លោក Luong Cuong ប្រធានរដ្ឋ៖ ត្រៀមរៀបចំឲ្យបានល្អ ដើម្បីបម្រើប្រជាជនទទួលអំណរបុណ្យចូលឆ្នាំថ្មីប្រពៃណី

នៅក្នុងជំនួបធ្វើការ លោក Luong Cuong ប្រធានរដ្ឋ បានសង្កត់ធ្ងន់លើភាពចាំបាច់នៃការត្រៀមរៀបចំឲ្យបានល្អ ដើម្បីបម្រើប្រជាជនក្នុងឱកាសបុណ្យចូលឆ្នាំថ្មីប្រពៃណី ២០២៦ ប្រកបដោយសុវត្ថិភាព សន្សំសំចៃ និងបង្កើតបរិយាកាសរីករាយ និងកម្លាំងចលករសម្រាប់បក្ស ប្រជាជន និងកងទ័ពទាំងមូលអនុវត្តដោយជោគជ័យនូវសេចក្តីសម្រេចនៃមហាសន្និបាតតំណាងទូទាំងប្រទេសលើកទី ១៤ របស់បក្ស ចាប់ពីបណ្តាខែដើមឆ្នាំ ២០២៦។

ទិដ្ឋភាពនៃជំនួបធ្វើការ (រូបថត៖ vov.vn)

លោក Luong Cuong ប្រធានរដ្ឋ ក៏បានស្នើឲ្យរៀបចំសកម្មភាពសួរសុខទុក្ខ ការលើកទឹកចិត្ត និងការជូនពរឆ្នាំថ្មីដល់កម្មាភិបាលបដិវត្តន៍ជើងចាស់ វីរអ្នកម្ដាយវៀតណាម យុទ្ធជនពិការ យុទ្ធជនជំងឺ ក្រុមគ្រួសារនៃយុទ្ធជនពលី គ្រួសារដែលមានគុណូបការៈចំពោះបដិវត្តន៍ គ្រួសារទទួលរបបពីរដ្ឋ បញ្ញវន្ត វិចិត្រករ និងអ្នកមានកិត្យានុភាព... ដោយធានាថាគ្រួសារនីមួយៗ និងប្រជាពលរដ្ឋគ្រប់រូបអាចអបអរសាទរបុណ្យចូលឆ្នាំថ្មីប្រពៃណីដោយសប្បាយរីរាយ។

លោក Luong Cuong ប្រធានរដ្ឋ មានប្រសាសន៍នៅក្នុងជំនួបធ្វើការ (រូបថត៖ vov.vn)

ទាក់ទងនឹងកម្មវិធី "និទាឃរដូវនៅស្រុកកំណើត" លោកប្រធានរដ្ឋបានស្នើឱ្យបន្តត្រៀមរៀបចំយ៉ាងហ្មត់ចត់ ដោយធានាឱ្យមានការរៀបចំដ៏ឧឡារិក  ដែលបង្ហាញពីសេចក្តីរាប់អានរបស់បក្ស និងរដ្ឋចំពោះអាណិកជនវៀតណាមនៅឯបរទេស រួមចំណែកពង្រឹងបន្ថែមទៀតនូវចំណងជិតស្និទ្ធរវាងអាណិកជនវៀតណាមជាមួយស្រុកកំណើត និងប្រទេស៕

បកប្រែដោយ Huyen Trang