ស្ពានសម្រាប់ទំនិញវៀតណាមទៅកាន់មជ្ឈឹមបូព៌ា និងអាហ្វ្រិក

លុបចោលពន្ធតាមផែនទីបង្ហាញផ្លូវសម្រាប់ ៩៩% នៃទំហំនាំចេញ

អេមីរ៉ាតអារ៉ាប់រួមជាប្រទេសមួយដែលមានទីតាំងយុទ្ធសាស្ត្រនៅច្រកផ្លូវសម្រាប់ធ្វើពាណិជ្ជកម្មរវាងទ្វីបទាំងបីនៃអាស៊ី អឺរ៉ុប និងអាហ្រ្វិក ហើយជាមជ្ឈមណ្ឌលពាណិជ្ជកម្ម និងហិរញ្ញវត្ថុមួយរបស់ពិភពលោក។ ដូច្នេះ អារ៉ាប់រួមគឺជាច្រកផ្លូវពាណិជ្ជកម្មដ៏សំខាន់មួយនៅមជ្ឈឹមបូព៌ា ដោយមានសក្តានុពលក្នុងការតភ្ជាប់ជាមួយប្រទេសជាច្រើននៅក្នុងតំបន់។ តាមរយៈ UAE ផលិតផលវៀតណាមនឹងងាយស្រួលចូលទៅកាន់ទីផ្សារសំខាន់ៗក្នុងតំបន់ដូចជា អារ៉ាប៊ីសាអូឌីត កាតា និងគុយវ៉ែត ក៏ដូចជាប្រទេសមួយចំនួននៅអាហ្វ្រិកខាងជើង និងអាស៊ីខាងលិច។

ជាមួយនឹងការចុះហត្ថលេខាលើកិច្ចព្រមព្រៀង CEPA រដ្ឋមន្ត្រីក្រសួងឧស្សាហកម្ម និងពាណិជ្ជកម្ម លោក Nguyen Hong Dien បានចាត់ទុកថា នេះជាគន្លឹះសំខាន់សម្រាប់វៀតណាមក្នុងការទាញយកប្រយោជន៍ពីកាលានុវត្តភាពពាណិជ្ជកម្ម និងវិនិយោគនៅមជ្ឈឹមបូព៌ា - ជាតំបន់ដែលមានសេដ្ឋកិច្ចជាច្រើនប្រកបដោយថាមពលខ្លាំងក្លា។ មានទំហំសេដ្ឋកិច្ចធំ ប៉ុន្តែមិនត្រូវបានយកចិត្តទុកដាក់ពីអាជីវកម្មវៀតណាមក្នុងរយៈពេលមុននោះទេ។

បច្ចុប្បន្ន UAE គឺជាទីផ្សារនាំចេញធំបំផុត និងជាដៃគូពាណិជ្ជកម្មធំទីពីរ (បន្ទាប់ពីគុយវ៉ែត) របស់វៀតណាមនៅអាស៊ីខាងលិច។ ស្ថិតិពីអគ្គនាយកដ្ឋានគយបង្ហាញថា ក្នុងកំឡុងឆ្នាំ ២០១៨-២០២៣ ការផ្លាស់ប្តូរពាណិជ្ជកម្មសរុបរវាងប្រទេសទាំងពីរនឹងមានជាមធ្យមប្រហែល ៥ ពាន់លានដុល្លារក្នុងមួយឆ្នាំ។ ទាក់ទងនឹងសមតុល្យពាណិជ្ជកម្ម វៀតណាមតែងតែមានអតិរេកពាណិជ្ជកម្មធំជាមួយទីផ្សារ UAE (ពី ៣ ទៅ ៤ ពាន់លានដុល្លារក្នុងមួយឆ្នាំ)។ ទាក់ទងនឹងរចនាសម្ព័ន្ធទំនិញ ទំនិញនាំចេញសំខាន់ៗរបស់វៀតណាមទៅកាន់ UAE រួមមានៈ ទូរស័ព្ទដៃ កុំព្យូទ័រ និងគ្រឿងបន្លាស់ ផលិតផលអគ្គិសនី គ្រឿងអេឡិចត្រូនិក ម្រេច អាហារសមុទ្រ ស្បែកជើង និងទំនិញផ្សេងៗទៀត ផលិតផលគ្រាប់ធញ្ញជាតិ ផលិតផលប្លាស្ទិក គ្រឿងសង្ហារឹមឈើ។ ទំនិញនាំចូលសំខាន់ៗរបស់វៀតណាមពី UAE រួមមានៈ វត្ថុធាតុដើមផ្លាស្ទិច ឧស្ម័នប្រេងរាវ (LPG) ផលិតផលប្រេង គ្រឿងផ្សំចំណីសត្វ លោហធាតុមូលដ្ឋាន សារធាតុគីមី...។

សកម្មភាពផលិតនៅក្រុមហ៊ុនកាតដេរលេខ១០

ជាមួយនឹងខ្លឹមសារនៃការចរចាដ៏ទូលំទូលាយ កិច្ចព្រមព្រៀង CEPA សន្យានាំមកនូវផលប្រយោជន៍ប្រកបដោយតុល្យភាពដល់ប្រទេសទាំងពីរ ស្របតាមបំណងចង់ពង្រឹងកិច្ចសហប្រតិបត្តិការលើវិស័យជាច្រើនរបស់វៀតណាម និង UAE។ កិច្ចព្រមព្រៀង CEPA ត្រូវបានចុះហត្ថលេខាដោយមានខ្លឹមសាររួមមាន ពាណិជ្ជកម្មទំនិញ សេវាកម្ម-ការវិនិយោគ ច្បាប់ប្រភពដើម របាំងបច្ចេកទេសចំពោះពាណិជ្ជកម្ម វិធានការចត្តាឡីស័កសត្វ រុក្ខជាតិ គយ ការការពារពាណិជ្ជកម្ម លទ្ធកម្មរបស់រដ្ឋាភិបាល កម្មសិទ្ធិបញ្ញា ច្បាប់-ស្ថាប័ន។ គួរកត់សម្គាល់ថា ភាគីទាំងពីរបានឯកភាពប្តេជ្ញាចិត្តយ៉ាងមុតមាំក្នុងការធ្វើសេរីភាវូបនីយកម្មពាណិជ្ជកម្មជាមួយ UAE ប្តេជ្ញាលុបបំបាត់ពន្ធតាមផែនទីបង្ហាញផ្លូវសម្រាប់ ៩៩% នៃទំហំនាំចេញរបស់វៀតណាមទៅកាន់ UAE ខណៈដែលវៀតណាមក៏បានប្តេជ្ញាលុបបំបាត់ពន្ធតាមផែនទីបង្ហាញផ្លូវសម្រាប់ ៩៨.៥% នៃទំហំនាំចេញរបស់ UAE ទៅវៀតណាម។ កិច្ចព្រមព្រៀងនេះក៏រួមបញ្ចូលផងដែរនូវបទប្បញ្ញត្តិជាច្រើនដើម្បីជួយសម្រួលដល់ពាណិជ្ជកម្ម និងការវិនិយោគ ស្របតាមនិន្នាការបច្ចុប្បន្នក្នុងការធ្វើបរិវត្តកម្មឌីជីថល និងការអភិវឌ្ឍន៍បៃតង។

ការវិភាគរបស់ក្រសួងឧស្សាហកម្ម និងពាណិជ្ជកម្មបង្ហាញថា ទំនិញវៀតណាមដែលទទួលបានអត្ថប្រយោជន៍ច្រើនបំផុតពីកិច្ចព្រមព្រៀង CEPA គឺ កសិផល ព្រោះនេះជាវិស័យដែលមានតម្រូវការផលិតផលកសិកម្មគុណភាពខ្ពស់ ជាពិសេសផលិតផលស្អាត និងសរីរាង្គ ក៏ដូចជាមានវិញ្ញាបនប័ត្រហាឡាល់ផងដែរ។  បន្ទាប់គឺទំនិញប្រើប្រាស់ រួមមាន វាយនភណ្ឌ និងកាត់ដេរ ស្បែកជើង គ្រឿងអេឡិចត្រូនិច អាហារសមុទ្រ ឈើ និងផលិតផលឈើ... ទាំងនេះគឺជាផលិតផលដែលវៀតណាមមានចំណុចខ្លាំង ហើយការកាត់បន្ថយពន្ធពី CEPA នឹងជួយឱ្យផលិតផលទាំងនេះប្រកួតប្រជែងលើតម្លៃកាន់តែប្រសើរឡើង ក៏ដូចជាពង្រីកចំណែកទីផ្សារនៅក្នុង UAE ដែលជាទីផ្សារដែលមានតម្រូវការខ្ពស់សម្រាប់ទំនិញប្រើប្រាស់ដែលមានគុណភាព។

សិក្សាឱ្យបានច្បាស់លាស់អំពីទម្លាប់ធ្វើអាជីវកម្ម

ផ្លូវសម្រាប់ការនាំចេញទំនិញទៅកាន់ UAE ជាពិសេស និងតំបន់មជ្ឈឹមបូព៌ាជាទូទៅគឺធំទូលាយជាងហើយ។ ទោះជាយ៉ាងណាក៏ដោយ ផលិតផលពីប្រទេសវៀតណាមនៅតែមិនពេញនិយមពីអ្នកប្រើប្រាស់ UAE ភាគច្រើន។ ជាពិសេស ដើម្បីទទួលបានឱកាស ដែល CEPA នាំមក តម្រូវឱ្យអាជីវកម្មសិក្សាយ៉ាងសកម្មអំពីការសន្យានានារបស់កិច្ចព្រមព្រៀង ក៏ដូចជាស្វែងយល់ពីទម្លាប់ធ្វើអាជីវកម្មរបស់ទីផ្សារ UAE និយាយដោយឡែក និងមជ្ឈឹមបូព៌ានិយាយរួម។ ជាពិសេសសម្រាប់ប្រទេសអារ៉ាប់ តម្រូវការអំពីវិញ្ញាបនប័ត្រហាឡាល់គឺមានសារៈសំខាន់ខ្លាំងណាស់។ លើសពីនេះទៀត ម៉ោងធ្វើការរបស់ UAE គឺថ្ងៃអាទិត្យដល់ថ្ងៃព្រហស្បតិ៍ ឈប់សម្រាកថ្ងៃសុក្រ និងថ្ងៃសៅរ៍ ។ ប្រជាជន UAE ចូលចិត្តការប្រជុំទល់មុខគ្នា ជាជាងការហៅទូរសព្ទ ឬអ៊ីមែល។ ដូច្នេះ អាជីវកម្មត្រូវមានយុទ្ធសាស្ត្រវិនិយោគជាប្រព័ន្ធ ដើម្បីកសាងម៉ាកយីហោ និងផ្សព្វផ្សាយផលិតផលនៅក្នុងទីផ្សារដ៏មានសក្តានុពលនេះ។

ដោយសម្រេចបាននូវការប្តេជ្ញាចិត្តនៅក្នុង CEPA ក្រសួងឧស្សាហកម្ម និងពាណិជ្ជកម្មត្រូវបានគេរំពឹងថានឹងបង្កើតផែនការលម្អិតមួយដើម្បីអនុវត្តកិច្ចព្រមព្រៀង CEPA ដោយផ្តោតលើក្រុមសំខាន់ៗចំនួន ៣ ។ ជាដំបូង ក្រសួងនឹងបង្កើនការផ្សព្វផ្សាយខ្លឹមសារ និងផលប៉ះពាល់ពីកិច្ចព្រមព្រៀង ដើម្បីលើកកម្ពស់ការយល់ដឹងអំពីខ្លឹមសារនៃការសន្យានានា ក៏ដូចជាការងារដែលត្រូវធ្វើ ដើម្បីទាញយកផលប្រយោជន៍ប្រកបដោយប្រសិទ្ធភាពពីឱកាសដែលកិច្ចព្រមព្រៀងនាំមក។ លើសពីនេះ ក្រសួងឧស្សាហកម្ម និងពាណិជ្ជកម្ម ផ្តោតលើការកសាងច្បាប់ និងស្ថាប័ន។ ក្រសួងនឹងសម្របសម្រួលជាមួយក្រសួង ស្ថាប័នពាក់ព័ន្ធ ដើម្បីធ្វើវិសោធនកម្ម និងបន្ថែមឯកសារច្បាប់ ហើយបញ្ជូនវាទៅអាជ្ញាធរមានសមត្ថកិច្ច ដើម្បីអនុម័ត និងប្រកាស់ឲ្យប្រើប្រាស់ តាមផែនទីបង្ហាញផ្លូវដែលបានកំណត់ក្នុងកិច្ចព្រមព្រៀង CEPA ដែលរួមមានក្រឹត្យរបស់រដ្ឋាភិបាលដែលប្រកាសឱ្យប្រើប្រាស់តារាំងពន្ធនាំចូលអនុគ្រោះពិសេសរបស់ CEPA ដើម្បីអនុវត្តសម្រាប់ UAE និងសារាចរស្តីពីច្បាប់នៃប្រភពដើមនៅក្នុង CEPA ។

ជាពិសេស បើយោងតាមថ្នាក់ដឹកនាំក្រសួងឧស្សាហកម្ម និងពាណិជ្ជកម្ម ខ្លឹមសារសំខាន់មួយក្នុងផែនការអនុវត្ត CEPA គឺការតភ្ជាប់អាជីវកម្ម UAE ដើម្បីធ្វើការវិនិយោគលើវិស័យផលិតកម្មឧស្សាហកម្ម ថាមពល ភស្តុភារ... ក្រសួងឧស្សាហកម្ម និងពាណិជ្ជកម្មក៏នឹង សម្របសម្រួលជាមួយក្រសួង និងស្ថាប័ននានា ដើម្បីផ្តោតលើការអនុវត្តការងារនានា ដូចជា បង្កើតកម្មវិធីគាំទ្រ និងលើកកំពស់ការប្រកួតប្រជែងសម្រាប់ទំនិញ និងអាជីវកម្ម ជាពិសេសសហគ្រាសធុនតូច មធ្យម និងទំនើប ក្នុងដំណើរការស្វែងរក និងជ្រៀតចូលទីផ្សារនាំចេញថ្មីក្នុងតំបន់ និងបំពេញតាមតម្រូវការក្នុងប្រទេសនាំចូល រួមទាំងវិញ្ញាបនប័ត្រហាឡាល់។

បកប្រែដោយ​ Duy Hoan