វៀតណាម-ឥណ្ឌាពិភាក្សាលើវិធានការដោះស្រាយការលំបាកក្នុងការនាំចេញផលិតផលកសិកម្មនិងជលផល
កប.អនឡាញ - នាពេលថ្មីៗនេះ នៅទីស្នាក់ការក្រសួងឧស្សាហកម្មនិងពាណិជ្ជកម្មឥណ្ឌា លោក Cao Quoc Hung អនុរដ្ឋមន្រ្តីក្រសួងឧស្សាហកម្មនិងពាណិជ្ជកម្មវៀតណាមបានជួបធ្វើការជាមួយអនុរដ្ឋមន្រ្តីក្រសួងឧស្សាហកម្មនិងពាណិជ្ជកម្មឥណ្ឌាលោក Anup Wadhawan ស្ដីពីការជម្រុញកិច្ចសហប្រតិបត្តិការពាណិជ្ជកម្មទ្វេភាគី និងវិធានការដោះស្រាយការលំបាកក្នុងការនាំចេញ ដោយមកពីការផ្ទុះជំងឺរលាកសួតនៅប្រទេសចិន។
ក្នុងឱកាសនេះ រដ្ឋមន្រ្តីទាំងពីរបានឯកភាពថា ភាគីទាំងពីរនៅមានសក្តានុពលក្នុងការលើកកម្ពស់ទំហំពាណិជ្ជកម្មទ្វេភាគីតាមរយៈជម្រុញការនាំចេញទំនិញ។
លោក Cao Quoc Hung បានឧទ្ទេសនាមអំពីគុណភាព និងសមត្ថភាពប្រកួតប្រជែងរបស់ផលិតផលកសិកម្មនិងជលផលវៀតណាម។ លោកបានស្នើឲ្យក្រសួងឧស្សាហកម្មនិងពាណិជ្ជកម្មឥណ្ឌាជួយផ្សព្វផ្សាយដល់សហគ្រាស និងប្រជាជនឥណ្ឌាអំពីផលិតផលកសិកម្មនិងជលផលវៀតណាម។
លោក Anup Wadhawan បានឯកភាពជាមួយលោក Cao Quoc Hung ក្នុងការបង្កើនការនាំចេញទំនិញដែលប្រទេសនិមួយៗមានប្រៀប ការជម្រុញពាណិជ្ជកម្ម ការផ្លាស់ប្ដូរក្រុមបេសកកម្មសហគ្រាស ជាពិសេស ក្នុងឱកាសរំលឹកខួបលើកទី៤៨ នៃថ្ងៃបង្កើតទំនាក់ទំនងការទូតវៀតណាម-ឥណ្ឌា ឆ្នាំ២០២០ និងឆ្នាំវៀតណាមជាប្រធានអាស៊ាន៕
បកប្រែដោយ Thuy Anh