្ចសង្គមនៅតំបន់ជនជាតិភាគតិច និងតំបន់ភ្នំសម្រាប់ដំណាក់កាល ២០២១-២០៣០; ដំណាក់កាលទី ១ ពីឆ្នាំ ២០២១ ដល់ឆ្នាំ ២០២៥ (កម្មវិធីលេខ ១៧១៩) ជីវភាពរស់នៅរបស់ប្រជាជនខ្មែរនៅទីនេះមានភាពប្រសើរឡើងដោយឥតឈប់ឈរ និងស្រុកកំណើតក៏កាន់តែរីកចម្រើនផងដែរ។

ក្នុងរយៈពេលប៉ុន្មានថ្ងៃកន្លងមក អ្នកភូមិ Xoai Thum ឃុំ Ngai Xuyen មានភាពសប្បាយរីករាយយ៉ាងខ្លាំងនៅពេលដែលខ្សែផ្លូវបេតុងធំក្នុងភូមិនេះត្រូវបានដាក់ឲ្យប្រើប្រាស់ជាផ្លូវការ ដែលបង្កភាពងាយស្រួលដល់ការធ្វើដំណើរ។ គម្រោងនេះត្រូវបានបណ្តាក់ទុនពីប្រភពទុននៃកម្មវិធីលេខ ១៧១៩ ដែលមានតម្លៃជាង ១.៤ ពាន់លានដុង។ អ្នកស្រី Thach Kim Huoi នៅភូមិ Xoai Thum បានឲ្យដឹងថា៖ “កាលពីមុន ផ្លូវនេះតូចណាស់ ដែលធ្វើឲ្យពិបាកក្នុងការធ្វើដំណើរ។ អាស្រ័យដោយមានការវិនិយោគពីរដ្ឋក្នុងការពង្រីកផ្លូវ អ្នកគ្រប់គ្នានៅទីនេះសប្បាយចិត្តណាស់”។

អ្នកភូមិ Xoai Thum ឃុំ Ngai Xuyen ពួតដៃគ្នាសាងសង់ផ្លូវដោយមានការឧបត្ថម្ភពីកម្មវិធី លេខ១៧១៩

ដោយទទួលបានអត្ថប្រយោជន៍ពីកម្មវិធីលេខ ១៧១៩ ក្នុងរយៈពេលប៉ុន្មានខែថ្មីៗនេះ លោក Danh But នៅភូមិ Xoai Thum មិនអាចលាក់បាំងបាននូវរំភើបសប្បាយរីករាយក្នុងចិត្ត ពីព្រោះក្រុមគ្រួសាររបស់គាត់លែងត្រូវរស់នៅក្នុងផ្ទះទ្រុឌទ្រោមរាល់ពេលមានភ្លៀងធ្លាក់។ ផ្ទះដ៏រឹងមាំ និងធំទូលាយថ្មីដែលសាងសង់ឡើងពីថវិកាជួយឧបត្ថម្ភរបស់កម្មវិធី មិនត្រឹមតែជួយគ្រួសាររបស់គាត់រក្សាលំនឹងជីវភាពរស់នៅប៉ុណ្ណោះទេ ថែមទាំងជាកម្លាំងចលករក្នុងការអភិវឌ្ឍសេដ្ឋកិច្ចគ្រួសារទៀតផង។ ក្នុងនាមជាគ្រួសារក្រីក្រមួយ នៅចុងឆ្នាំ ២០២២ លោក Danh But ត្រូវបានធនាគារគោលនយោបាយសង្គមឲ្យខ្ចីទឹកប្រាក់ចំនួន ៥០ លានដុងពីប្រភពទុននៃកម្មវិធីលេខ ១៧១៩ រួមជាមួយនឹងប្រាក់សំចៃបាន គាត់បានសាងសង់ផ្ទះឡើងវិញក្នុងតម្លៃជិត ១០០ លានដុង។ លោក Danh But បានចែករំលែកថា៖ “ផ្ទះចាស់របស់គ្រួសារខ្ញុំមានការខូចខាតយូរមកហើយ ប៉ុន្តែគ្មានលុយជួសជុលទេ។ អាស្រ័យដោយមានកម្ចីអនុគ្រោះ ខ្ញុំអាចសាងសង់ផ្ទះរឹងមាំបាន។ នេះជាការជួយឧបត្ថម្ភទាន់ពេលវេលា និងជាការលើកទឹកចិត្តសម្រាប់ក្រុមគ្រួសារបន្តខិតខំប្រឹងប្រែងអភិវឌ្ឍសេដ្ឋកិច្ចឱ្យមានជីវភាពកាន់តែប្រសើរឡើង”។

លោក Kien Thanh Huy Sal ប្រធានគណៈកម្មាធិការប្រជាជនឃុំ Ngai Xuyen បានឲ្យដឹងថា៖ “នៅឆ្នាំ២០២២ ដោយអនុវត្តកម្មវិធីជំនួយលំនៅដ្ឋានក្រោមកម្មវិធីលេខ ១៧១៩ ឃុំ Ngai Xuyen បានសាងសង់ផ្ទះចំនួន ១៩ ខ្នង ជូនដល់គ្រួសារដែលជួបការលំបាក។ ទន្ទឹមនឹងនោះ ធនាគារគោលនយោបាយសង្គមបានជួយឧបត្ថម្ភគ្រួសារចំនួន ៥៣ គ្រួសារជាមួយនឹងប្រាក់កម្ចីក្នុងអត្រាការប្រាក់អនុគ្រោះសម្រាប់ការសាងសង់ និងជួសជុលផ្ទះឡើងវិញ។ គណៈកម្មាធិការរណសិរ្សមាតុភូមិវៀតណាមខេត្ត Tra Vinh បានជួយឧបត្ថម្ភសាងសង់ផ្ទះមហាសាមគ្គីចំនួន ១៧ ខ្នង។ល។  មកទល់សព្វថ្ងៃនេះ ឃុំទាំងមូលមានគ្រួសារចំនួន ២,៩៣៦ ដែលមានផ្ទះតាមបទដ្ឋានកំណត់ (ស្មើនឹង ៩៣.៤៧%) គ្មានផ្ទះបណ្ដោះអាសន្ន ឬផ្ទះទ្រុឌទ្រោមទៀតទេ។ លើសពីនេះ ឃុំបានសម្របសម្រួលជាមួយធនាគារគោលនយោបាយសង្គម ជួយឧបត្ថម្ភដល់គ្រួសារចំនួន ១៨ ដើម្បីផ្លាស់ប្តូរការងារ និងផ្តល់ជំនួយទឹកស្អាតដល់គ្រួសារចំនួន១៤។ គម្រោងដែលត្រូវបានសាងសង់ បំពេញតម្រូវការចាំបាច់របស់ប្រជាពលរដ្ឋសម្រាប់ការធ្វើដំណើរ សកម្មភាពកម្សាន្ត លើកកម្ពស់ជីវភាពខាងសម្ភារៈ និងស្មារតីរបស់ប្រជាជន”។

ការអនុវត្តកម្មវិធីលេខ ១៧១៩ ប្រកបដោយប្រសិទ្ធភាពបានជួយជនរួមជាតិខ្មែរនៅឃុំ Ngai Xuyen មានកន្លែងរស់នៅប្រកបដោយស្ថិរភាព រក្សាលំនឹងជីវភាពរស់នៅ។ ដោយហេតុនេះ ជីវភាពរស់នៅរបស់ប្រជាជនបានប្រសើរឡើង រួចផុតពីភាពក្រីក្រ ហើយមុខមាត់ជនបទដែលមានជនរួមជាតិខ្មែររស់នៅច្រើន ក៏កាន់តែមានភាពរីកចម្រើនផងដែរ៕

បកប្រែដោយ Huyen Trang