សមរភូមិក្រោយរឹងមាំដើម្បីសមរភូមិជួរមុខប្រយុទ្ធប្រឆាំងនឹងជំងឺរាតត្បាត
កប.អនឡាញ - ក្នុងស្មារតី “សមរភូមិក្រោយរឹងមាំដើម្បីសមរភូមិជួរមុខប្រយុទ្ធប្រឆាំងនឹងជំងឺរាតត្បាត” ក្នុងរយៈពេលកន្លងមក គ្រួសារជនជាតិខ្មែរ និងជនជាតិចិន ជាច្រើនគ្រួសារ នៅខេត្ត Soc Trang បានប្រមូលផល រៃអង្គាសបរិច្ចាកកសិផល និងស្បៀងអាហារជាច្រើន ជូនកងកម្លាំងនៅជួរមុខ ក្នុងបំណងរួមដៃគ្នាចូលរួមចំណែកជាមួយគណៈកម្មាធិការបក្ស និងអាជ្ញាធរមូលដ្ឋានទប់ស្កាត់ការរាតត្បាតនៃជំងឺកូវីដ-១៩។
យើងខ្ញុំបានមកដល់ផ្ទះរបស់លោក Lam Hoang Trung នៅភូមិ Tam Soc D2 ឃុំ My Thuan ស្រុក My Tu ខេត្ត Soc Trang ។ ទោះបីជិតពេលថ្ងៃត្រង់ក៏ដោយ ក៏លោក Trung នៅតែជ្រមុជខ្លួននៅក្នុងស្រះ ដើម្បីដកផ្កាព្រលិត។
គ្រួសារលោក Trung មានស្រះដាំព្រលិត ជាង ២០០០ ម៉ែត្រការ៉េ។ ចាប់តាំងពីការរាតត្បាតនៃជំងឺកូវីដ-១៩ លើកទី៤ មកទល់នឹងពេលនេះ ជារៀងរាល់សប្តាហ៍លោកបានដកផ្កាព្រលិតជាង ៣០០គីឡូក្រាម ដើម្បីជួយគាំទ្រដល់អ្នកធ្វើការនៅតាមកន្លែងធ្វើចត្តាឡីស័ក និងប៉ុស្តិ៍ត្រួតពិនិត្យជំងឺរាតត្បាត។ ចំនួនផ្កាព្រលិតលើកនេះ រួមជាមួយនឹងកសិផល និងស្បៀងដែលប្រមូលបានពីគ្រួសារទាំងឡាយក្នុងភូមិ លោក Trung បានផ្ញើជូនកម្មាភិបាល និងយុទ្ធជនដែលកំពុងបំពេញភារកិច្ចនៅជួរមុខ។
    |
 |
|
កងសេនាជននៅស្រុក My Tu (Soc Trang) និងប្រជាជនបានដកផ្កាព្រលិត ដើម្បីជួយគាំទ្រដល់អ្នកធ្វើការនៅជួរមុខប្រយុទ្ធប្រឆាំងនឹងជំងឺរាតត្បាត |
ក៏ដូចលោក Lam Hoang Trung ដែរ ជារៀងរាល់សប្តាហ៍ លោក Dao Thanh Han នៅភូមិ Dac The ឃុំ Ho Dac Kien ស្រុក Chau Thanh ក៏បានប្រមូលផលផ្កាព្រលិត និងត្រកួនរាប់រយគីឡូក្រាម ដើម្បីផ្ញើទៅកាន់ផ្ទះបាយនៅកន្លែងធ្វើចត្តាឡីស័កនៃបញ្ជាការដ្ឋានយោធាស្រុក និងប្រជាជនក្រីក្រនៅក្នុងមូលដ្ឋាន។
ប៉ុន្មានថ្ងៃកន្លងទៅនេះ ដោយឃើញផ្ទាល់ភ្នែកនូវរូបភាពជនជាតិខ្មែរ និងជនជាតិចិននៅខេត្ត Soc Trang ព្យាយាមដឹកជញ្ជូនកសិផល និងស្បៀងអាហារ ទៅជួយគាំទ្រដល់អ្នកធ្វើការនៅជួរមុខ យើងខ្ញុំកាន់តែឃើញច្បាស់នូវស្មារតីជួយគ្នាទៅវិញទៅមក។
ចែករំលែកជាមួយយើងខ្ញុំ លោកវរសេនីយ៍ឯក Huynh Thanh Ha ប្រធាននយោបាយនៃបញ្ជការដ្ឋានយោធាស្រុក Chau Thanh (បញ្ជាការដ្ឋានយោធាខេត្ត Soc Trang) មានប្រសាសន៍ថា៖ “ចាប់តាំងពីការរីករាលដាលនៃជំងឺ Covid-19 រហូតមកដល់ពេលនេះ អង្គភាពបានរៀបចំផ្ទះបាយប្រមូលផ្តុំដើម្បីបម្រើប្រជាពលរដ្ឋដែលមកធ្វើចត្តាឡីស័ក និងកងកម្លាំងជួរមុខក្នុងការបង្ការ និងទប់ស្កាត់ជំងឺរាតត្បាតនៅតាមប៉ុស្តិ៍ត្រួតពិនិត្យជំងឺរាតត្បាតក្នុងស្រុក។
អង្គភាពបានសម្របសម្រួលជាមួយស្ថាប័ន មន្ទីរ និងអង្គការមហាជននានា ដើម្បីផ្សព្វផ្សាយ និងចលនាការគាំទ្រពីប្រជាពលរដ្ឋនៅតំបន់ ហើយទន្ទឹមនឹងនោះ បានចាត់បញ្ជូនកងសេនាជនទៅទទួល និងដឹកជញ្ជូនកសិផល និងស្បៀងអាហារ។ ទោះបីនៅជួបការលំបាកក៏ដោយ ក៏ប៉ុន្តែប្រជាជនមានការឯកភាពខ្ពស់ ដែលបានជួយគាំទ្រស្បៀងអាហារជាច្រើនប្រភេទ ដូចជា អង្ករ មីកញ្ចប់ សាច់ ត្រី បន្លែ មើម និងផ្លែឈើគ្រប់ប្រភេទជាដើម”។
លោក Ngo Thanh Toan ប្រធានគណៈកម្មាធិការប្រជាជនស្រុក Chau Thanh បានអះអាងថា៖ “ការរួមវិភាគទាន និងការគាំទ្រពីសហគមន៍ពិតជាមានតម្លៃណាស់។ ការងារដ៏មានអត្ថន័យទាំងនេះរបស់ប្រជាជនបានបង្កើនកម្លាំងដល់អ្នកបំពេញភារកិច្ចនៅជួរមុខប្រយុទ្ធប្រឆាំងនឹងជំងឺរាតត្បាត បង្ហាញស្មារតីសាមគ្គីភាព ការជួយគ្នាទៅវិញទៅមក និងការប្តេជ្ញាចិត្ត ក្នុងការទប់ស្កាត់ការរីករាលដាលនៃជំងឺរាតត្បាត Covid-19 ដើម្បីវិលមករកជីវភាពធម្មតាវិញក្នុងពេលឆាប់ៗនេះ”៕
បកប្រែដោយ Duy Hoan