កិច្ចសហប្រតិបត្តិការទ្វេភាគីវៀតណាម-កូរ៉េខាងត្បូងត្រូវបានជម្រុញ
កប.អនឡាញ - កម្មវិធី "ជំនួបសំណេះសំណាលជាមួយប្រទេសកូរ៉េខាងត្បូងនៅឆ្នាំ២០២០" ដែលបានរៀបចំឡើងដោយក្រសួងការបរទេសវៀតណាម និងស្ថានទូតកូរ៉េខាងត្បូងប្រចាំនៅទីក្រុងហាណូយនាព្រឹកថ្ងៃ៣០ ខែមិថុនា ក្នុងបំណងពង្រីកទំនាក់ទំនងវៀតណាម-កូរ៉េខាងត្បូង ជម្រុញកិច្ចសហប្រតិបត្តិការលើវិស័យពាណិជ្ជកម្ម វិនិយោគ និងការធ្វើអាជីវកម្មរវាងប្រទេសទាំងពីរក្នុងដំណាក់កាលស្ដារសេដ្ឋកិច្ចឡើងវិញបន្ទាប់ពីជំងឺ Covid-19។
អញ្ជើញចូលរួមជំនួបនេះមានវត្តមានរបស់លោក Bui Thanh Son អនុរដ្ឋមន្រ្តីប្រចាំការក្រសួងការបរទេសវៀតណាម លោក Park Noh-wan ឯកអគ្គរដ្ឋទូតកូរ៉េខាងត្បូងប្រចាំនៅវៀតណាម និងថ្នាក់ដឹកនាំអាជ្ញាធរដែនដី និងសហគ្រាសនៃប្រទេសទាំងពីរជាង ៨០០ នាក់។
    |
 |
|
ទិដ្ឋភាពនៃជំនួបសំណេះសំណាលជាមួយប្រទេសកូរ៉េខាងត្បូងនៅឆ្នាំ២០២០ (រូបថត៖ vovworld.vn) |
ក្នុងឱកាសនេះ លោក Bui Thanh Son សង្កត់ធ្ងន់ថា កិច្ចសហប្រតិបត្តិការលើវិស័យជាច្រើនរវាងប្រទេសទាំងពីរទទួលបានលទ្ធផលល្អ ក្នុងនោះ វិស័យសេដ្ឋកិច្ចគឺជាសសរស្ដម្ភសំខាន់មួយ។ រដ្ឋាភិបាលនៃប្រទេសទាំងពីរបានសហការយ៉ាងជិតស្និទ្ធក្នុងការគ្រប់គ្រងជំងឺ Covid-19 នៅប្រទេសរៀងៗខ្លួន ដោយបង្ហាញយ៉ាងច្បាស់នូវស្មារតីនៃទំនាក់ទំនងភាពជាដៃគូយុទ្ធសាស្រ្តវៀតណាម-កូរ៉េខាងត្បូង។
លោក Hong Sun អនុប្រធានសមាគមធុរកិច្ចកូរ៉េខាងត្បូងប្រចាំនៅវៀតណាមបានឲ្យដឹងថា មុនពេលកើតមានជំងឺ Covid-19 វៀតណាមជាប្រទេសមួយក្នុងចំណោមប្រទេសដែលមានបរិយាកាសវិនិយោគគួរឲ្យចាប់អារម្មណ៍ ដោយមិនគ្រាន់តែចំពោះប្រទេសកូរ៉េខាងត្បូងប៉ុណ្ណោះទេ ថែមទាំងចំពោះប្រទេសជាច្រើនទៀតនៅលើពិភពលោកទៀតផង។ បន្ទាប់ពីជំងឺ Covid-19 វិនិយោគិននិយាយរួម និងវិនិយោគិនកូរ៉េខាងត្បូងនិយាយដោយឡែកមានការយកចិត្តទុកដាក់យ៉ាងខ្លាំង និងកំពុងស្វែងរកឱកាសដើម្បីបន្តវិនិយោគ និងពង្រីកសកម្មភាពរបស់ខ្លួននៅវៀតណាម៕
បកប្រែដោយ Thuy Anh