ក្នុងអំឡុងពេលធ្វើដំណើរការងារទៅកាន់ទីក្រុងវ៉ាស៊ីនតោនឌីស៊ី សហរដ្ឋអាមេរិក លោក Nguyen Hong Dien រដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាមបានជួបប្រជុំជាមួយថ្នាក់ដឹកនាំអង្គភាពអាជីវកម្មនានានៃសមាគមពាណិជ្ជកម្ម និងឧស្សាហកម្មស្បែកជើង (FDRA) ដឹកនាំដោយលោក Matt Priest ប្រធាន FDRA។

leftcenterrightdel
លោក Nguyen Hong Dien ធ្វើការជាមួយថ្នាក់ដឹកនាំអង្គភាពអាជីវកម្មនានារបស់ FDRA (រូបថត៖ ក្រសួងឧស្សាហកម្ម និងពាណិជ្ជកម្ម)

នៅក្នុងកិច្ចប្រជុំការងារ តំណាងអង្គភាពអាជីវកម្មជាច្រើនរបស់ FDRA (ដូចជា៖ Nike, Adidas, Under Armour, Michael Kors, Steve Madden, Columbia Sportswear និង FDRA) បានចែករំលែកថា ពួកគេបានឃើញឱកាសសម្រាប់ការរីកចម្រើនរយៈពេលវែងនៅក្នុងទីផ្សារវៀតណាម និងចង់ពង្រីកកិច្ចសហប្រតិបត្តិការ។ លើសពីនេះ តំណាងអង្គភាពអាជីវកម្មក៏បានវាយតំលៃខ្ពស់ចំពោះភាពសកម្ម និងសុច្ឆន្ទៈរបស់វៀតណាមក្នុងការបន្តការចរចាពាណិជ្ជកម្មបដិការជាមួយសហរដ្ឋអាមេរិក។ ភាពជាប់លាប់ធ្វើឱ្យអង្គភាពអាជីវកម្មមានអារម្មណ៍ជឿជាក់ ពីព្រោះនៅពេលដែលប្រទេសមួយរក្សាជំហរច្បាស់លាស់ និងមានតម្លាភាពនោះ អង្គភាពអាជីវកម្មអាចវិនិយោគរយៈពេលវែង។

អង្គភាពអាជីវកម្មដែលចូលរួមកិច្ចប្រជុំនេះសុទ្ធតែកំពុងធ្វើអាជីវកម្មប្រកបដោយប្រសិទ្ធភាពនៅក្នុងប្រទេសវៀតណាម ហើយចាត់ទុកទីផ្សារនេះថាជាទីផ្សារមួយក្នុងចំណោមទីផ្សារសំខាន់បំផុតនៅក្នុងតំបន់។ អង្គភាពអាជីវកម្មជាច្រើនបានបង្កើតខ្សែសង្វាក់ផលិតកម្ម បណ្តាញផ្គត់ផ្គង់ និងប្រព័ន្ធដៃគូរយៈពេលវែងនៅក្នុងប្រទេសវៀតណាម ហើយចាត់ទុកទីផ្សារដែលមានប្រជាជនជាង ១០០ លាននាក់ជាកម្លាំងចលករកំណើនដ៏សំខាន់នៅក្នុងយុទ្ធសាស្ត្រសកលរបស់ពួកគេ។ ទោះជាយ៉ាងណាក៏ដោយ គោលនយោបាយពន្ធបច្ចុប្បន្នរបស់សហរដ្ឋអាមេរិកធ្វើឱ្យការផលិត និងអាជីវកម្មមានការលំបាកយ៉ាងខ្លាំង ជាពិសេសបញ្ហាពន្ធ។ តំណាងអង្គភាពអាជីវកម្មបានបញ្ជាក់ថា ពួកគេនឹងបន្តពិភាក្សា ស្នើ និងជម្រុញ ដើម្បីឱ្យសំឡេងរបស់អង្គភាពអាជីវកម្មត្រូវបានរដ្ឋាភិបាលសហរដ្ឋអាមេរិកស្តាប់ ដែលជួយកាត់បន្ថយបន្ទុកពន្ធលើទំនិញ និងបង្កើតការលើកទឹកចិត្តបន្ថែមទៀតសម្រាប់កិច្ចសហប្រតិបត្តិការរយៈពេលវែង៕

បកប្រែដោយ Thanh Cong